睇到唔少關於加藤屋既負面食評. 最近試過幾次, 有唔同既睇法.

第一次黎食係農曆新年之前, 係附近購物時先知道佢開業, 又有未曾試過既麻辣牛肉飯, 於是普通 size 同中辣試下,  感覺係有四川麻辣既花椒味, 但同辣椒味一樣較輕手, 個中辣可以話係小辣, 而最大既問題係牛肉切得較厚, 煮出來比較韌, 同邁唔夠肉汁, 令碗飯幾乾身. 整題上有改善之處, 同埋我想如果落單時有所準備, 效果可能會更好, 所以...

第二次黎食係上星期五, 再 order 麻辣牛肉飯 (特盛 size, 要 '特辣; 同  '多汁'; HK$50):今次叫左特辣, 花椒味明顯強左, 而辣椒味就唔算太辣, 只係小至中辣左右. 牛肉切得夠薄, 所以比上次容易入口. 而由如 order 多汁 , 所以成個飯食落唔乾身, 飯夠煙韌亦好有麻辣汁水. 作為快餐牛肉飯, 呢個價錢同水準係食得過既.

我想呢個集團都唔會唔關心自己既食品水準, 尤其係見到咁多 Openrice 既食評之後, 定當有所改善. 麻辣牛肉飯就係個好例子. 希望加藤屋會繼續改善,  能夠同吉吉有得fight啦. 
 

睇到呢間餐廳o既資料, 知道佢同老字號「活蘭」(Woodlands) 都o係同一地址兼同一層 (永安廣場一樓), 擺明有拆人招牌 feel. 我本身好鍾意食印度o既 street food, 見食得 Branto 同活蘭太密, 咁就一於要試o下新o野, 同埋睇o下佢有冇 quali 去同活蘭鬥一番. 唔講咁多, 去片! 

呢度o既格局同裝修都俾活蘭同 Branto 舒適同寬敞得多, 面對尖東海旁, 可以坐到 40-50人. 佢唔係一般o既家庭式小店, 而係o係東南亞, 印度同中東都有分店o既集團式經營, o黎香港開舖似係有備而來. 望個 menu, 主打o既9成都係南印度o既特式食品, 尤其係早餐同街頭小食, 睇o下點...1. Pesarattu Dosai (「綠豆 Dosa」. $75): 平時食開o既 Dosa (煎米餅) 都係用發酵o左o既米漿o黎薄煎. 呢個 Pesarattu 係南印度安得拉邦o既出名街頭小食, 唔用發酵米漿而係用鮮磨o既綠豆漿去煎, 望落同米漿Dosa 差唔多, 但打開裡面:個內陷係綠色 (綠豆漿嘛), 同埋滲入唔少洋蔥粒同青辣椒粒. 綠豆漿o既口感比米漿 "粉" o左一o的, 但成塊 Dosa 仍然煎得既煙韌又脆口, 洋蔥粒+青辣椒粒好辣但好惹味, 效果好好, 水準之作. 如果您食得辣, 呢個綠豆 Dosa 係非叫不可. 讚! 2. Bhindi Masala (「香料煮秋葵」. $65): 呢度o既秋葵有兩種做法, 香料煮 (Masala) 或 乾炒 (Bhindi Fry), 我揀左 Masala, 結果冇令我失望. 雖然份量比一般印度餐廳o既細左o的, 但秋葵煮出o黎o既效果比較乾爽, 唔會水汪汪痴立立, 仲有少少脆口o既感覺添. Masala 本身溫和唔辣, 又能帶出秋葵o既清爽質感, 真係好興幸叫o左呢個小菜, 係高水準之作. Yes! 3. Pongal (「泰米爾式煮米漿」. $60): Pongal 係南印度泰米爾邦好普遍o既早餐之一, 用油煎好o既香料, 包括黑胡椒粒, 孜然, 腰果, 咖哩葉等, 再加入煮爛既米漿快炒而成. 賣相好似舊米餅咁, 而食落口,似係食緊煮得較杰o既糊仔, 羹羹都有唔少腰果同黑胡椒粒, 口味清淡而豐富, 係個唔錯o既特式早點. 食得過.4. Jain Set Menu (「耆那餐拼盤」. $85): 耆那教徒o既菜式同一般印度素食唔同o既地方係, 唔會食有根莖類o既食物, 包括洋蔥, 蒜頭, 薑類等等. 我一直都好想試o下冇哂呢的香口o野煮出o黎o既菜式好唔好食, 就一於試o下.呢個 set 包括一塊炸薄脆 (papadum), 兩塊烘麵包 (chapati) 或炸麵包  (puri) , 乳酪撈飯 (curd rice), rasam 撈飯 (Rasam rice), 香料煮雜豆 (Dal Makhani), 香料煮豆角 (Bodi Masala), 香料飯 (Pulao rice), 同埋用粗麥粉做既橙色甜品 "Sooji Halwa". 差唔多可以話係一個全飯宴. 塊薄脆同炸麵包都係新鮮出鑊, 脆口又有嚼勁; 乳酪撈飯冇多餘o既奶味, 淡得o黎好清新; Rasam 撈飯就好似中菜o既湯飯, 冇太重香料味, 醒胃之選; 煮雜豆同煮豆角雖然冇哂o的洋蔥蒜頭薑打底, 但仍然做到幾濃郁o既香料味同質感, 撈香料飯食當真唔錯; 最後o既橙色甜品 Sooji Halwa, 甜味恰到好處, 唔會甜耶耶, 係好好o既 round up.

