印度菜係我其中一個至愛, 佢唔單止係「咖哩」兩個字咁簡單. 從材料o既選擇, 香料o既配搭, 以至烹調o既火候, 都包含著無窮o既學問, 同是亦係一種藝術. 能夠將呢種學問同藝術有效咁演繹出o黎俾食客欣賞, 食店o既質素同前途自然係無可限量; 而我, 就有幸o係呢度享受到咁美妙o既感官體驗.
上星期係大角咀探完朋友之後, 諗住行番出旺角食晚飯. 係誤打誤撞o既情況下, 俾我遇到呢間小店. 見到佢o既招牌寫住「印度薄餅皇」(見下圖),
心裡面好想食到好o既印度菜o個條根, 就咁俾佢挑起o黎, 即時好想知道佢地係咪名乎其實, 定還是虛有其名. 於是二話不說, 立即揀o左入黎呢度食晚飯, 睇下佢地有冇料到.
呢間舖頭細細間, 都可以容納到16個座位. 佢地o既主打係北印度o既包點、小食同主菜. 年輕o既印籍老闆兼大廚態度有善, 對我熱情款待. 我向佢落o左單之後, 佢同另一位廚師夾手夾腳泡製我o既晚餐, 前後十幾分鐘陸續上檯, 好有效率! 我o既晚餐係乜? 立即去片:
Mango Lassi 「芒果乳酪」- 夠濃夠滑.
Mango Lassi 「芒果乳酪」- 夠濃夠滑.
Mango Lassi 「芒果酸乳」(見上圖): 大大杯, 凍冰冰. 乳酪, 芒果o既質感同味道都好濃厚, 並非又甜又稀o既行貨, 真材實料. 天時暑熱飲到咁好o既Mango Lassi, 零舍舒暢!
Roti 「烤麥餅」(見上圖): 係大大塊新鮮做起上檯. 作為不經發酵o既印式包點, 好o既烤麥餅會帶出發酵麵餅o既煙韌同好趙口o既感覺. 手上o既呢塊烤麥餅 (見下圖):
食到應有o既濕潤, 全無烤過龍干掙掙o既情況, 薄身得o黎香軟煙韌, 用佢黎點素食或肉類主菜, 效果都同樣咁正. 好味!
Plain Paratha 「淨薄餅」(見上圖): 上到檯時不禁嚇o左一跳, 因為平時是食開o既Paratha都係o的好似平板一塊兼油淋淋o既煎餅, 而眼前o既呢一塊, 望落高低起伏仲油聲唔多, 心裡第一個感覺就知佢唔會差得去邊. 搣開佢o黎睇:
佢o既一層層波浪紋 “起哂花” (見上圖).
整Paratha最考功夫o既地方, 除o左要將壓平o既生麵糰接到好似風琴咁再壓平呢個反覆步驟之外, 放係平底窩上烤o既時間同樣要把握得好, 至可以做到 “起花” o既效果. 手上o既呢塊Paratha, 不但只起哂花, 層次分明. 食落口 (見下圖):
「淨薄餅」close-up - 好似蛋撻o既酥皮咁酥脆可口!
「淨薄餅」close-up - 好似蛋撻o既酥皮咁酥脆可口!
一層層o既穌皮, 酥軟得o黎保持濕潤, 就好似食到靚蛋撻o既酥皮咁酥脆可口.
普通o既Paratha同高質o既Paratha, 分別就係呢度. 能夠食到咁靚o既酥皮唔係時時有, 囉佢o黎點菜點汁只會徙左大廚o既一番手藝. 我一次過慢慢搣慢慢食, 使呢o的咁美妙o既感覺停留o係我心內多一的.
呢個Paratha o既水準超卓, 薄餅皇之名當之無愧!
Pullao Rice 「印度白飯」(見上圖): 好o既Pullao Rice, 煮出o黎o既印度米係一條條, 唔會癡埋一舊, 而事先煎好o既印度香料 (Garam Masala) - 肉桂、茴香、豆寇、咖哩葉等 - 同印度米並配以橙黃色o既藏紅花奶一齊煮熟, 令色澤, 香味同幼細o既質感, 全部都o係呢個飯裡面顯露出o黎. 呢度o既Pullao Rice不論色、香、味都有齊以上o既優點, 乾濕度適中, 做到應有既水準. 正正顯示出大廚對米飯o既質素同薄餅一樣, 同樣重視. Well done!
