已經4-5年無寫過openrice，估唔到一間餐廳燃起我團火。話說呢間餐廳近朋友+就腳，望落野食好似好好咁，就試試啦。 我平時鐘意點一啲以為簡單但都會考啲功夫嘅野，試左個soft-shell crab Egg Benedict. 第一下賣相好似好好，不過望多一眼，已經知道呢個egg Benedict 係垃圾級別。 1. 兩隻poached eggs : 一隻"比較"正常，另外一隻蛋白完全硬，好明顯，無控制住邊隻蛋落水先，邊隻蛋落後。另外，啲蛋完全無蛋味，應該係平價野。 2. 軟殼蟹: 一睇就知個軟殼蟹顏色好有問題。第一，翻炸，仲要炸過火， 顏色已經唔好講，仲有一陣陣燶味。第二，本身個粉已經好厚，翻炸後已經變到一塊硬塊， 油益味好重。第三，有咩需要翻炸？一早整定好曬，唔新鮮嘅野，咁唔洗講，大家知道個蟹係咩味道啦？其實望一望個圖，可以以為自己食緊燒味鋪嘅半邊鴨，半邊鴨Egg Benedict 。 其餘最重要嘅係因為佢翻炸，炸過龍，厚粉又無逼返啲油出黎， 軟殼蟹以下嘅包完全變左一pat野。 成個碟上面最好味嘅係番茄，因為唔洗煮，新鮮。sorry，$148，只有幾粒番茄可以入口，其它都係垃圾，我一路食，一路擰頭。 另外點左個Earl Grey lemon cake cake到！起叉啦(經過Egg Benedict 之後，我已經完全零期望) ！！個頂乾到用叉輕輕一篤就已經成塊頂飛出黎，呢野我已經知道個餅應該又係垃圾，你知唔知咩叫dry？個餅就知啦！ 第一下入口，要問自己，我食緊咩味道嘅cake？呀Earl grey + lemon！sorry， 兩樣味道都無。點解呢？個頂已經咁dry，去到餅中間都係完全dry，完全無texture。唯一一個問題: 唔知件餅放左幾耐？點儲存？ 另外件cake有樣奇怪野，件cake中間有大約4粒完粒黑椒，點解會有嘅？(cake嘅野，你識條鐵咩) 總結所有: 第一次，都係最後一次，完全食緊垃圾。入去嘅時間係4.30，已經無咩人，竟然都可以整到咁，好明顯餐廳管理同quality control好有問題。

因為工作繁忙，好耐都無寫openrice，不過呢間野，完全將我團火逼出黎 話說今日想食吓拉麵，見到佢7拆減價又之前見到另外分店都多人排隊，就試試。 點左黑叉燒拉麵，同白豚角拉麵。 首先個白豚角拉麵，拉麵嘅湯好緊要，熱同濃，而呢度嘅拉麵，剛好相反。湯第一啖入口，以為自己食緊啲乜嘢醬油清湯肥豚膏麵，係，湯真係無咩味，反而有輕輕嘅醬油味。 咁又點解係肥膏麵呢？ 嗰嚿豚角一放入口，完全係覺得個口裏面只有一pat肥膏， 如果真係有好好咁煮嘅話，應該食落去係唔會覺得肥膩，而係結實，但呢度嘅豚角完全係覺得食緊一嚿無味嘅肥膏，同埋，呢舊嘢只有5%係肉。好嬲，咬一啖就掉低佢。 之後係黑叉燒拉麵，湯第一啖入口，只有黑蒜同輕微嘅醬油豬骨味， 唯一我會食得落嘅就係佢哋啲麵都算彈口。 兩個麵總結， 屋企煮即食麵應該會好食過佢，再講，食完之後，超級口乾！！！ 最後一提 ，呢度員工(無論普通員工同似經理嘅人)嘅服務態度都有問題，明白疫境令大家唔開心，但我完全感受到佢地好唔想做。 呢間野永遠blacklist。

個麵黎到，賣相真系100分，都超級期待個麵嘅味道。
第一下飲個湯，超級香喎，仲要好滑，不過再飲，就明白到呢種香係因為有好重嘅椰奶，唔係平時嗰種香料海鮮十足嘅香，所以真系美中不足。麵底都係米粉加油麵，不過米粉啱啱好，唔會過淋，又唔會過硬。之後到個香茅骨，好入味！！個香茅味完全爆發出黎！不過加加減減，始終個重點湯底帶左啲啲失望。 至於個咖喱牛腩飯，第一下食落去，都係普通啦，咖喱粉嘅感覺比較重，牛腩未撈好啲咖喱汁，見到有啲牛腩仲係一舊未有汁嘅牛腩，而整體炆得未夠淋。