個人覺得, 呢個 Jain set 好有莫名其妙o既潮州人堅毅 feel, 可以好清好淡, 但同樣可以食得好開心又豐富, 係食得過既!

Overall 總結: 呢間餐廳賣o既係高質素o既南印度食品, 地點舒服, 價錢算公道. 餐牌內仲有好多地道菜我都好想試, 所以對我o黎講就一定有下次.

想試o下不同口味o既印度菜, 尤其係南印度o既特式小食, 呢間亦係城中罕有既好選擇! 抵讚!

又係懶得寫食評, 結果都係不寫不快既時間.

我一直對「麻辣雞煲」有一種執著, 心裡面最想食到既麻辣雞煲, 唔需要死辣, 但花椒 (麻) 同辣椒 (辣) 兩種味道都要一樣強度同相輔相成. 暫時食過既咁多間本地舖頭, 都未達到我既要求 (即係未 hit  到我既感動位). 唔知呢間, 效果如何?

點解揀呢間試食? 因為呢度有好多相睇同比較. 睇見o的煲同小菜望落似樣, 就o黎呢度試o下.

地方唔大, 四五張檯頂多坐到廿人左右. 餐牌上川菜同湘菜各佔一半, 可能因為老闆/大廚係湖北人仕既關係吧.

o黎到一心要試雞煲, 當然要揀. 見佢個名係「香辣雞煲」而唔係麻辣雞煲, 都要向女侍應問清楚. 佢話個煲係有麻辣o係裡面既. 心諗既然o黎到, 唔緊要, 試o下啦.「香辣雞煲」($148 半隻): 我點o左大麻大辣. 約十分鐘左右炒好連窩連爐上. 女侍應服務好細心, 煮o左一陣佢再加o左小小水入煲而免煮儂, 然後較番細火俾我. 暖溫正正係我喜歡食雞煲既溫度. 妳真有我心. 抵讚!

講番個煲: 雖然我係叫左大麻大辣, 但辣度似乎係中至小辣既程度. 而麻, o的花椒係食到, 但實在唔多. 麻同辣都可算係 underwhelming. 有趣既係, 香料真係十足 - 八角, 薑, 蒜子 - 炒得o的雞香同入味. 半隻雞既份量算有八九成左右. 整體上, 同我理想既麻辣要求自然相距甚遠, 但香辣度就配合得幾好, 算係小小意外既驚喜吧.

呢度既賣點係服務好, 同食品既質素唔錯. 我相信呢度既湘菜會比川菜更有睇頭, 有機會一定會再黎試o下.

本來唔打算o係呢度再寫食評 (因為我實在太懶了 ), 但黎o左呢間之後, 勾起o左我條筋, 唔寫唔得.

我一直都好鍾意食印度既 street food, 尤其係孟買o個o的, 夠香夠濃夠鑊氣. 多年o黎係香港做得叫做似樣既印度小食 restaurant, 就只得 Branto 一間. 早幾日 google 緊o的印式 buffet 個陣, 係 openrice 無意中搵到呢間, 寫明主打孟買 street food, 又未有 review, 一於趁今日放假去試下o的 lunch.呢度個場環境大過 Branto, 夠光猛, 好 spacey, 唔會坐得迫迫狹狹. 贏左Branto. 加分!

餐牌擺明車馬主打孟買 street food, 有 veg 又有 non-veg, 一於今次先試兩樣同 Branto 可以直接比較既食品, 睇下呢度既功力如何.Pav Bhaji - 呢度既 pav (餐包) 既包面搽上炒起左 bhaji 既剩餘 masala, 包裡面冇搽酥油. 同 Branto 比, 呢道的包大件o的, 亦無咁油膩, 但冇酥油既 pav, 總係掙緊o的o野咁. 至於份 bhaji (快炒雜菜蓉o架哩), 薯仔既 portion 較少, 番茄同 galam masala 既味好濃, 好o岩我口胃, 唯獨是佢既份量只及 Branto 既三份二, 好味得o黎實在唔夠喉.

Verdict: 呢度的 bhaji 比 Branto 既好味, 但 branto 既餐包比呢度 authenic 好多. 以價錢同份量o黎講, Branto 小勝, 但基本上各有特色, 不相上下.Chole Bhatura - 呢度o的 bhatura (炸麵包) 唔係平時大大件既一件過, 而係中形 size 既兩件. 望落好似冇 Branto 既 bhatura 咁吸引, 但呢度既 bhatura 勝在厚身得o黎o岩o岩好, 口感煙軔非常有滿足感. 相反 Branto 既 bhatura, 大件得o黎又薄又削, 即使齋食唔連 chole 一齊送, 呢度既 bhatura 已經贏 Branto o個o的成幾條街!