Mutter Paneer「青豆家鄉芝士」: 印式芝士又多又大粒!
Mutter Paneer「青豆家鄉芝士」: 印式芝士又多又大粒!
Mutter Paneer「青豆家鄉芝士」(見上圖): 呢味菜係廣受印度人喜愛o既家常菜之一. 佢o既好味之處在於印式芝士o既軟同滑, 同埋濃郁而creamy o既青豆香料汁所輕輕滲出o既甜味. 眼前呢個Mutter Paneer, 新鮮滾熱辣上檯, 大大件o既印式芝士數埋都有成七、八舊, 青豆同香料o既份量睇落好充足, 香料汁o既色澤同濃度亦好對辦. 食落口 (見下圖),
「青豆家鄉芝士」: 印式芝士軟滑, 青豆汁濃滑得o黎甜美, 配 Roti 最佳!
「青豆家鄉芝士」: 印式芝士軟滑, 青豆汁濃滑得o黎甜美, 配 Roti 最佳!
印式芝士煮得好軟好滑, 可以話係我食咁耐印式芝士以o黎, 最軟滑o既一次!
個香料汁裡面o既茴香、荳蔻同番茄、奶油共冶一爐, 當中所釋出既香、甜、濃同滑, 配埋做得咁好o既印式芝士, 每一淡都令我好滿足, 好感動, 心裡充滿著溫暖同平和o既感受.
全賴呢度o既Mutter Paneer, o個一刻我終於明白點解佢咁為印度人所愛戴o既原因喇.
Lamb Masala「瑪沙拉羊肉」(見上圖): 印度菜中o既Masala, Roganjosh, 同Karahi 都有一個共通之處, 就係以煎炒香料所煮出o黎o既濃汁, 去激發羊肉所獨有o既鮮味同肉味. 眼前o既呢個瑪沙拉羊肉, 上到檯時同樣都係熱辣辣, 羊肉大大件, 香料汁啡紅而滲出油份o既色澤, 我o既經驗話我知, 佢o既賣相完全對板. 夾起羊肉食落口(見下圖):
「瑪沙拉羊肉」close-up - 煮得稔滑, 送 Pullao Rice 一流!
「瑪沙拉羊肉」close-up - 煮得稔滑, 送 Pullao Rice 一流!
同尖沙咀「爵樂」, 元朗「大使館」o既頂級香料羊肉相比, 呢度羊肉o既嫩滑度只係僅僅低一個par, 肉質差唔多接近一撕即開o既程度, 口感依然豐富. 我最欣賞o既就係佢既香料汁 - 以洋蔥、薑蒜容、蕃茄、茴香、黃薑等材料炒香再以慢火煮熟 - 呢個汁o既美道濃郁得o黎細緻, 充份將羊肉o既粗 (味道) 同幼 (肉質) 發揮, 每一淡都能感受呢種相輔相成o既美妙, 大廚o既功力令我衷心配服.
總結: 食o左咁多野, 埋單都只係HK$149, 認真物超所值. 咁樣o既一間小店能夠做出水準咁好o既印度菜, 實在令我好感動. 以後多o黎幫襯自然係不在話下; 我更加期望佢地能夠越做越好, 將呢種美味同溫暖o既感覺, 帶俾更多有口福o既食家.
題外話/補充資料
1) 飯後同老闆傾開計, 知道佢係印菜廚師出身, 難怪呢度o既食品咁有名牌餐館o既水準同風範啦.
2) 留意到佢地o既餐牌上並冇Naan 或者 Tandoori 一類o既燒烤菜式. 老闆話由於店舖面積所限, 設置印式烤爐仍在計劃階段中. 期望佢地o既生意蒸蒸日上, 日後擴充業務, 使我地有機會試o下佢地o既燒烤功夫就好喇.