阿一豬扒酸辣米綫 (筲箕灣)

上星期六放工, 同老婆食晏, 老婆介紹左呢間阿一豬扒酸辣米線。

老婆: 豬扒麻辣米線（大辣）
我　: 豬扒麻辣上海麵（大辣）

米線及豬扒不過不失；麻辣湯味道一流，勁麻的湯底，令整個胃口大開。

不過可惜我叫上海麵，上海麵唔爽口，粉粉的感覺，千祈唔好叫。

壹碗麵 (北角)

同事介紹, 話幾OK, 咪食晏一齊去。

食左蝴蝶腩撈濶條麵。
蝴蝶腩, 我個人口味比較鐘意較淋的牛腩, 同時佢無咩味。
醬料方面都係麻麻地。
濶條麵方面, 麵質OK, 係手拉, 同時麵質好濶, 出面好少食到, 但係麵條唔夠爽口。
可以一試。

第二次再去試食﹕
食左肥牛麻辣QQ麵
都只係麵條方面比較可取, 肥牛無咩特別 (我亦無期待), 麻辣就一D都唔OK, 我已經叫大辣, 但都唔係好辣, 而且一D都唔麻, 實在可惜。

總評:
午餐食茶餐廳 食得悶的話, 都可以一試。

傷心鵝掌門麻辣火鍋 (大角咀)

麻辣湯底一流, 酸酸辣辣, 十足十傷心酸辣粉一樣。如果有朋友覺得唔夠辣的話, 仲可以額外加一碗辣調味料, 加入湯底又得, 加入自己碗豉油又得, 辣到無朋友。

可惜食材尚有改善空間, 食物唔夠新鮮。

新幹線刺身外賣專門店 (深水埗)

食過一次就上穩的特肥三文魚, 脂肪奇高, 不過忍唔住每個星期都要食一次。

薩莉亞意式餐廳 (荃灣)

先由入坐安排講起
星期六晚上七點九到達, 門口人山人海, 諗住立即到門口登記, 誰知道是自助方式登記。門口有一本登記簿, 登記簿上有號碼, 你只要自己在登記簿號碼旁上寫上姓名及人數, 之後等人叫號碼便可以入坐。這個入坐方法一看就知道有漏洞...... 我地又怕淤, 怕同時間有人一齊應個Waiter, 所以我地就睇返之前miss 左的號碼, 衝入去同Waiter講話我地個no. 過左, 之後佢睇一睇返就同我安排入坐。

平價意大利快餐
打開Menu一睇, 嘩! 超平, 仲平過大家樂。點左:
意大利火腿芝士沙律 - 濃郁芝士 + 清新生菜, 醒胃可口。
意大利菜湯 - 太淡, 比茶餐廳仲差
什麼什麼意大利包 - 鬆軟好味, 我唔鐘意食包都覺得好食
卡邦拿意粉 - 看上去好Cheap 好Pure , 但食落去味道都唔錯 (將價就貨, $22不要要求太高)
米蘭風味芝士飯 - 簡直物超所值。到City Super 買一包芝士飯返屋企煮都要$50, 佢呢個焗芝士飯有濃郁芝士味之餘, 又有鮮甜的茄汁肉醬, 缺點係太(漏)同太過邪惡, 有膽固醇高的朋友要忍忍口。

總結
好評 平價、味道好
劣評 食物賣相較Pure, 餐廳管理差

如同一時間有Pizza Hut, 意粉屋及呢間餐廳一齊, 又唔駛等的話, 我都會選擇呢間<<Saizeriya Italian Restaurant >>。