原來，上一次寫食評已係2020年懶了一陣子，依家要重新出發，努力搵食，努力筆耕~ 今早因有事要過黎銅鑼灣，一直也想試呢間既早餐。前兩次黎都係下午茶時間，人好多，坐得滿滿的。我是被焙茶鮮奶所吸引，再次幫襯。 今早9點幾，全店無人，店員親切的打招呼，真係名符其實既good morning。早餐有bagel, salad bowl, 種類唔算多，都係單點，無set. 叫了個牛油果酸種麵包配溏心蛋，再加我既至愛焙茶鮮奶 (轉oat milk加5蚊)。食品賣相一流，食指大動! 份量唔算大，女仔我覺得介乎輕食至飽肚既份量。 牛油果好味，麵包配了酸甜的醬汁，不會過鹹。溏心蛋用小兜裝住，方便進食時漏汁都唔會太論盡。 我自己好喜歡個溏心蛋汁，有微酒味，香甜。反而蛋外面有點硬，略為過熟。整體而言，都係上乘水平。焙茶鮮奶走甜，好夠茶味，依然係我至愛 美好一天，由美味早餐開始

好耐無寫食評lu...同好多香港人一樣, 大家呢半年都努力抗疫, 少左堂食, 多左外賣。既然係咁, 都要努力筆耕, 去支持一下飲食業 
我除左係一個蜆肉意粉控, 其實都係一個魚湯怪黎架~好鐘意食魚湯米線. 呢期wfh, 都發掘下附近既外賣, 今日試左呢間既公主米線, 讚之前都有試過呢間, 但淨係叫比目魚米線, 有諗過想叫呢個公主米線, 但好驚佢魚片同帶子係勁細粒, 份量又唔多咁, 所姒叫成條既比目魚好似有D保證...值到睇到openrice呢度既師兄師姊有post 到公主米線既相, 見到份量都OK, 於是先敢試 (證明post 相既參考值真係好大架)
今日終於叫左, 一打開, 賣相好靘, 4塊厚身既比目魚, 全部煎過, 啖啖肉, 仲有兩隻帶子, 都係厚身同有鮮味, 配埋西蘭花同埋少少菇,  餸個面積係cover曬D 米線, 所以份量係足夠! 女仔黎講, 我本身唔算細食但覺得好夠, 食完唔駛食下午茶果種.
魚湯係佢賣點, 我覺得好夠味同夠濃, 喜歡濃味朋友可以一試. 提一提係如果外賣, 因為時間耐點, 食時不妨先攪勻個湯, 因為個湯都有D香料 (胡椒等)係底, 今次我就係未整勻就食, 感覺前段有D淡, 食到最後就太濃. 魚湯量都好夠, 我將小碗魚湯倒曬落去有餸大碗, 都仲剩大約1/5 (如圖), 唔會食食下因為米線索曬D湯搞到無湯
另外, 佢杯檸茶都好味, 有茶味同濃, 不過因為公主米線無餐, 要半價加(13蚊), 相對附近一般既茶記lunch 套餐, 係貴左d. 成個餐連野飲, 自取74蚊, 米線黎講都算中至高價,  未必會時時食...但質素好.
下次隔一排再黎幫襯, 再睇下水準有無走樣先

今晚同老公試下呢間，星期六晚7點，有訂位見店內都有點full, 入到去都有少少bar既感覺比佢既二人餐吸引住388 set for 2, 有最想食既豬手同龍蝦汁海鮮意粉，一於叫先~ 頭盤係煙三文魚沙律，兩份一碟上，有兩塊都大既三文魚連菜，份量都充足。個汁係芝麻醬，佢落唔多都係圍住個碟邊，唔會好傑咁。 餐湯係薯仔粟米忌廉湯，飲得出係自家製有薯粒 口感幾好，又唔鹹。跟住到主菜喇 先黎既係龍蝦汁帶子海鮮意粉。帶子煎得香，半生熟，但得三粒。其餘海鮮係tiny size既魷魚仔居多，個汁調得幾好味，size初時覺得細，但黎埋豬手就覺得岩岩好。 主角出場上碟時感覺份量都好足，食落去唔鹹，易入口，大部分皮都好脆，部分就有點硬。肉質唔乾，真係好唔錯 有點可惜係個甜品窩夫…店員特意話係即做所以要等，結果等完個窩夫係微暖，仲要係硬的呢樣要扣點分… 不過整體而言，以佢既價錢同食物質素，絕對合理

今日同老公仔過開黎灣仔，終於都試到呢間用蝦湯做湯底既拉麵期待左好耐~ 平日夜晚7點幾，都算大半滿，我地兩個坐係窗邊，舒服~店員耐心介紹，超讚結果我揀左蝦湯，老公揀左豬骨湯，都點了店員超級推介的飯團。 上麵了~我個蝦湯沒有失望，鮮蝦味，好香，老公加埋豬骨的都唔錯，飯團都好食。麵質方面偏向似油麵，我個人就比較鐘意食幼身的 印象中唔太多係純蝦湯底拉麵……所以如果喜歡蝦湯底朋友可以一試，大滿足 我會再來~加埋豬骨就感覺似出面一般的豬骨湯底，下次試埋

