龍島美食店(銅鑼灣)

一直都想找機會試下龍島的朱古力產品, 於偶然的情況下得到openrice所送的$50 coupon, 心急得立即到網站看看有關介紹。很快便鎖定目標為杏仁爆谷朱古力$78, 但去到又可能有變卦呢! 店員很大方的讓我試食, 試左朱古力脆片和原粒杏仁朱古力, 差點兒又想轉。 但最後還是不為所動, 堅持要爆谷朱古力。

朱古力用錫紙袋裝住, 為數不少, 每粒都被朱古力包著, 名牌子的朱古力果真名不虛傳, 該是黑朱古力, 有很強的after taste。 裡面的是焦糖杏仁和爆谷, 香脆可口, 甜而不膩, 焦糖亦無黏牙的感覺。集多種口感於一身, 很易令人吃過不停。作個比較後, 覺得雪過後會更加滋味。

小樽甜品屋(元朗)

在友人家bbq完又轉場到這裡吃糖水。 人多有個好處就是可以多試幾款。見到在場的侍應全是後生女, 穿上短裙, 但又不見得食評所講好寸看不起人, 坐低都有講歡迎光臨, 有不清楚的地方都會主動問。

雪花冰: 冰底大約$23, 另加配料$2-3, 生果$5, 揀左牛奶冰+朱古力醬+花生芝麻碎+芒果+蜜瓜+紅豆。一入口大家都覺得有陣怪味, 好似益味, 應該係花生芝麻碎作怪吧! 牛奶冰只是一般, 無太多奶味, 其餘配料都無問題的。

咖啡仔$14: 有兩件, 賣相很可愛, 是人形的咖啡果凍布甸。 由咖啡果凍和布甸相間而成, 感受到咖啡的甘香, 只是果凍較實, 幾彈。

木糠豆腐布甸$16: 用手搖下個杯, 見佢震下震下就知道軟滑啦! 豆腐味好濃夠突出又不會太甜, 很清新, 木糠即係餅乾碎, 又幾夾。

旋轉甘露$20: 六枝試管放在轉盤上, 有三種口味。我們就利用這個盤決定要哪種味。我試左石榴露, 杰杰地,吃到果肉, 但不夠凍。還有兩種味分別是楊枝金露和士多啤梨。

椰皇燉蛋白$28: 選了凍食, 椰皇外殼畫左公仔的, 個頂開左但會放回。椰皇飲得多, 想不到用來做糖水效果也很好, 燉蛋白滑得直入喉嚨, 啖啖都充滿椰香和奶香味。

本高砂屋(日式草餅)(銅鑼灣)

行完sogo超市, 循例又四周逛逛, 行到去本高砂屋的櫃位, 見到有幾款和果子,本來都想買的, 但又怕無法當日吃完,只好選購了一個黑銅鑼, 包裝夠型格, 黑白色, 另有傳統的紅豆蓉口味, 用左紅白色包裝袋。習慣未吃先聞一下, 很香甜的蜂蜜味, 蛋香就不太覺, 咬下去可見多個洞洞, 質感很軟又綿密, 富彈性。內餡為黑芝麻蓉和紅豆粒, 麻蓉很綿滑, 但偏甜, 紅豆粒夠稔。兩者都算配合, 吃慣傳統口味, 不妨轉下款式。

思甜餅店(元朗)

其實上次到雲貴軒吃米線時已看見這間餅店, 但無細看已匆匆離去, 直至看到食友yan的極力推介後, 趁出開元朗時順道又買兩件回家。

蛋糕款式不算太多, 都較為大路如朱古力蛋糕、德國芝士、tiramisu、藍莓芝士等, 只是$8-10, 十分經濟, 當然size比正常的約少三分一, 都好的, 可以一次過多試幾款嘛! 賣相平實不花巧, 看著它們就像在看到自己所整的蛋糕呢!

