14/12/2023 久違了4年的聖誕gathering ，一行8人去食‘龍鳯呈祥雞煲火鍋’ 叫咗8人餐包括： 選擇咗兩個雞煲 （食完就加湯打邊爐）要咗無骨雞翼雞煲 、火焰菠蘿雞煲 海鮮拼盤（入邊有蝦、貴妃蚌、大蜆、帆立貝、墨魚仔） 牛肉拼盤（入邊有唔同嘅牛肉，我淨係識分到牛肉粒、牛胸爽、牛舌、牛柏葉🤣🤣） 安格斯牛肉 午餐肉 響鈴 炸魚皮 兩個烏冬 鳳尾蝦餃 五香肉丁餃 墨魚滑 蝦丸 蔬菜拼盤 萵筍 油甘魚刺身 竹蔗茅根同埋菊花蜜 另外十二月份生日有得玩遊戲，我哋有兩位壽星，玩完遊戲就送咗一個黑毛豬肉、四人份量嘅海鮮拼盤。同埋即時入會送咗個炸雞軟骨。（呢間店好似個個月都會推出不同優惠吸引客人） 價錢唔算平，不過食物質數很好, 睇得出佢係比靚嘅料 。待應好helpful 、有禮(尤其係一打十的四眼哥哥，介紹食物又係佢、帶位係佢、解答問題又係佢、生日可以玩掉波波又係佢負責） 我哋食嘅時候係星期四晚，都全場爆滿嘅。但係上菜嘅速度有少少慢。感覺上真係唔係咁夠人手做嘢。一開始淨係上咗午餐肉響鈴同埋炸魚皮、之後就上海鮮同埋牛肉、飲品都等咗一陣先上（尤其係我哋有另外叫啤酒，又係要等人得閒先可以斟到啤酒）由於食海鮮同肉類都感覺上飽飽地，再等咗一段時間先上丸類、餃子類、蔬菜拼盤，所以食到尾就好飽。 同埋都有段小插曲，話說初時四眼哥哥推介八人餐嘅時候，我哋問係唔係有足夠份量分八個人食，當時佢有答係嘅。但係一開始上枱嘅午餐肉、響鈴同埋炸魚皮好明顯唔係（最後期上嘅丸類同餃子類就有八件），跟住我哋問返四眼哥哥，佢話丸類餃子類、牛肉啊，海鮮嗰啲都係根據人頭計，但係午餐肉響鈴炸魚皮就係例牌 （6人份量），咁我啲朋友就‘據理力爭’話唔應該咁樣，變咗我哋唔係平均分，唔係人人都食到響鈴🤣🤣🤣🤣咁四眼哥哥好好人咁樣最終叫廚房比多兩件響鈴同埋魚皮我哋。☺️☺️☺️☺️ 埋單$4400、人均$550。叫咗八人餐、另外叫咗買四送一啤酒、叫多咗一份炸魚皮。 💚💚💚💚💚💚

15/12/2023 Bookmark 左好耐嘅柴灣名物之一：澤記快餐嘅巨型魚柳包 （作為港島東居民都係第一次去，有啲慚愧） 其實佢係接近大排檔感覺，所以夏天真係去唔到。其實今日都係接近28度嘅12月15日😵‍💫😵‍💫😵‍💫😵‍💫不過因為下晝要去東區醫院複診，早咗有少少時間，所以可以去食 （食店收五點的） 果然一上枱勁巨型，炸得香口，魚肉厚身之餘好嫩滑，好食。 不過都食得幾論盡，因為佢入邊有醬汁，同埋有蕃茄同青瓜，所以都會整濕少少個包，拎上手擺落口都有啲難度🤣🤣🤣🤣 佢本身應該早餐同下午茶時段就會平啲嘅 （平啲加錢配嘢飲）但係我係晏晝時間去，所以就分開計。

Mofusand x Kingsley cafe @ TOP 25/12/2023 因為朋友係貓奴，剛好Kingsley cafe 呢期同Mofusand 可愛貓貓crossover , 所以上網book咗聖誕日去食tea . 每人最低消費$150 因為想要隻杯，所以我同朋友都飲熱嘢 （如果凍飲就係送膠嘅裝飾） 叫咗兩個主食 ，我食吉列豬扒咖喱蛋包飯，不錯不錯，係啲咖喱汁比較少。朋友要大蝦意粉。 原本佢有便當盒或者係有啲小食併盤係送木盤嘅，不過都售罄了。 用餐時間45分鐘。 說實話大家都係為咗Mofusand 而來，所以價錢比一般貴少少。

15/2/2024 人日+團拜+補祝1月生日朋友 ～ 選擇去佐敦嘅 JK Brothers , 之前我已經食過2、3）次，印象吾錯。之前仲有得自已喺水缸‘夾’活生生海蝦、撈蜆，不過衣家好似冇咗呢個位置。 上網見佢做結業優惠，$188 per head 2.5 小時任食任飲 (另加錢任食醬油鮑魚醬油蝦，不過同行朋友麻麻哋，所以我哋冇加錢）好似話租約去到三月、四月。 我哋五個人坐一張六人枱，分配咗兩個爐，所以可以揀兩個唔同鍋嘅湯底。不過其實都有啲迫夾，因為枱面唔算好大，放咗兩個爐之後真係冇乜位置，尤其係當點咗嘅嘢食一齊上嚟嘅時候。 肉類嗰啲就用QR code , 跟住出邊都有啲熟食、丸類、餃子類、蔬菜自己夾。 普通品牌嘅雪條雪糕都任食。 Happy