至於個 Chole (雞豆香料o架哩), 呢度既就鑊氣夠, 油水充足, 水準比 Branto 既較好同穩定, 唯獨是才料方面有o的偷工減料既感覺: 雞豆唔夠大粒, 而且唔係全雞豆, 而係混埋青豆同小量粟米. 唔通孟買o的小販諗縮數真係諗得咁盡?

Verdict: 呢度不論 bhatura 定 chole 都好食過 Branto, 但價錢貴o左一截. 講量就 Branto 既夠實際, 講到質, 就一定係呢度既贏哂!

Overall, 呢度既孟買食品做得有板有眼, 又坐得舒服. 單以 veg food 黎講, 同 Branto 係叮噹馬頭, 更可況佢地o的 non-veg (例如炸雞) 睇落唔錯, 所以對我o黎講, 呢度一定有下次!

自從 Burger King o係5、6年前回歸香港開始, 一直以中高檔o既路線o係本地開支散葉 - 整潔舒適o既分店, 水準優異o既食物, 同不時推陳出新o既高檔口味 - 令佢地成功吸納到一班對美式漢堡包快餐有更高要求o既顧客. 眾多新口味之中, 以質優肉厚o既 “安格斯XT皇堡” 系列最為顧客所受落. 即使佢地比麥當勞較高級o既包類要貴多8 - 10蚊, 依然不乏捧場客, 亦證明o左好似Burger King呢類美式快餐即使唔行麥當勞o既大眾化路線, 只要建立品牌o既策略正確, o係香港呢個競爭咁激烈o既市場, 依然大有可為.

一個星期前o係平時幫襯開o既Burger King上水分店見到佢地又有新o既皇堡出爐, 叫做 “極上黑松露安格斯XT皇堡” (見下圖):o岩o岩好自己o既電訊供應商又有皇堡套餐送炸雞柳o既優惠短訊, 咁就一於試下呢個新出品究竟得唔得.

食之前都要講一講呢間分店. 我鐘意o黎呢度食Burger King唔單止係因為o係自己地頭, 最重要o既係佢o係上水廣場o既3樓, 位置偏向一角, 裝修比大眾化o既麥當勞高貴, 大部分時間o黎到都可以安靜舒服咁用餐. 唔洗好似o係麥當勞咁, 時時對要著o的嘈喧巴弊o既細路走o黎走去, 同埋o的污糟邋遢o既流浪漢係度打躉. 呢o的麥當勞 ‘孖寶’ 係唔會o係呢間Burger King分店內出現, 一日三餐都可以o係舒服同安心o既環境之下渡過.

講番個 “極上黑松露安格斯XT皇堡” 套餐 (見下圖):成個套餐要HK$49.5, 淨要個包就盛惠HK$38, 可以話係 Burger King 咁多出品裡面, 暫時o黎講係最貴o既一款. 由於有短訊 ‘免費送4件炸雞柳’ o既優惠, 一於係呢次用埋, 使個套餐豐富o的同感覺上平一o的.

呢個黑松露皇堡秉承住 ‘安格斯XT皇堡’ 系列o既風格, 即係尺碼屬於偏細而份量就有番咁上下. 包裝紙o既側邊仲貼有彩色label (見下圖): 以顯示佢o既矜貴. 呢個gimmick令我想起以前Freshness Burger新開張冇幾耐o個陣, 佢地o的包同樣都貼有顏色label, 頗有心思. 打開個包o黎睇 (見下圖): 厚厚o既粟米包、差唔多成1/2吋厚o既安格斯牛肉、 白色一層黑松露醬、 大片蕃茄、 生菜、多片煙肉、 洋蔥, 同半融o既車打芝士, 單係材料同份量都要俾麥當勞o個o的所謂至專系列都要高出幾皮. 食落口 (見下圖): 牛肉同所有材料o既口感十足, 煙肉香軟而煙韌o既美味尤其突出. 個白色o既黑松露醬充滿著一點點黑松露, 的確係散發著一鼓好香同好濃烈o既松露香味, 唯一美中不足o既就係個松露醬調得太過creamy同太過濃味, 令佢同松露o既香味有唔協調o既感覺. 如果個黑松露醬能夠稍為稀一o的同埋淡味少少的話, 效果應該會相當之好. 呢次, 就當係賣o個個同食o個個, 一齊獲得寶貴o既經驗吧.

至於雞柳同薯條都係新鮮炸起, 保持住佢地一貫即叫即做o既質素, 好過麥當勞o個o的乾僧僧o既麥樂雞同凍冰冰o既 ‘油條’ 多多聲.

總結: 雖然個黑松露皇堡今次唔係太 work out, 佢依然顯示出Burger King o係食材同質素方面不斷改進, 務求令顧客有驚喜o既誠意. 只要不斷努力, Burger King要鞏固同開拓對飲食質素有要求o既顧客市場, 真係一o的都唔難, 起碼係質優呢方面, 佢已經跑贏麥當勞成條街先啦!