隨意地挑選兩件, 只用麵包袋裝著, 都有些擔心會否破相。

紐約芝士餅$10: 又選了我的頭號至愛, 約有2吋闊。整件餅都呈淺黃色, 和早前在食評看到外邊帶焦色的有所出入呢! 入口已感受到濃濃的芝士香, 不會過份甜膩, 實淨中又帶點鬆軟, 不會死實, 算幾幼滑, 只是稍為軟身, 較易黏口。消化餅底做得對辦, 夠鬆脆又帶少咸正合我意。

朱古力千層: 買餅後無即時回家, 回去一看發現蛋糕已溶掉, 只有一邊可示人。 尚且看得出豐富的層次, 面頭的是朱古力脆皮, 其下是朱古力蛋糕和朱古力醬, 蛋糕鬆軟, 但我嫌太過濕潤, 朱古力依然突出, 不太甜, 反而有點甘甘地。

平心而論, 雖然味道並非十分出眾, 但以這樣的價錢來說已是值回票價。記起鳳琴街也有間同名字的餅店, 見所賣的款式和價錢, 應該都是同一分店吧!

湘川滬(天水圍)

自去年湘川滬進駐嘉湖銀座後, 可算是多個搵食熱點。 多數都是挑選下午茶時段光顧, 二時開始, 但差不多時候已有人在等位。 直至三時, 人潮仍然不絕, 皆因選擇夠多而且不昂貴, 小菜、冷盤和粉麵飯一律半價, 另外又有多款上海小點和中式點心。

小籠包$19/四隻: 吃上海菜必點的, 可惜皮較厚而且不夠韌度, 肉汁亦不豐富, 肉餡還可以, 水準一般, 不會再翻叫。

雞絲粉皮$19: 粉皮爽滑, 不會疊埋一舊, 與麻醬和青瓜絲拌勻來食, 夠哂香口, 只是麻醬太杰身太漿口, 容易漏。

叉燒酥: 酥皮夠鬆化, 一層層的, 還是微暖, 叉燒餡份量剛好, 無太多肥肉。

流沙奶皇包: 見到流沙二字雙眼就會發光, 很期待流出來那刻, 奶皇餡不算太流但勝在有咸蛋黃味, 不像一般奶皇包只是吉士, 可惜包身不夠鬆軟, 一咬就痴牙。

糖醋魚塊$29: 配料和煮法十足十生炒骨一樣, 甜酸汁加上雜椒、洋葱和菠蘿, 魚塊炸得十分脆口, 粉上得薄, 內裡的魚肉仍然很嫩, 不會乾身, 夠入味。

上海炒年糕$24: 年糕厚薄度剛好, 口感煙韌很彈, 配料和上海粗炒分別不大, 都是椰菜、冬菇和肉絲, 炒得夠香又不會過咸, 吃罷碟底亦無留下太多油。

茶芥$6/位, 要留意煎炸點心好多時過左三點就賣完, 要吃的話就要早點去了。

小甜谷(大坑)

在大坑吃過晚飯後, 又順道到訪人氣爆燈的甜品小店, 本身不喝牛奶的小妹卻又極愛奶類甜品好像燉奶、奶凍、布甸等等。 店子選址於僻靜的書館街, 人流不多, 唯獨小店依然熱鬧。 時值六時, 店外放了幾張摺檯, 相信是為了應付晚市。既然這裡以3.6牛乳作主打, 當然要點些相關種類的甜品啦!

特濃牛乳燉蛋白$25: 點了熱的, 所以要等一會才有。以瓷杯盛裝著,配上一隻木匙, 造型很和風呢! 雖然未喝過3.6牛乳, 但味道真的比普通燉蛋白濃厚得多, 蛋白燉得滑溜之餘卻不會水汪汪, 滑得似要在匙上流走。 甜度很輕, 更能突出牛乳的鮮味。

荔枝奶凍$27: 原味的奶凍奶味濃郁, 夠挺身, 荔枝肉爽口清甜, 但相對較為淡味。

不少人認為只是明星效應, 但單靠這樣總不能維持下去, 始終口碑最為重要, 相信小甜谷也深明這個道理, 在食物上下功夫, 不斷鑽研新出品, 所以絕對有再訪的理由。

萬豪咖啡室(金鐘)

