牛大人台灣火鍋吃到飽 (荃灣)

打邊爐一定要去牛大人😋每次都必食極上和牛吃到飽套餐，因為咩都有得試哂，仲有得任食極上和牛，cp值都幾高😎


今次湯底揀左紅燒牛骨鍋，濃而不膩，肉類方面，有幾款新既肉可以點，包括S R F美國黑牛腿肉，牛味濃郁但唔會過肥，比較有咬口，而M5和牛卷同安格斯牛肉質就較為軟淋😙，呢度仲竟然有牛胸油，平時食火鍋，小編都好鍾意食，食落就好似一舊有咬口既肥膏
係咁encore仲有鮮甜既沙白、麻辣鴨血、老油條、滷大腸、墨魚漿，全部都好食🤤


出面仲有好多唔同蔬菜、丸同麵食可以拎，唔夠飽仲可以試下佢既滷肉飯，好有台灣既風味，飲品選擇都多，有汽水、冷泡茶等等🥰


價錢：$288（加一）1930前離座

The Farmhouse 咖啡廳 (北角)

早幾日同朋友去左食自助餐，見到呢間酒店做緊拉丁美洲主題，好吸引🤩


去到環境好闊落，員工服務態度好友善，坐低等左一陣就出去攞野食，首先係大家都關心既凍海鮮區，有好多款式，有麵包蟹、蟹腳、龍蝦、蝦、蜆、螺，小編最愛佢既龍蝦同麵包蟹，龍蝦肉質唔韌，而麵包蟹有好多膏，係咁encore😍


隔離就係日式刺身，最推介油甘魚、三文魚，仲有大大隻既牡丹蝦😋，都非常新鮮同肥美，沙律冷盤都唔少選擇，有幾款凍火腿、煙三文魚、芝士，有個位會有專人即整沙律，包括凱撒沙律、秘魯醃海鮮沙律同水牛芝士蕃茄沙律，三個之中揀左水牛芝士蕃茄沙律黎試，香而不膩既水牛芝士配上酸甜既蕃茄仔，好清新亦好好味😝


餐廳較入既位置係熱食區，有各式各樣既巴西同阿根廷燒烤（安格斯牛肉眼、帶子、香腸、大蝦等等）、粉麵、燒味、點心、印度食物，最特別係有多款拉丁美洲既食品，一定要試墨西哥薄餅同nachos，餡料豐富，再配上牛油果醬、酸忌廉同蕃茄蓉食，好夾🤣其他仲有啲印度羊架同燒春雞，都好惹味


甜品選擇都好多，而且賣相都好吸引，有各式各樣既蛋糕、曲奇、撻、布丁，最驚喜係有twist & buckle 即整既churros，竟然可以係呢度試到😳個雪糕櫃見到都好開心，好多種味道任你揀，雪糕既質感都好滑好濃郁

順帶一提，除左酒要加錢飲之外，其他咖啡、汽水同茶都可以任飲😎

新沙洞澡堂 (長沙灣)

呢度係以韓國澡堂做主題，好特別，有唔少既打卡位，仲有個燒酒牆，而且食物既賣相都幾靚，小編最想試就係佢個牛角包窩夫🤩


🐽 生菜包豬肉配自家製醬汁套餐 $458
套餐有幾樣野食，包括生菜包豬肉、炸雞半份、牛角酥窩夫同兩杯飲品，生菜包豬肉份量好多，豬腩肉都夠淋，可以用生菜包住啲豬肉、蒜、青辣椒、同蘿蔔絲，最重要係個秘製醬，夠辣夠惹味😝