住o係上水多年, 有時都會問自己點解咁大懵, 連「四眼仔」、「陳六記」呢o的名店都會走漏眼無幫襯. 自從早排迴歸Openrice 之後, 俾我搵番一間又一間近在咫尺, 屬於自己區o既美食店, 太好喇! 我會續間續間食均佢地, 將我o既感想同大家分響. 今次就以「四眼仔」作為開始啦!

我先後o係5月1日同5月6日趁公眾假期o黎呢度食腸粉. 講到「四眼仔」, 我雖然唔係經常o黎粉嶺, 多年o黎對聯和墟o既街道同食肆都算熟悉, 點解我每次經過呢道都錯過o左, 我都好莫名其妙; 可能係因為佢係一間位處角落頭o既蚊型舖, 兼且以前唔係咁多人識o既原固吧. 今時今日, 連區外o既人都專登走o黎呢度幫襯, 由朝到晚到見到排隊買腸粉同小食o既人龍, 想我再走漏眼, 難咯!

5月1日假期當日晏晝o黎到, 預o左要排隊. 呢度不設任何座位, 如果揀o係處食, 就要企街, 否則就要打包擰走. 貼o係舖面o既食品價錢牌 (見下圖):好大張同好清楚, 方便我未落單都可以心裡盤算好要食乜同埋用幾多錢去食. 從價錢牌所見, 舖頭只供應腸粉、牛肉球、粉果、魚旦同燒賣, 價錢同基本消費以粉嶺區o黎講, 算係相當公道.

落單時, 原本諗住用HK$14一次過食齊咁多樣o野, 點知個伙記話粉果已經賣哂, 真係晴天霹靂! 唔怕, 今次就食少一樣 (見下圖), 再加埋5月6日早上o既 “粉果補完計劃”, 兩次食齊所有食品唔係問題o丫. 味道同質素如何? 立即介紹:醬料: 同上水「明記」相比, 呢度所有醬料 - 豉油、熟油、三色醬同芝麻 - 都係由o的伙記幫顧客落晒, 份量偏少, 唔似得o係「明記」o的三色醬同芝麻可以隨心所欲自己任加, 有小小失望. 扣分. 腸粉 (見上圖): 從之前o既食評中得知, 呢度o既腸粉唔係自家製而係從其他舖頭入貨. 呢個唔係大問題, 最緊要係佢好唔好食o者. 手上o既呢碟腸粉係蒸好o左熱騰騰, 5蚊4條o既份量充足, o的粉捲得冇「明記」o個o的菲林茼腸粉咁實的的. 我鍾意佢冇咁實, 因為咁樣至可以令o的腸粉索到多o的豉油同醬料, 食起o黎更加好味. 讚! 牛肉球 (見上圖): 兩次o黎食佢都係大大粒o既份量, 實淨而非酒樓食到o既山竹牛肉o既鬆弛質地. 裡面有唔少大大粒o既馬蹄 (見下圖):食落好有牛味同好充實. 如果叫2至3粒會幾襟飽, 我鍾意! 粉果 (見上圖): 呢度賣o既係潮州粉粿 - 水晶厚皮, 聚手, 熱辣辣 - 尺碼比牛肉球更大粒. 食落口 (見下圖),水晶皮軟得o黎好煙韌, 半肥瘦o既花生豬肉餡一咬開就鏢哂的熱辣辣o既肉汁出o黎, 好味至極, 感覺真係正到暈! 完全不枉我第二次番o黎為佢做補完, 亦難怪佢咁受歡迎, 一朝早就俾人買晒. 正就係正! 魚肉燒賣 (見上圖): 比一般係街邊食到o既較大粒, 魚味重, 冇乜惺味, 同牛肉球一樣, 都係好味兼飽肚之選. 魚旦 (見上圖): 同「明記」一樣, 可以揀 ‘辣’ (唔辣既咖哩味) 或者 ‘唔辣’ (原味). 大細同「明記」o個o的差唔多, 質地同味道, 呢道o既就唔及「明記」o個o的軟身同有魚味, 麻麻地.

除o左食品之外, 呢度o既環境同服務都值得一提:

環境: 之前講過, 唔打包o既話, o係度食就要喳住隻碟企街, 自然唔及「明記」咁可以好遊閒咁坐低一路食, 一路望出面o既街景. 好在, 身處o既和豐街同聯盛街並非繁忙街道, 唔使驚車來車往, 食埋o的死氣同灰塵. 而企街亦有企街o既特色, 可以一路食, 一路o係舖頭隔離間金舖window shopping, 真係別有一番風味.

服務: 舖位內o既2, 3位伙記經常都忙到唔停手, 不停咁切腸粉, 拂小食, 為客人落單, 落醬, 收錢, 乜都做齊. 不論客人多寡, 佢地o既服務態度都保持得相當好, 好有禮貌. 值得讚!