揀左某周六去試下tea buffet, 本來訂四樓the lounge,點知滿左但可以坐高台, 都照訂啦! 又訂埋五樓。2:45pm去到, 原來所謂的高檯並不在coffee shop範圍, 要入去好似間bar, 比較黑和暗, 而且得我們和另一檯人, 那幾位就在傾偈飲野,感覺似被隔離左, 想搵人斟水收碟都難。 行返出去問下有無得轉台, 話有會幫我地轉, 係咁講者, 轉唔轉都無人知。但又死心不息, 話有位會打來。再上去五樓等侯,夠鐘還未打來, 都要入啦!

五樓環境和四樓折然不同, 係一般coffee shop環境, 比較局促, 不像四樓般開揚, 檯與檯之間隔得超近, 完全聽到人地講什麼, 兩個人真是坐兩個人位, 張檯又細, 走廊又窄, 侍應收碟時都會碰到你。buffet時間較短, 3:15-5:00pm, 到4:30pm有人會提你,$210/位。如在四樓, 星期六的buffet時間較長, 1:00-6:00pm, $250左右。

放食物的地方真是不大, 幾迫, 中間放甜品,不同種類的食物都在附近, 所以人多時都要等。

頭盤:

自選沙律:配料普通, 有番茄、粟米、青瓜、羅馬生菜、菜苗、橄欖、芝士、煙肉, 醬汁都有幾款, 但係無牌根本不知是什麼醬汁,要自己估
螺絲粉沙律:幾惹味
豬頸肉沙律:泰式風味, 酸酸辣辣
鰻魚壽司, 仲有北寄貝、腐皮蟹柳、紫菜卷
即切刺身:有師傅係counter即切
蟹柳沙律漢堡包:想不到漢堡包配沙律都得,幾清新
麵包:可以塗牛油和果醬, 果醬係細細個樽仔
薄脆:無食,聽聞4樓好似有芝士醬點呢!
墨西哥粟米片


熱盤:主要是小食, 煎炸野都幾多

生滾粥:揀左豬潤、花膠和碎牛,粥底已經有味, 都幾綿,花膠粒幾有咬口, 數量都不少
肉腸意粉:幾彈牙, 但淡味
豬頸肉:又係淡味
甜酸齋:夠入味
花膠鯪魚肉:花膠幾稔wor, 又有咬口
珍珠雞:公仔仲好味過佢,似係就咁用微波爐叮熱,糯米乾硬
鮮蝦粉果
山竹牛肉球:打開個爐見到賣相麻麻地, 但都諗住一試,切開一睇, 紅色的,雖然牛肉生都唔怕, 但都不敢試,出去拎野時見到廚師, 佢即刻切開粒黎睇, 話係咁既, 如果要熟可以再整
串燒雞:配埋個沙爹醬好惹味
炸帶子盒:即炸的,好脆,出第一次和第二次個樣唔同左,之後出的係無左層脆皮, 得返粒細細的帶子
三文魚粟米pizza:薄批底, 但批邊好硬, 要用好多牙力先咬得開
炸蝦卷 :好似腐皮卷, 但包住鮮蝦餡, 幾彈牙,加埋甜酸醬仲好味
炸雞翼:淡味
日式餃子:一般,不夠脆口
車仔麵counter:有菜、麵和餃

食左兩輪咸點之後, 食下甜品間下場先,老實講, 選擇真是不多,款式比起上次朗豪, 只得十多款。所以要試勻都好易,切餅都有幾款, 賣相唔算太吸引精緻 , 比較簡單, 細細杯的mousse得一款,無tiramisu、果撻、朱古力噴泉這些基本食物。