今日放工後再過呢頭做野，上次黎過呢間食個黑蒜拉麵，仲有木耳，食過番尋味，今次過黎試下佢既原味白湯先 上次蒜勁有蒜味，食完後成晚既蒜味都好勁今晚要對下人講野，所以唔可以咁大陣味點了原味白湯拉麵(78元)，加埋木耳同溏心蛋(各10元)，埋單係98蚊唔駛加一。 上麵了，第一時間飲啖湯。濃味，帶點鮮，如果唔郁佢過一陣會有d"琼"左係度，不過我諗豬骨湯大多都總有點膩。 要讚既係溏心蛋，大大隻，好入味，溏心得黎好平均。我食左兩隻，都係咁好食，水準穩定。木耳同上次一樣，都係用醋先醃，平時拉麵店既木耳大多無味，一定要浸入湯連湯一齊食，呢個木耳我就咁唔送湯當小食都一流。 呢間又榮登我係炮台山區既 "to eat list" 咯會再來。

諗住有得訂位，星期六晚同老公黎呢度試下西餐除左拉麵之下，我仲有個宏願就係可以試唔同既蜆肉意粉，都係我既favourite黎架 訂左檯，安排左我地坐係角落頭靜靜地，環境唔錯。期待已久既蜆肉意粉竟~然~無~貨咁惟有轉海鮮龍蝦湯意粉，職員再話要轉寬條麵，我地再追問先話原來意粉都無… 其實本身餐廳已唔多選擇，得三款意粉可以揀，依家連意粉都無，真係有點失望。我地另叫左菇沙律，味道ok但size好細。 老公既卡邦尼不過不失，我既海鮮寬條麵好失望…200幾蚊一"碗"，得好少海鮮，汁唔夠濃，蝦是梅的，不好吃。 不會再來

今日放下午假，又係一個人食拉麵既黃金時候咯千揀萬揀，揀黎威靈頓街呢間略有文青味道裝修既拉麵店，上openrice睇到佢既白湯麵係signature, 今日特登黎叫個大size試下先 餐牌我無影了，可參考其他飯友既相片，都好update點了特大size雞湯拉麵，上菜喇~ 咦，原來係三片肉片係大size, 麵同湯個size我覺得同其他一般size應該無乜分別^^"。 一啖試下個湯先，濃而有味，我都忍唔住飲剩好少。 讚下佢塊肉先，我見肉邊係有黑椒，用心醃的表現，肥瘦均勻，係我食咁多次拉麵覺得最好味既一次。其餘跟來的半隻蛋比較tiny，麵質比較硬，有部分未分開，是有癡住一舊的出現，要扣點分。 值得一提的是，其他拉麵店多數都有唔同調味料，但呢間係無的。我估佢應該係想客人試真d佢地既真味道 總括而言，可以一試，再試呢就有其他相類既選擇咯

係呢頭做完野，要發掘下d美食慰勞下自己先見到呢間cafe門口有花藍(原本以為新開張，後來先發現原來佢有小型畫展開幕)，誤打誤撞撞左入黎 佢有tea set, 68蚊任配一杯野飲，共有8款食物可配，有牛油果炒旦多士，有三文魚炒旦，亦有蛋糕或tiramisu. 我叫左一杯意大利泡沫咖啡，同埋牛油果多士。咖啡就有點濃，唔似平時既泡沫咖啡; 食物份量大，多士好脆，炒旦都香滑。 係度hea左一陣，裝修都幾簡約舒服，以呢區係大學區黎講，價錢都ok呀 唯一美中不足係佢地無低因咖啡。我對咖啡店要求都高，如果有感覺圓滿一點

轉眼又結婚一周年喇今年想同老公仔去下香港一日遊，於是就過左黎珀麗灣食呢間餐廳既自助餐。身邊朋友都食過，個個都話呢間幾好，係交通淨一d。終於等到今日過黎試喇 職員安排左一個好靚，可以睇到汲水門大橋既位比我地個view真係無得頂! 加上位與位之間比較寬敞，坐得好舒服，環境好大，自助餐範圍都闊，仲有戶外既燒食物區添(初初我地無為意，但見人地一碟碟羊架咁拎住，爭d miss左) 6點已可入坐，615正式開始! 好豐富喔以佢400幾既價錢，我覺得食得開心，質素也佳。先講凍盤，有蝦，青口(兩款，一款普通另一款係法國藍青口)，田螺同埋長腳蟹。除第一隻長腳蟹較鹹外，其餘都鮮味，最緊要係唔~駛~迫同排隊…感覺好舒服。另外刺身都有五款，有三文魚，吞拿魚，喜靈魚，鯛魚等，刺身我試過就覺得一般，但勝在比好大份我 熱盤有少見的田螺薯蓉，三文魚頭(呢個好入味，好好食)，又有魚，燒味，豬仔骨，又有意粉檔，師傅整意粉時最後會係個超大芝士輪度轉一圈，幾 特別 甜品有火熖雪山，即整的梳乎理同埋pancake, 大滿足 以佢價錢，環境同質素我覺得性價比好高! 回頭值高

結婚一周年，同老公黎左珀麗灣住左一晚，今日臨坐船出番去之前黎左呢間近碼頭既韓式小店食埋lunch先走，睇佢餐牌set lunch唔貴，有湯，泡菜，主食，都係49起。 我同老公分別點了韓式粉絲連飯餐(59蚊)同燒牛肉飯團卷(49蚊)，份量比想像中大一點，都夠食。個炒粉絲好香，我個牛肉卷其實都好食，不過賣相(個別件)就真係差左少少^^" 但勝在多，環境也舒服，可以對住個海食一個60蚊樓下(不過要加一)既lunch, 都係幸福既小幸