總結: 呢度o既腸粉同各式小食價錢吸引, 質素穩定, 同埋伙記o既服務態度好. 即使冇得堂食要企街, 即使唔係住o係粉嶺, 我都會繼續返o黎幫襯. 因為客人o既口碑, 就係靠呢間小小店舖o既努力不懈, 日績月累咁賺返o黎o既. 名氣? 咪就係咁樣o黎o架囉.

印度菜係我其中一個至愛, 佢唔單止係「咖哩」兩個字咁簡單. 從材料o既選擇, 香料o既配搭, 以至烹調o既火候, 都包含著無窮o既學問, 同是亦係一種藝術. 能夠將呢種學問同藝術有效咁演繹出o黎俾食客欣賞, 食店o既質素同前途自然係無可限量; 而我, 就有幸o係呢度享受到咁美妙o既感官體驗.

上星期係大角咀探完朋友之後, 諗住行番出旺角食晚飯. 係誤打誤撞o既情況下, 俾我遇到呢間小店. 見到佢o既招牌寫住「印度薄餅皇」(見下圖),心裡面好想食到好o既印度菜o個條根, 就咁俾佢挑起o黎, 即時好想知道佢地係咪名乎其實, 定還是虛有其名. 於是二話不說, 立即揀o左入黎呢度食晚飯, 睇下佢地有冇料到.

呢間舖頭細細間, 都可以容納到16個座位. 佢地o既主打係北印度o既包點、小食同主菜. 年輕o既印籍老闆兼大廚態度有善, 對我熱情款待. 我向佢落o左單之後, 佢同另一位廚師夾手夾腳泡製我o既晚餐, 前後十幾分鐘陸續上檯, 好有效率! 我o既晚餐係乜? 立即去片:Mango Lassi 「芒果酸乳」(見上圖): 大大杯, 凍冰冰. 乳酪, 芒果o既質感同味道都好濃厚, 並非又甜又稀o既行貨, 真材實料. 天時暑熱飲到咁好o既Mango Lassi, 零舍舒暢! Roti 「烤麥餅」(見上圖): 係大大塊新鮮做起上檯. 作為不經發酵o既印式包點, 好o既烤麥餅會帶出發酵麵餅o既煙韌同好趙口o既感覺. 手上o既呢塊烤麥餅 (見下圖):食到應有o既濕潤, 全無烤過龍干掙掙o既情況, 薄身得o黎香軟煙韌, 用佢黎點素食或肉類主菜, 效果都同樣咁正. 好味! Plain Paratha 「淨薄餅」(見上圖): 上到檯時不禁嚇o左一跳, 因為平時是食開o既Paratha都係o的好似平板一塊兼油淋淋o既煎餅, 而眼前o既呢一塊, 望落高低起伏仲油聲唔多, 心裡第一個感覺就知佢唔會差得去邊. 搣開佢o黎睇: 佢o既一層層波浪紋 “起哂花” (見上圖). 整Paratha最考功夫o既地方, 除o左要將壓平o既生麵糰接到好似風琴咁再壓平呢個反覆步驟之外, 放係平底窩上烤o既時間同樣要把握得好, 至可以做到 “起花” o既效果. 手上o既呢塊Paratha, 不但只起哂花, 層次分明. 食落口 (見下圖):一層層o既穌皮, 酥軟得o黎保持濕潤, 就好似食到靚蛋撻o既酥皮咁酥脆可口. 普通o既Paratha同高質o既Paratha, 分別就係呢度. 能夠食到咁靚o既酥皮唔係時時有, 囉佢o黎點菜點汁只會徙左大廚o既一番手藝. 我一次過慢慢搣慢慢食, 使呢o的咁美妙o既感覺停留o係我心內多一的. 呢個Paratha o既水準超卓, 薄餅皇之名當之無愧! Pullao Rice 「印度白飯」(見上圖): 好o既Pullao Rice, 煮出o黎o既印度米係一條條, 唔會癡埋一舊, 而事先煎好o既印度香料 (Garam Masala) - 肉桂、茴香、豆寇、咖哩葉等 - 同印度米並配以橙黃色o既藏紅花奶一齊煮熟, 令色澤, 香味同幼細o既質感, 全部都o係呢個飯裡面顯露出o黎. 呢度o既Pullao Rice不論色、香、味都有齊以上o既優點, 乾濕度適中, 做到應有既水準. 正正顯示出大廚對米飯o既質素同薄餅一樣, 同樣重視. Well done! Mutter Paneer「青豆家鄉芝士」(見上圖): 呢味菜係廣受印度人喜愛o既家常菜之一. 佢o既好味之處在於印式芝士o既軟同滑, 同埋濃郁而creamy o既青豆香料汁所輕輕滲出o既甜味. 眼前呢個Mutter Paneer, 新鮮滾熱辣上檯, 大大件o既印式芝士數埋都有成七、八舊, 青豆同香料o既份量睇落好充足, 香料汁o既色澤同濃度亦好對辦. 食落口 (見下圖),印式芝士煮得好軟好滑, 可以話係我食咁耐印式芝士以o黎, 最軟滑o既一次! 個香料汁裡面o既茴香、荳蔻同番茄、奶油共冶一爐, 當中所釋出既香、甜、濃同滑, 配埋做得咁好o既印式芝士, 每一淡都令我好滿足, 好感動, 心裡充滿著溫暖同平和o既感受. 全賴呢度o既Mutter Paneer, o個一刻我終於明白點解佢咁為印度人所愛戴o既原因喇. Lamb Masala「瑪沙拉羊肉」(見上圖): 印度菜中o既Masala, Roganjosh, 同Karahi 都有一個共通之處, 就係以煎炒香料所煮出o黎o既濃汁, 去激發羊肉所獨有o既鮮味同肉味. 眼前o既呢個瑪沙拉羊肉, 上到檯時同樣都係熱辣辣, 羊肉大大件, 香料汁啡紅而滲出油份o既色澤, 我o既經驗話我知, 佢o既賣相完全對板. 夾起羊肉食落口(見下圖): 同尖沙咀「爵樂」, 元朗「大使館」o既頂級香料羊肉相比, 呢度羊肉o既嫩滑度只係僅僅低一個par, 肉質差唔多接近一撕即開o既程度, 口感依然豐富. 我最欣賞o既就係佢既香料汁 - 以洋蔥、薑蒜容、蕃茄、茴香、黃薑等材料炒香再以慢火煮熟 - 呢個汁o既美道濃郁得o黎細緻, 充份將羊肉o既粗 (味道) 同幼 (肉質) 發揮, 每一淡都能感受呢種相輔相成o既美妙, 大廚o既功力令我衷心配服.