即整窩夫:可配果醬、cream、朱古力醬、杏仁片、脆脆片、雪糕,外脆內軟, 蛋味又香
豆腐花:有點鞋口
蘋果酥:出左一次就無出
芒果西米露
chocolate mousse cake:幾滑, 朱古力味好香, 不太甜
不知名撻仔:用把刀切落去面頭個粒東東, 即刻凹左落去, 食到好似莓之類, 仲食到忌廉咁
blueberry cream cake:味道一般
椰子熱情果mousse:賣相係半圓形, 白色個d係椰子味的mousse, 鬆泡泡咁幾得意,黃色係熱情果夾心, 酸酸地
無糖低脂芝士蛋糕:見到無糖好有興趣試下,食落口,好甜啊! 無咩芝士味, 似吃一件無咩味的蛋糕
精選芝士餅 :類似new york cheesecake質地,芝士味好濃,無餅底, 好滑, 實中帶鬆軟, 好正, 要再添食
開心果芝士餅:開心果蛋糕底, 上面層mousse無芝士味, 仲好香精味, 幾難食
提子切餅:好鬆軟,牛油香但不膩
藍莓鬆餅和合桃鬆餅:試左藍莓個隻, 幾鬆軟, 又有不少果肉
提子鬆餅
燕麥提子曲奇:幾脆口, 仲好似吃到黃糖味
特濃朱古力餅:好似brownie, 外層脆脆, 裡面好濕潤又好嚼
多款生果:用冰鎮住, 夠凍,愛菠蘿, 酸甜多汁
朱古力撻仔:怪怪地味, 好似混左莓落去, 只食到酸味, 好漿, 好稀, 好易漿住個口, 撻皮又不脆

其實還有其他食物無列舉出來, 但整體水準都是一般而已。無想過只隔一層, 分別可以如此大。大多甜品賣相都比較普通, 無fruit tart、tiramisu, $210/ 位無論環境還是食物都係不太值,下次還是去四樓,地方寬敞之餘又有花茶。

鳳城酒家(銅鑼灣)

趁著周六的半日假約了媽媽到鳳城飲下午茶, 2點開始, 特意預早15分鐘等位。 起初只有幾個人在等, 其後人數愈來愈多, 幸好能準時入座。 坐下隨即忙著剔選點心, 除了蒸炸點心外, 還有小食、炒粉麵飯、糖水糕點等供應, 實在難以取捨。奈何二人食量有限, 最多只能點五樣。

錦鹵雲吞$38: 因太耐無吃十分掛念, 明知會很熱氣但偏要點。上檯時看見汁料水汪汪似的, 和以往的濃稠狀分別很大, 配料有叉燒、肉片、番茄、洋葱和青椒。雲吞皮就很對辦, 炸得通透很多細洞, 拿一塊沾些汁, 掛不到汁在皮上, 反是浸稔了。 於是叫侍應來看看, 問可否退回, 她表示要問過經理, 隔左一陣, 聽見一把勞氣的男聲並說:「係咁稀啦!佢唔鍾意咪退囉!」

懷舊魚翅灌湯餃(特點)$21.8: 製法和平常的不同, 是正宗的做法, 以蒸籠裝著, 非以湯浸餃, 反而是餃包住湯汁, 心急地咬一下, 結果燙損了舌頭。餃皮薄身但不易穿和濕爛, 餡料有蝦,爽口的東東似是竹笙? 魚翅都吃到的但份量當然不多。

懷舊鴨腳扎(大點)$17.8: 與平常的差不多, 同樣有鴨腳和豬肉, 只是芋頭被火腿取代了。人家都是為左芋頭才叫嘛! 難道懷舊就是這樣?

千層馬拉糕(中點)14.8: 每次飲茶都會叫一樣蒸的包點, 馬拉糕算是常客吧! 鬆軟富蛋香,有彈性, 面頭有幾粒欖仁, 奶皇餡甜而不膩。

紫金醬牛孖根(大點)$17.8: 以牛筋作點心很罕見, 又好奇想知紫金醬是什麼, 只知道很惹味, 牛筋炆得夠稔唔硬, 入味。

花生芝麻蛋散(小點)10.8: 取消雲吞之後再加的,這個甜點我吃過一次就愛上了, 炸得鬆化不過油, 吃過沾糖漿和煉奶, 覺得還是前者較配合, 混合花生芝麻椰絲, 口感確實豐富。

過往惠顧都是下午茶時段, 有機會都想試下晚飯, 但聽講正宗的鳳城只得旺角和北角兩間店, 鍋貼明蝦、炸鮮奶固然有興趣, 但講更為吸引的卻是西米焗布甸呢!