順帶一提，呢度感覺衛生有待改善，見到筷子兜裡面嘅筷子有好多都仲係有積，甚至有啲有一pat pat未洗乾淨嘅野。

食後感: 喇沙算幾好，但又未到好，咖喱就可以skip啦

睇黃子華之前搵食， 本身諗住求其可以快靚正，點知食完之後，我就覺得竟然搵到間比較好質素嘅小店。首先係叫咗個鹵水大腸
第一下食落去，每舊大腸都完全畀佢炆到透曬， 鹽滷水嘅調味又做得十分之好，好味！！ 第二個就係牛筋拉麵
麵黎之前已經見到個師傅喺廚房裏面拎住就麵粉喺度拉下拉下咁，其實我感覺已經喺感官上有安慰，我之後發覺原來佢每婉麵都會拉一次，至少喺你面前拉嘅呢個小動作係加左分。
第一下飲咗個湯底先，個湯底因為加咗蘿蔔，所以非常之清甜，不得不讚嘅係個湯底嘅肉味唔錯，飲落去都比較好味
麵，輕微煙煙靭靭，咬落去啱啱好，同平時食嘅麵有少少唔同
牛筋做得十分之好！又係一樣地有心咁樣去炆得好林好透好入味
 食後感：好味！坐得都ok舒服。會再返去！順帶一提，可以試試下佢哋嘅辣椒油，幾香

一入去小店嘅時候老闆就好熱情咁樣招呼，一路做咗好幾個麵嘅介紹，亦都好大口氣講話啲完全係冇味精，真材實料，用咗好多骨同香料去淆個湯底， 仲要話保證飲兩碗都一定唔會口乾，口乾嘅話就搵佢算帳， 咁好呀，就睇下你有幾巴閉！？ 我叫咗個小辣紅油牛肉粉，第一下一定係飲咗個湯底先，驚喜，真係驚喜，好好飲！個湯底有少少香料、花椒、酸菜、芫茜等等夾埋一齊嘅味道，湯真係十分之惹味。之後就到牛肉，啲牛肉除咗有牛肉味之外，心機係完全明白嘅，牛肉炆到透左！超入味！
不過唯一一樣嘢係需要下次再試時食嘅就係個粉，而唔係食麵，老闆亦都介紹咗下次去到要試試佢哋個口水雞。好，睇埋你有無講大話先啦！？最後湯，我完全飲曬，過咗好耐都真係冇口乾！好耶！

最後要留意：湯底因為有油，所以先帶到鮮香味道，所以可以叫少油，如果唔係，都真係幾油（不過當然，味道又會有小小唔同）

 食後感：銅鑼灣寸金尺土，坐係比較迫，但當日去到因為冇乜人，所以都ok舒服，嘢食嘅味道同心機令我一定會再返去試試其他野。

黎呢度最主要係睇到啲叻沙同海南雞飯嘅相非常之吸引，所以先想黎試試嘅
首先係個叻沙
其實一嚟到賣相已經覺得非常之吸引！飲落去，個湯底十分之香口！好重嘅椰香同蝦乾味，個湯底好惹味！好回味！
麵方面，佢地加入左米粉同埋少少嘅油麵，咬落去唔單止咬口好好，同時可以索到個湯底嘅湯汁，呢個麵令人有驚喜！

第二個係海南雞飯 
個油飯味道算係ok，普普通通嘅味道，無咩好出色嘅油飯香。
雞唔知點解有一半係好嫩滑，另外一半係好鞋口，有一兩件都仲有少少啫喱，味道都係普普通通，無咩特色。
但不得不提，嗰三碟醬完全個味道就唔知點，豉油唔夠香，個辣嘅就唔夠酸辣，個薑蓉亦都唔夠薑味。 

食後感：叻沙比海南雞飯味道好得多，如果係要食嘅話，我只會再返去食叻沙。

順帶一提，下午茶係冇下午茶餐，係午餐嘅價錢

喺紅磡有好多其他嘢都食過，但係呢間就完全未試過，而我係中意拉麵嘅人，當然就去試試啦 我叫左個黑天王，配濃湯，硬麵
第一印象， 個賣相相當唔錯 ，但都見到個湯底完全唔夠熱。