總結: 食o左咁多野, 埋單都只係HK$149, 認真物超所值. 咁樣o既一間小店能夠做出水準咁好o既印度菜, 實在令我好感動. 以後多o黎幫襯自然係不在話下; 我更加期望佢地能夠越做越好, 將呢種美味同溫暖o既感覺, 帶俾更多有口福o既食家.

我相信呢度唔少朋友都食過吉野家o既食品. 對於佢地o既味道同質素, 相信大家都心中有數. 我要講o既, 係佢地最新o既出品 - “一番巨丼”.

今日一朝早打開報紙, 見到佢地有呢個新o既 “一番巨丼” 仲有優惠, 好似幾吸引, 於是就趁晏晝時間到office附近, 即係近美孚, 九巴車廠隔離o既分店, 一心諗住食餐飽. 除o左近office之外, o黎呢度食係因為佢坐位較多, 夠光猛同人流較其他o既分店少, 可以o係繁忙既lunch hour安靜咁享用午飯, 員工既服務態度亦都幾有善, 以吉野家o既標準o黎講, 可算係相當難得.

睇到個 “一番巨丼” 連一杯飲品/湯o既套餐, 要HK$45.8, 比以前o既特盛套餐 (HK$33) 貴左足足12蚊有多! 用埋優惠都係HK$43.8, 以吉野家o既標準o黎講一o的都唔平. 個飯上到檯 (見下圖):無論點睇都唔覺佢o係份量方面有“巨” o既感覺 - 飯同埋牛肉都以平鋪o既方式放o係大碗上, 使佢睇起o黎有大面積同大容量o既觀感, 然而佢既賣相, 並無廣告中顯示出o黎o既o個種震撼; 眼前呢一碗, 可以話係份量偏少兼underwhelming o個種 - 一路食落去, 實在唔多覺佢o係肉同飯o既份量方面, 同 “特盛” 有明顯o既分別.

至於個牛肉飯o既味道同質素方面, 依然保持住吉野家作為大公司o既一貫水平 - 美國肥牛依舊係肉膏參半, 好趙得o黎都幾肥膩. 飯唔會煮得太軟或太硬, 牛肉汁依然偏少, 一定要搭單叫多份牛汁個飯至冇咁乾 - 佢無明顯提升, 亦無明顯o既倒退, 作為快餐, 中中挺挺, 依然食得過.

講到份量o既感覺, 我食呢個 “巨丼” 所用o既時間, 同平時食 “特盛” 用o既時間基本上差唔多, 而且同樣食完都係唔夠飽肚. 食完之後再望一望個大碗 (見上圖), 個碗o既直徑比“特盛”o既碗闊左o既同時, 佢o既深度亦同時淺好多. 即使佢o既牛肉真係多過 “特盛”, 用額外12蚊o既代價去加多幾片肥牛, 真係值得嗎?用o左優惠, 平o左2蚊 (見上圖), 呢度o既食物同環境係就係無乜問題喇, 始終o個種不愉快o既感覺實在揮之不去. 一句講哂: 買呢個新出品之前真係要諗一諗, 食番佢地o的平價產品至為上策 !

