Paul Lafayet (銅鑼灣)

銅鑼灣半年一度的盛事，當然要參與一下啦！講的當然是SOGO感謝祭。

由放工6:45開始行，直到10:30，收獲當然豐富但係肚就打緊鼓。但其實餓左咁耐已經餓到冇乜胃口，所以便去朝拜老佛爺。

10:50到達，店員目無表情但仍然是有禮的告訴我們10分鐘後關門(熱切期待收工的心情我完全理解)，所以我們只叫了2個creme brûlée堂食，快D食完唔好阻人地收工啦。

面層是仍是脆脆的焦糖，但略嫌厚了一點，但味道有點失望，個蛋好淡，唔夠味，既唔夠蛋味又唔夠vanilla味。友人的用詞是很"稀"，唔夠實，感覺似唔覺意倒左D水落去(CREAM都有奶味呀)。唔係唔好食，但冇以前咁好食囉。

亦又可能是我以前食開尖沙咀鋪，這次是我一次食銅鑼灣鋪，質素/味道有分別掛......我下次都係幫襯返尖沙咀好了，因為我上2次係尖沙咀食都冇咁既情況。

丼丼屋 (旺角)

因為曾目睹那條由1樓排至地下的人龍，所以提早一點吃午餐。11:00到達，但原來要11:30先開門，所以在附近閒逛了一會。11:25再抵達，成為那天的第一枱客人。(其實第2枱都是在不久後到達。)

叫了出名的親子丼，咖哩豬扒丼，玉子卷，燒鯖魚，最後加了1個雪糕。

親子丼/ 滑蛋雞肉丼 真的好好味，雞肉幼嫩，蛋汁份量、生熟剛好，調味汁味道一流(我口味偏甜)。一個親子丼應該有的都有齊，蛋汁&調味+日本米飯的口感，混和後的味道叫人停不了口。唯一缺點︰份量太少，轉眼就見底。

咖哩豬扒相比之下就沒有那麼出色，其實都唔係唔好食，只是親子丼太好，另一個便沒有那麼好了。豬扒炸得出色，不太油，而且豬扒有一點厚度，口感好好，但我覺得豬扒好像不太入味。咖哩不太辣，但不是甜甜的那種日本咖哩。整體上來說也是很好吃的。

玉子卷OK，但我比較喜歡甜甜的玉子卷多一點，我覺得味道有點不足。而且不知是否太早師傅未準備好，玉子卷有點(很少)燶，你會見倒少少啡啡的在中間，吃起來便不夠軟綿，有點太乾&過熟。

燒魚好食，燒得夠香，是真的有點腥，但魚有點腥我覺得是正常的，始終不是新鮮魚，你又要連皮燒，又沒有濃醬汁，有點腥正常，而且是在可以接受的範圍。

總結︰好食，又唔太貴，會再次幫襯！

麻布茶房 (旺角)

近來實在非常喜歡團購，每天不團不舒服。話說早前麻布做團購，$70一個套餐，又湯又麵又小食又甜品又飲品，在自覺很抵的情況下便很快的團了。

團購要早1日BOOK 位，BOOK 位完全冇難度，早1日BOOK就OK，8:00 入座，場面冷清 。(所以咪冇難度，我坐近門口那邊，餐廳中間的4張枱由我們到達至走都冇人坐過。)

我們2日叫了2個湯，1個蝦餃子，1個可樂餅，1個海老烏冬，1個豬軟骨石鍋飯(?)，1個燒蕃薯雪糕，1個葛軟糍豆腐布甸伴雪糕(好似係)，2個飲品，甜品飲品後上。

餃子OK，可樂餅係紫菜芋頭餅(同預期有出入)，烏冬OK但個湯頗油，蝦連殼但有腸。到此為止除了份量少D以外都仲叫OK。跟住飯送到，個飯完全係唔夠味，我地要問攞鹽，個飯其實係似石頭飯，都係用熱既石鍋上，但係底既唔係飯焦，係又濕又燶。

我地食完以上咁多野準備食甜品，由於日本餐廳一如以往的有頗多碗碟，我地又因為SHARE要多左碗筷，弄致一枱都係餐具，所以我地咪叫服務員幫我地收曬D野上甜品。我地分別同唔同人叫左2次收野，答案都係我一陣來收，但直到甜品到都係冇人收過，最後我地要好似砌積木咁自己疊起所有碗碟放埋一邊。

2個甜品都唔得，明明麻布主打係甜品，但係2個甜品都令人失望。個雪糕唔好食，非常唔滑又唔夠結實，溶得頗快，再加埋佢個超假的士多啤梨糖漿，難食。葛軟糍好一點，個豆腐雪糕很濃豆味，但係個軟糍同紅豆超甜，甜度高得會令你的口腔感到難受。

整個套餐最好的便是那杯咖啡，是即磨咖啡，味道一流。

總結︰連加一整個套餐要差不多$100位，完全唔抵食。而且我也應該唔會再幫襯這間餐廳。

Mazazu Crepe (銅鑼灣)

見出了柚子味雪糕，手上又有團購，當然是立即試下啦。買了一個香焦朱古力+柚子雪糕(+$3) =$42

一試就覺出事了，不好吃。其實買的時候店員已經同我講CREPE 比較襯牛奶雪糕，但柚子新出我當然係要試下啦，所以堅持己見要柚子。結果就出事啦，因為佢個皮本身已經係冇乜味，又冇蛋味又唔係好甜，佢又冇乜cream，但係柚子雪糕就頗為「澀」，質感又唔滑，係sorbet 的質感，所以完全同個crepe唔夾。所以LEE個配搭係完全不可行的。

我下次都係要聽話，要返牛奶雪糕把啦。

福元湯圓 (紅磡)

湯圓是的最愛之一，見這間有甚多的好評，便專程的來試湯丸。

2個人叫了2碗芝麻湯圓和1個糖不甩。先來糖不甩，它的粉團不是圓形而是日式那種"金錢形"(我相信大家應該明掛)，然後給你一包粉自已撈。這間的糖不甩可以說是我食過最難食的一間，首先粉團不"煙 UN"，那個花生粉唔花生，味道給椰絲搶了，可以用冇乜味來形容。

算，我是為湯丸而來。到湯丸出場，第一粒覺得好味，因為芝麻餡很"流"，完全完全是湧出來，那感覺很好。雖然薑水既不薑又不甜，但遇上甜甜的湯丸時它已經不重要。本來好好的，但當友人說了1句後我便發覺問題所在，他說他吃到"葷"的味道。聽罷當然是吃第2粒試試，果然是吃到"葷"的味道，而且覺得很"漏"很油。到第3粒，已經不想再吃了。

當然要流心豬油是少不免，但量似乎也太多了吧。在味濃的芝麻下仍然食得到"葷"味相信已不是一般的量了。