🐽 蒜蓉豉油炸雞
炸雞要左蒜蓉豉油味，醬汁都幾濃味，蒜味好香，炸到外脆內滑，食完都好飽肚😳


🐽 提拉米蘇牛角酥窩夫
牛角酥窩夫揀左提拉米蘇味，淡淡既咖啡酒香加上煙煙韌韌既窩夫，一個好滿足既甜品🤣


🐽 雪嶽山
用黎打卡一流，味道有啲似忌廉鮮奶加梳打🤓


🐽 藍柑橘白桃梳打特飲
白桃味都幾重，甜度適中，幾清爽😋


🐽炸韓國午餐肉條 $58
外型好得意，係用返個午餐肉盒載住，餐肉炸到好脆，加上一個酸酸甜甜既汁🙈


🐽 Oreo味麻糬 $58
麻糬係加左3.6牛乳去整，食落好香滑，沾滿哂Oreo粉😆

火鍋堂 (旺角)

有間新開既一人一鍋都幾抵食同高質，個日去到全場滿座，想食既朋友仔記住book定位先😆


湯底有3款選擇，今次揀左麻辣湯同美人鍋雞湯，兩款湯底都唔會好濃，但咁樣反而食得出食材先鮮味🤓


肉類可以叫盛合或者散叫，小編想一次過試幾款，所以叫左個和牛盛合A同和牛盛合B，兩個盛合既肉大部分都一樣，都有美國翼板肉、西班牙黑毛五花、薄切牛舌 50g同醉雞脾肉，唯一唔同既就係A4和牛同極黑和牛牛小排 ，A4和牛油花同紋理都好靚，入口軟淋，而和牛牛小排肉味就濃啲，有咬口啲，其他既肉都好食，牛舌唔韌，醉雞肉有淡淡既酒香味，肉質唔鞋😄


另外，仲有多款$8配料，唔好見佢咁平，份量都唔少，有丸類、蔬菜，連烏冬粉絲個啲都有🤣，特別啲既仲有牛黃喉同麻辣鴨血，黃喉好爽口，而鴨血都有成5舊，配麻辣湯一流😋


雖然地方係細少少，但店員都好有禮貌好熱情，最重要係幾抵食，一個人都可以食多幾樣款式🤩

熊本牛鍋 (元朗)

今次去到元朗打邊爐，網上見到有間火鍋店，$298就可以任食澳洲和牛火鍋180分鐘，5點前或8點9後座仲唔使加一😍，呢個餐仲會送一鍋海鮮雞煲，而家元朗分店加$1仲可以任食雞煲，另外，頂級牛小排、其他配料、Dreyer’s 雪糕、所有飲品都係任飲任食😋



和風海鮮雞煲好足料，有鮑魚、蝦、蜆、雞件、豆卜、金菇、蕃薯同紫薯，醬汁見到十分濃稠，好夠味但唔會過鹹，鮑魚同蝦都好爽口彈牙，幾新鮮，雞件都好入味，最特別係有蕃薯同紫薯，完全冇違和感🤣

食完雞煲就換湯底打邊爐，揀左個沙爹湯，估唔到湯底咁濃郁，仲有好多花生粒，真係真材實料😍，澳洲和牛同牛小排都encore左好多碟，見到肉既顏色一啲都唔暗啞，紋理都幾靚，有牛味，而牛小排仲帶啲肥肥地，好嫩滑😋，小編仲叫左一碟牛白肉試下，平時都冇見其他地方有得食，口感有啲似煙煙韌韌既脂肪咁


出面既配料選擇都多，除咗各式各樣既丸，仲有好多款蔬菜、豆製品及粉麵，推薦既仲有粉腸同鵝腸，新鮮又唔會韌👍🏻


最後梗係要食埋甜品，呢度有Dreyer’s 雪糕同泡芙，三隻味既雪糕我都覺得好好食，有士多啤梨、芒果同曲奇😝，飲品都係任飲，除左普通既罐裝飲品，仲有兩款係自家製既樽裝，包括夏枯草同冰糖紅棗雪耳，可以清下熱

整體黎講，都會再去呢間餐廳，環境夠闊落，可以慢慢食足3個鐘，而且價錢都好抵食😎