“小皮球, 香蕉油, 炒米餅, 糯米糰….” 呢o的上一代耳熟能詳o既廣東童謠, 似乎受時間o既流逝而逐漸被歷史o既洪流所淹沒；一o的富有特色o既廣東食品同傳統, 亦似乎遭到同一命運. 好在, 呢o的傳統仍然o係新界部份地區繼續流傳落o黎, 其中包括o係上水至有得食到o既東莞清熱妙品 “竹蔗粥”.呢間粥舖係一位住係區外o既朋友話我知o既. 佢位處石湖墟街市2樓o既熟食中心內 (見上圖), 正正就o係「農家意粉」o既對面. 呢度每日只做早市生意, 多年o黎以價廉物美o既早餐吸引附近o既街坊同熟客光顧.從佢地o既餐牌可見, 呢度主要以售賣廣東粥品油器類為主 (見上圖), 最令我注意o既自然係呢度o既主角 “竹蔗粥” 同埋平時甚少食到o既 “粟米粥”. 所有粥品都以套餐o既形式發售, 18蚊包埋油條/腸粉或炒麵同一杯凍飲. 而我先後係5月1日同5月6日去食o左佢地兩次早餐. 味道如何? 依家話你知:竹蔗粥 (見上圖): 上檯時見佢係啡紅色令我感到奇怪, 因為以前食過o既蔗粥係同米一樣係白色o既. 唔同地方有唔同o既做法, 呢度o既用蔗粥用料相當豐富, 除o左基本o既米同竹蔗茅根外,見到同食到o既仲有紅蘿蔔、眉豆、薏米、淮山同龍眼肉 (見上圖). 粥o既稀杰度適中, 食到微甜而偏淡o既味道; 紅蘿蔔、淮山同其他配料煮得好稔, 已融入o左個粥裡面. 食到一半左右咬到一片似係硬殼o既o野, 再從剩餘o既粥內搵到另一塊, 一睇原來係羅漢果o既果殼, 由此就解開o左呢隻粥o既啡紅色同埋甜味之迷: 羅漢果係晒成乾後, 裡面o既果糖依然好甜, 一般會用作煲湯或煲中藥時o既代糖, 烹調時佢o既果肉同皮亦會滲出天然o既啡紅色到食物裡面.

總體上, 呢碗竹蔗粥o係味道方面可以話係中規中矩, 無太大o既驚喜; 而有咁多o既材料, 絕對係適合o既清熱消暑佳品. 粟米粥 (見上圖): 四種簡單o既材料 - 白米、粟米粒、紅蘿蔔粒、水, 煮出o黎既效果幾綿滑. 淡淡o既一口, 食落舒服, 係驅熱補虛之選. 我鍾意. 油炸鬼 (見上圖): 一大條切好上碟. 雖然佢已攤凍o左一段時間, 咬落去依然仲係好酥脆. 唔難想像如果我係早一兩個鐘o黎呢度趁熱食佢, o個種又熱又脆o既感覺一定正到不得了. 凍就係凍o左, 依然值得我讚. 蝦米腸粉 (見上圖): 係傳統o既拉腸, 腸身亦用o黎做牛腸同蝦腸. 佢相當重米漿, 幾痴碟, 唔會好似酒樓o個o的又爽口又唔好食. 蝦米細粒o左o的, 無損整體o既好味程度. 凍豆漿 (見上圖): 開得好稀, 飲到有小小黃豆味, 平庸之作. 凍菊花茶 (見上圖): 屬於維他o既貨色, 幸好忠於原著, 唔會好似豆漿咁淡茂茂.

總結: 以18蚊一個廉宜o既早晨套餐o黎講, 呢度粥品同大部份食物o既水準保持住中挺水平, 實屬食得過. 竹蔗粥同粟米粥呢o的將來可能會失傳o既傳統廣東食品, o黎到呢度o既話, 亦一試無訪. 作為上水人, 我有機會都會食多幾碗, 一來消暑, 二來係讓呢o的童年時o既美好回憶, 一點一滴咁流在我心中.

好高興我有兩位朋友同我一樣都係嗜辣之人, 趁「五一」前夕大家有時間可以聚埋一齊, 就想揀一間o係市區既川菜館挑戰一下味蕾o既極限. 見呢間「麻辣媽媽」係ORice有唔少o既食評, 放出o黎o既相亦睇落唔錯, 於是我地一行3人就決定o係4月30日晚o黎呢度過一過辣癮, 睇下呢度o的麻辣菜式究竟得唔得. 結果係點? 立即去片:點菜之前先飲o的酒warm up一下, 朋友介紹黑啤溝普通啤好道唔錯, 就嗌o左兩支大o既健力士同青島o黎個兩溝. 上檯時, 的大大個o既直身杯係預先雪凍o左(見上圖), 對我地o既佐飲更有慶致, 值得讚! 兩溝o既效果相當唔錯, 加埋用凍杯o黎飲, 我地倍覺慶鬆愉快.