大同老餅家(元朗)

每次到元朗總要到大同買些手信才安樂。 雖然都不外乎是皮蛋酥, 但實在令人回味。 這裡的酥餅都是放在焗盤上讓客人自行挑選。

蓮蓉皮蛋酥$4: 另有加了紅薑的豆蓉餡, 但因小妹不愛吃薑所以選蓮蓉。 酥皮鬆化, 底部也是脆脆的不會濕透,真的要很輕手拿著, 以免弄散。內藏四分一隻皮蛋, 蛋白焗過後也不會乾硬得像橡皮一樣。 至於蓮蓉質感幼滑得似醬一樣, 不會又乾又實, 甜度適中,很容易就吃下一個呢!

老婆餅$3.5: 又買個和恆香的比較一下, 餅皮同樣香酥薄身, 只是內裡的餡未能得我歡心, 只吃到黏黏又帶煙韌的糯米糰, 完全沒有糖冬瓜、芝麻的香氣, 被恆香比下去。

見很多人都買了一袋四件的雞仔餅$16, 但因本身喜愛吃軟身, 對這種脆硬身的始終未敢嘗試。雖然老婆餅令我極為失望, 但看在皮蛋酥份上,還是會給個笑臉的。

Main St. Cafe(旺角)

還記得小妹上回講過要挑戰巨型芝士餅$42嗎? 講得出做得到, 知道家人要到朗豪坊, 即刻落單並叮囑要小心翼翼以免將蛋糕毀容。 滿心期待的接上手, 真的很重, 用個磅磅下, 無花無假, 接近成磅重, 又用把尺度下, 高度8cm, 長度13.5cm, 闊度8.2cm, 餅底厚1.3cm。外表十足十一舊巨型芝士呢! 單看已經極為震撼, 當然無辦法一個人吃光, 就找媽媽幫幫忙。

食前再雪返硬身會更美味, 入口已嚐到濃濃的芝士味, 蛋味亦同樣出眾, 質感貫徹紐約芝士餅般偏實淨但亦軟滑, 入口很creamy, 不會三幾口就覺得膩。 餅底都是勁厚, 但好像無以往咁脆口,至少用膠叉都輕易拮開, 其咸香正好中和芝士的濃烈。基本上吃左大半後都有些飽意, 但愈食愈滋味, 不願意收口。這次挑戰算很成功, 得到的滿足感亦很大。若在逸東酒店的main st. deli點這件蛋糕, 好像要近百元, 現在算很抵了。還以為經此一役後會暫時對蛋糕,特別是芝士蛋糕興趣大減, 怎料第二天又心思思想吃甜了。

Jean-Paul Hevin Chocolatier(銅鑼灣)

小妹一向對超甜的餅食都敬而遠之, macaron素來都給人甜到漏的感覺, 因而未能吸引到我。某日行經JPH, 眼見七彩顏色的杏仁餅整齊地排列著, 終敵不過誘惑, 隨意挑選了四款口味試試。 六個起才有盒裝, 現在只能用膠袋再加紙袋包裝。