首先講下最重要嘅湯底：第一下飲落去唔算有太濃嘅豬骨味，但可以接受，黑蒜味亦都唔算太出色，普普通通，唔係有咩特別嘅驚喜。

隻蛋都算係入味，但用左比較平價蛋，蛋味唔濃，流心都做得未夠好。

舊豚肉比較肥，唔算油，食落去都唔會覺得好肥膩，味道算唔錯。

麵方面，咬落去都好有咬口，麵都有麵應該有嘅味道，應該係自家作品。

最後要篤篤個蔥，蔥要切得薄先可以發揮功效，而呢個蔥，大細不一之如，仲要有啲係好大舊，加上個湯唔夠熱，個蔥咬落去生得好緊要。

最後順帶一提下午茶時間為三點至四點，所有拉麵都係半價，超值呀！

食後感：唔係咩太特別，都算係唔錯嘅選擇，如果下午茶時段嚟嘅話，半價就真係好超值！

見到有好多人讚呢間舖頭，當然想試一試啦。 首先係個花雕醉雞 賣相唔錯，啲肉亦都好靚，但賣相同實體成日都係有啲失落感，咬落去嘅肉質還可以，都算係有小小滑，但係肉反而唔太入味，需要額外用匙羹去淋啲酒上去先有一啲味道。 第二度嚟嘅係小籠包  個皮算係普通，裏面嘅肉咬落去，汁同肉質都算係普通，其實除咗講普通知外，我都唔知有啲咩其他嘢可以講  第三度嚟嘅就係個流心豬扒  一切開嘅時候，我其實都有少少興奮，因為個流心真係爆曬出嚟，但係一樣，食落去同賣相都係有小小差別，塊豬扒好似完全無醃過咁，感覺比較乏味，其實炸咗嘅嘢，應該乜鬼嘢都好食架？但呢個炸完之後嘅味道真係爭咗小小...... 最後就係個擔擔麵 一嚟到嘅時候我望到佢已經覺得有小小中伏嘅感覺，個湯底完全唔擔擔麵。食落去，個湯底竟然有啲花生味，不過以我係一個超食得辣嘅人都覺得個湯底過辣。最後，無論係湯底，麵，咩都好，都係普通嘅味道，無咩特別咁出色嘅地方。

食後感：全部嘢都係普普通通，喺呢一區嘅價錢嚟講其實算係ok，不過不失啦。

一間細細漢堡小店，坐落去有少少擠迫， 不過人流嚟得快去得快， 唔使點等就即刻可以有位坐。座位上可以自便紙巾同茄汁。
坐低之後就叫咗個芝士牛堡套餐， 等咗大約5分鐘到個漢堡同薯條就已經到。 第一下感覺，所有嘢嚟到都好熱辣辣，薯條超級新鮮炸， 第一下咬落去差啲辣親個嘴㖭，呢種咁新鮮炸出黎嘅薯條感覺已經好耐都食唔到， 我個人比較鍾意呢種比較粗身嘅薯條， 咬落去薯條味好重，有少少鹽調味。 黎呢度個重點係個漢堡，一咬落去，味蕾已經跳曬舞，抄返個經典對白：“好好味呀” ！個肉扒有牛味，juicy，調味都唔會太重而無左原本嘅牛味，個扒好明顯係自己人手搓咗唔同嘅調味落去，配搭嘅汁非常之惹味，個包完全唔似平時啲大連鎖店食落去嗰啲爛鬼包咁 ，成個漢堡，一試難忘，點知試左可能失常。
當我周圍望嘅時候，一路諗，點解佢哋啲肉可以咁嫩口juicy咁有味，原來佢哋有部慢煮機響度一路煮住啲肉扒，慢煮機可以將肉嘅纖維溶解，$50牛扒都可以做成$300貨仔，佢地一有客人order時就立刻放落去煎盤度煎幾下，個香味就已經可以出曬嚟。

食後感：有心之作，無論調味同肉扒嘅質量都做到非常好，性價高，一定會再去

帶頭盔先，我個食評真係因為我無好好睇每個openrice嘅食評寫咩而去食呢間野，原來呢間睇黎只係食甜品比較出色，無留意到拉麵唔係主打，都無留意到其他人已經一早警告定拉麵唔得。
其實去呢間係一心想去試試個拉麵，但第一啖試試個湯底，我真係食唔到啲咩味道，甚至覺得係xx一丁湯粉溝左好多水同奶而煮出黎，之後到拉麵，真係普通到無得再普通，流心蛋都唔係用靚蛋，所以無蛋味，最後個叉燒，唯一我覺得可以接受嘅地方，外面比較膿，所以有一陣肥香味。

不過講真，咁嘅價錢，想點呢？但sorry，真係接受唔到。

食後感：食完覺得。。。算啦，下次讀清楚其他人嘅食評先啦