唔洗一陣, 各式小菜陸續上檯. 以下o既評分以10分為滿分, 菜名後面標明我地預先選好o既辣度:口水雞 (例牌, 大辣; 見上圖): 一件件雞好似個金字塔咁疊埋一齊, 有青瓜絲墊底. 面頭淋上黑黑o既口水汁. 就咁睇, 雞同口水汁o既色澤望落okay. 食落口 (見下圖): 雞件大部份係厚切o既雞胸, 口水汁o既醬油味道同質感濃烈, 感到佢辣又未至於好辣, 雞件吸收到汁既辣味, 呢個口水雞做得算係唔錯. 份量方面, 雞大約有7 - 8塊, 兩個人食實在唔多夠分, 更可況係三個? 7分.皮蛋青椒 (小辣; 見上圖): 青椒好甜美, 皮蛋糖心幼滑, 個汁小小辣夠濃厚, 同o的皮蛋青椒都配合得好. 唔洗一陣好快被掃光! 9分.麻辣海帶 (小辣; 見上圖): 以小食o黎講佢o既份量都唔細. 粗粗o既海帶有紅辣椒粒、蔥粒、炸蒜粒同芝麻拌碟, 作為 “麻” o既花椒就蹤影全無, 係唔多好o既先兆. 食落口 (見下圖): 咁覺到佢仲暖o既 (!), 浸過龍條條都軟賴賴, 而且全無任何花椒o既麻味. 呢碟菜明明係一碟涼菜, 有咁樣o既味道同質素實在不可接受! 食o左一陣我地停哂筷子將佢擺埋一邊. 2分.豉椒炒蜆 (中辣; 見上圖): 除o左川菜, 我地都有嗌一呢碟粵式小炒佐酒. 佢熱辣辣上檯, o的蜆係細細隻, 食落感覺係新鮮; 個汁睇o黎滿佈紅椒粒, 其實一o的都唔辣仲甜甜地, 整碟菜最大o既敗筆, 就係食唔到任何豉椒味, 名不乎實! 3分.辣子雞 (大辣; 見上圖): 呢碟菜我地無叫到最辣, 係想用佢同之後上檯o既水煮牛肉(最辣) o既麻辣度作一比較. 上檯時睇到的雞都幾大件, 辣椒同雞o既份量大約係一般川菜館o既7:3之比. 配料除紅辣椒同辣椒乾之外有腰果、蔥、仲有… 咦, 花椒呢? 點解又係無o左最重要o既材料o既? 我地於是好似打war game咁以地毯式搜索, 依然係毫無結果, 花椒蹤影杳然. 食落口 (見下圖): o的雞粒比一般川菜館o既都較大件, 可惜油泡時過o左火, 頗為乾水兼本身無乜調味, 食落相當淡口. o的辣椒o既辣度只係小至中辣o既程度, 令我地一心嚐辣o既都非常失望. 而最令我感到不快o既, 就係呢個標榜 “麻” 、 “辣” 口感同樣強烈o既四川名菜, 居然連半點麻味都無, 非常差勁, 係徹底失敗之作! 用佢o黎送酒都嫌徙. 1分.水煮牛肉 (最辣; 見上圖): 上檯時滾熱辣, 猶如龐然巨物一樣, 又紅又大堆頭感覺好似好嚇人. 對於我地幾個食慣川菜o既人o黎講, 可謂司空見慣. 紅紅o既水煮汁滲著一鼓頗為刺眼同攻鼻o既辣椒氣味, 相當有霸氣; 厚厚o既一層紅辣椒乾下藏有牛肉片、大豆芽菜、土豆(薯仔)絲、青瓜條同腰果, 而作為主要材料之一o既花椒, 同辣子雞一樣, 依然係蹤影全無, 我地o既內心當堂沉o左一大截.

到食落口時, 牛肉o既質感唔錯, 無被醃肉粉 “提練” 過, 幾好趙口. 食完一塊約莫10秒之後, 極強烈o既辣味兇擁而至, 係就係好刺激, 最弊佢同其他標榜有 “麻辣” 兩字o既菜式一樣, 都係一o的麻味都冇, 一味得個 “辣” 字. 其他材料如芽菜同青瓜都同樣被水煮汁浸透, 一樣係辣到冇朋友, 只有土豆絲(見下圖):o既密度較高, 無被辣汁全面滲透, 可以作為輕輕舒緩辣味之用. 食到呢一刻我地同辣子雞(大辣)既辣度做比較, 對於兩味菜o既辣度竟然有咁大o既落差, 大感詫異. 對於呢味水煮牛肉我感到相當痛心同失望, 因為不但止食唔到應有o既麻辣味, 大好o既食材亦被一味死辣既味道糟塌晒! 我地食到一半, 被迫放棄. 3分.珍寶青檸樹: (見上圖): 佢係呢度o既招牌解辣凍飲, 所以點都要試o下. 大大杯上, 上層係打到起泡o既檸檬什飲 (lemonade), 下層係青檸汁, 配以一大個青檸做裝飾. 一杯有齊兩種檸類唔同o既酸甜味道, 層次感強, 相當出色. 我鐘意! 8分.

總結: 埋單每人約HK$240, 以川菜o黎講可算相當貴. 呢度o既麻辣菜式有辣無麻, 只能用有名無實去形容. 即使佢地部份小食、涼菜同凍飲都做得有版有眼, 依然無法彌補麻辣主菜差劣o既水準. 實在不能接受. 以後要食上好o既麻辣川菜, 我都係會去番元朗o既「香辣風」; 起碼一定唔使好似今次咁貼錢買難受.