焦糖乃黃加啡色的組合, 本身不喜歡拖肥味卻鍾情於焦糖那獨特的幽香, 朱古力和焦糖醬融合在一起, 不會過份甜膩, 值得推介。

最穩陣的口味可算是黑朱古力吧。厚厚的朱古力夾心極為濃郁, 不太甜反而有些甘味, 四者之中最愛這款。

一向都愛果仁味, 又挑了開心果味來試試, 綠加啡色的組合, 有陣陣果仁香, 但較淡味。

本想試紅莓味但又無貨, 選了芒果, 嚐到很香甜的果味, 但未必一吃就分辦到是芒果。

以往接觸macaon都是蛋糕上面的裝飾, 記得antique和fine foods的是外面脆裡面煙韌, 而JPH的都是一樣鬆脆, 內裡軟軟的很濕潤, 但就不夠煙韌。最近上網看到有關食評, 價格已由最初的$15脹至$20, 只可久不久才試了。突然有個構思, 一次過買回來LGB, antique和Le Salon De The & La Boutique的macaron, 慢慢細味之後再作個比較, 想像得到會幾咁興奮呢!

有益甜品(元朗)

之前那餐還未完全消化, 又蠢蠢欲動想吃甜品。 本打算去甜夢舍一嚐心太軟, 但在鳳琴街轉了多個圈仍找不到, 只好轉戰到同樣感興趣的有益。店子面積不大, 室內只有三幾張圓檯, 這天不太熱有陣陣涼風, 坐外面較為舒適。 之前看過食評, 得知糊類較多人推介, 所以又點來試試。

腰果糊加湯圓$19: 剩腰果糊則$14, 最近吃得最多的糖水都算是這款了。端來時看見有煙, 但食下去發覺只是暖暖的, 已在心中扣了少許分數, 腰果味不夠突出, 只吃到有很香的果仁味, 還以為店員搞錯, 拿來合桃糊呢! 質感夠幼滑,不會漿住喉嚨, 不過甜, 見到有一粒粒的物體, 似是落獻時不均勻, 大大影響了口感。另加的湯圓有三粒, 粒粒都很飽滿挺身, 皮不是超薄那種, 吃得出是人手搓製的, 皮很滑身, 煙韌得來不黏牙, 芝麻餡做得不錯, 有芝麻粒粒的口感又有油香, 少許流質的狀態。

馳名薑汁燉奶(凍)$14: 另可選擇熱的, 賣相看起來無大問題, 面頭有層薄薄的衣, 可是嚐過後卻發現質感太杰身, 感覺到似吃糊仔, 奶味很濃, 亦吃到薑味, 但太甜, 可算是難吃, 吃了幾口就要放棄了。

過往吃糖水極其量都是不好吃, 難吃就很少遇到, 所以無辦法不給予低分數, 或許真的點錯東西吧! 希望再來的時侯會正常一點, 但這個下次不知又是何時呢?

新順興潮州滷味專門店(元朗)

每次路經又新街, 總會看見新順興門口排了一條長人龍, 心裡不禁會想:「值得排如此耐嗎? 都是吃名氣而已, 滷味都是離不開那種味道吧!」坦白說, 對它是有種不屑的態度。早幾日又行經時, 又是慣常的站滿人, 我這刻竟然有衝動去輪侯, 或者是太好奇想知道有何吸引之處吧!

滷味的種類都是常見的內臟如豬耳、鵝肝、粉腸等, 另有豆腐$6/件 蛋$10/3隻, 鴨舌$12/兩。剛想落單時, 才發現鵝翼賣光, 要等十五分鐘, 唯有乖乖的在等。 之後再排過, 今次竟然又輪到無豬腸。 結果, 加起來要接近三十分鐘才能成功買到所買的東西。

小小一盒要$48, 真的不便宜, 滷水汁和酸醋會另用一個小袋裝住。眼見師傅只將滷味切好就放入盒中, 盒內無一滴滷水汁, 還擔心要另外再下才會夠味。

頭號至愛豬腸$60/斤: 可買一條$10, 豬腸多是頭段部份, 中間卻無太多肥膏, 很乾淨, 但不失肥美甘香; 尾段部份有很多摺, 一層層的增強咬感。滷得夠入味, 隱約吃得到花椒八角的香味。

鵝腎$6/個: 切成厚片, 富咬感, 夠稔但爽脆, 咬開亦不會成一絲絲。內裡都很夠味, 不用再加汁。

鵝翼$18/特大: 另有細隻$6和大隻$13, 肉質比較韌, 幾痴骨, 不夠入味, 難咬開, 無太多肉吃。

墨魚$7/兩: 一點也不韌, 很愛這種既軟稔又有點爽的口感, 浸過滷水汁不會淡而無味。

經過這次後, 真的要收回「純粹靠名氣」這句話, 味道是怎樣, 始終要試過才可下定論啊!