14/1/2024 是日晚餐同朋友去食餃子 旺角一間小店‘ 三一餃子’ 我之前見IG 推介，都有bookmark 到，搵機會去食。 叫咗：火焰醉雞翼、炸雞軟骨、春卷、10隻湯餃子 （雙併: 黑白松露 , 蒜芯豬肉餃）兩款餃子都幾香喎、甘煮野菜。樣樣嘢都勁好食喎，仲每人送一杯清酒 （我哋淨係要一杯, 因為朋友唔飲酒） 初時我以為我會唔太夠飽，但係食完之後好飽😝😝 坐位吾算多，但坐得舒服嘅。 我覺得我會再嚟食㗎👍🏻👍🏻👍🏻👍🏻 我下次想試吓啲煎餃

近期大熱，打卡店舖 ： hashtag B 拿破崙千層焦糖撻 路過銅鑼灣店唔使點排隊，可能過咗出爐時間，行入去就咁都買到🤟🏻🤟🏻🤟🏻基本上入得去嘅人十個有九個都係為咗呢個撻而嚟。 職員話買三個以上就可以有盒同埋紙袋 我買咗四個 味道唔差，千層皮我都幾鍾意食嘅，好脆好乾身，不過佢整體甜過另一間人氣撻店 （bakexxxxx) , 但佢嘅甜唔係因為蛋香蛋甜，而係因為佢底層係有焦糖，我就覺得over咗。 我都係鍾意bakexxxxx多d 😬

19/2/2024 今晚去食韓燒大叔放題（用openrice book 位），$298 一位 另加一 （加$88可任食刺身、海鮮、任飲啤酒）不過我同朋友冇加。 一坐低會上8小碟肉肉 （有牛、豬、雞）（仲有牛👅，不過我同朋友都吾食，所以叫職員不用上。 出面自助區有大量不同韓式前菜 （本人最愛醃製魷魚、白蘿蔔粒、青瓜、醃咗嘅紫蘇葉）、用嚟燒嘅蔬菜、瓜類菇類。汽水 （ 汽水機，唔係一罐罐嘅。本身有少少失望，但係好彩佢汽水機出嘅嘢飲都夠氣同埋夠凍）、窩夫、自己唧嘅軟雪糕、泡芙。 其他韓燒嘅肉類、熟食就用QR code 點。 熟食都好多選擇，炸雞、魚糕串、煎蛋卷、炒粉絲、單骨雞翼、紫菜粉絲卷、김밥等等⋯⋯⋯ 肉類嚟講，我覺得唔算特別吸引，都係大路嗰啲放題肉類，唔會太差，亦都唔會太好（佢啲肉細細碟，可以試唔同嘅種類）。我同朋友反而係勁食佢嗰啲小菜、熟食😜😜 服務嚟講都不錯，侍應收嘢收得勁快。環境坐得都幾舒服，好多部大電視播Kpop . 好似四個人以上會送多啲嘢（我見隔籬枱好似送鰻魚、又有得抽獎抽到一塊肉）

23/2/2024 今晚gathering 團拜，好耐冇去南山邨品香樓了 一行六人，叫咗： 南乳雞翼、半隻風沙雞、椒鹽鮮魷、火焰牛柳粒（一上枱，職員會問我地準備好影相未🤣🤣跟住點火👍🏻👍🏻）、蒜蓉蝦蒸糯米飯、金銀蛋豆苗、一人一杯凍忌廉朱古力就梗咖啦👍🏻👍🏻👍🏻👍🏻👍🏻 味道同以往一樣咁好食、服務同以往一樣好忙但仍然keep 到禮貌、仍然同以往一樣咁多人，坐得有d迫夾，熱鬧。 埋單除翻開每人$160。抵 Ps: 只收現金

6/10/2023 我今日食咗個麻麻哋嘅下午茶。 本來諗住去大x樂食炸雞比，但sold out 😭行去美x快餐， 執咗笠😅😅 路過一間叫做和順記嘅茶餐廳，佢聲稱自己炸雞髀好勁, 係雞髀王，所以如果入去試吓。下午茶時間，得一兩枱客。叫咗個下午茶‘生炸女皇雞髀’，個名好有霸氣，所以都有啲期待嘅。 但係我覺得佢完全好似冇醃過， 隻雞髀夠大，仲好多肉，但係冇味，浪費左隻髀🙃🙃🙃薯條雖然冇‘林’，但係唔夠熱. 失望。🙈

31/8/2023 T3之下一個人唔知食乜嘢，諗起而家好多一人日式燒烤，所以去咗‘牛繁 ’ 燒肉。 自己一個坐，向住窗，每個位置都有格版，所以一個人都可以盡興，唔會尷尷尬尬，食得多食得少都唔會俾人歧視。 叫左 （$88）A3 200g (牛胸花、豬五花）、套餐選了泡菜、白飯要了大。另單點50g 牛橫膈膜肉 個人覺得牛胸花同埋豬五花都莫名地有少少‘蘇’味。反觀另外單點嘅牛橫膈膜肉就好味。我諗都真係一分錢一分貨。其實套餐啲肉唔好睇佢咁少，食落其實都幾知飽。加上我要咗大嘅白飯，食晒都幾飽㗎。