金暹邏泰國菜館(天水圍)

放假時如果無去街, 就會到樓下的商場來頓下午茶, 這間泰國菜館永遠是我的首選。 價格與茶餐廳和快餐店相若,甚至是更抵呢! 小食、湯粉、炒粉麵類都是$19-24, 配凍飲、糖水或特飲不用加錢, 全日更不用加一。地方夠闊落, 不用和人迫, 坐耐一點也不怕。

炸魚餅配薯條$19: 兩塊切開成四件, 見到滿是綠色的香葉和葱粒, 香料味重, 吃得出檸檬葉和香茅的味道, 稍為蓋過魚味, 魚餅炸得香口不太油, 熱辣辣, 如果可以再彈牙一點就更好。薯條是粗身波浪形, 又是剛炸起, 無灑上鹽, 薯味不重, 較粉, 但都收貨了。

雞絲湯金邊粉$19: 發現每次來的湯粉都不太夠熱, 雞肉切成一塊塊而不是絲呢! 無咩味道, 有點鞋口, 湯底有少許雞味。 金邊粉幼身爽滑, 但嫌煮得未夠時間, 稍為硬身。

椰青冰: 有一小塊椰肉, 像椰青加水一樣, 幾淡味

椰汁三色冰: 只找到紅綠兩種色的粉條, 甜甜地又幾爽口

始終下午茶所供應的食品和晚市有些微分別, 較為港式, 正宗與否不得而知, 但味道真的不差, 而且很划算。就看看何時有機會來吃晚飯吧!

川味美食(荃灣)

辣癮突然又起, 正好去試早在名單之上的川味美食。 雖已過三時, 但仍有不少客人, 約有十張檯, 坐得唔迫頗為舒服。別看餐牌有八款粉麵選擇, 簡單來說只有兩種: 熱拌(花生、炸醬、葱、芫荽、芽菜)和酸辣放湯(酸菜、炸醬、葱、芫荽、芽菜), 可選配河粉、米線、紅薯寬粉、紅薯粉條, 辣度大致分為不辣、小辣、中辣、大辣, 餸另加$3/$4。

熱拌粉條加豬潤、大腸(中辣):$15+4+4: 不會太乾爭爭,粉條也沒有黏作一團, 將所有配料拌在一起才吃。 第一次吃粉條, 彎彎曲曲的, 晶瑩剔透, 入口煙韌彈牙, 要費點牙力才咬得開。 辣汁都能附在粉條上, 偏向濃味, 卻不會很油膩漏住喉嚨, 有不少花椒粒, 辣得夠刺激, 令人流鼻水。 豬潤夠爽口,不韌, 無押味。 大腸則用滷水煮過, 很入味無肥膏, 有嚼勁。碗底的芽菜是精華所在, 索盡辣汁, 咸咸辣辣的, 愈吃愈噴火呢! 一碗粉份量十足, 單靠一人之力較能吃清光, 眼見其他人都吃剩不少。

酸辣粉條加腐皮(中辣)$16+3: 都是自己擺烏龍, 應該點寬粉。 入口先吃到酸味, 心不禁想:「不是辣的嗎?」但多吃幾口後才發現好戲在後頭, 辣味開始滲出來, 或許有酸味中和了, 放湯的相比乾撈清一些, 調味較輕。 腐皮太薄身, 還是喜歡一層層有咬口一點。

黑豆漿加$5: 枝裝, 見招紙寫住香港製造, 有豆味又不太甜, 只嫌不夠凍。

每當吃過辣後, 胃部總是暖暖的, 感到十分滿足。紅薯寬粉或要等到下次再試到了。