去年11月曾一個人路過此店，過了食飯時段人不多，地方很大，舖向著海（但就算坐窗邊位置都看不到海，要坐高檯才可以）。店內擺放很多意大利雜貨賣，因為當日還有事情要做，沒有認真逛就坐下。叫了個Bolognese肉醬意粉，飲了個latte，當時有一位意大利人招呼，很殷勤，食物味道也很地道，雖然不是驚世美味，但我覺得有機會可以再次幫襯支持。 事隔半年，週末近黃昏時段一心約朋友來喝喝咖啡聊聊天，然後直落吃晚飯，怎料遇到截然不同的體驗。一進去有位亞裔侍應男子表示要掃安心XX，我和朋友手機都未有安裝相關程式,向男子索取登記表格，該男子立即以很兇很兇很兇的眼神和不友善的身體語言揮著手，向我們說 “No QR code, you can’t come in”。上次光顧時我肯定店方有提供表格給我填寫，於是我們再次向他索取手寫登記表格，他仍然很斬釘截鐵地說”No, no, ONLY QR code! Only QR code.” 假如他講中文，隔著口罩我也感受到他當時的態度就像小時候古裝劇集裡面的白鴿眼掌櫃，一邊fing住白布一邊說「過主啦你地，呢度唔做你生意呀！」一樣。餐廳歧視不懂使用高端的手機程式的客人還是其次，服務員無禮傲慢的態度才是趕客。 既然此地不歡迎人，自有歡迎人處，我們轉身離開，堅尼地城好味友善的餐廳多的是。臨走時，我見到第一次那位意大利人在水吧，相信以後都不會再見了。

一個人在星光大道跑完步，在此歇腳，嘆杯啡吃個輕午餐，順道欣賞我城世界知名的維港景緻，有山有水有鳥兒歌唱，心情特別舒暢。天氣好到不行，不冷又不十分熱，找個半露天座位，叫了冰拿鐵和周打帶子蜆湯，坐了好一會。作為美術館附設的咖啡室/海鮮吧，食物水準和選擇尚算合格。食具雖是膠製和配即棄木刀叉，但整體頗有設計感（特別喜歡冰咖啡以搪瓷麥克杯盛載）；價格雖不便宜但勝在環境舒適，沒有一般博物館餐廳的局促和扮野感覺；適逢假期遊人頗多，但餐廳一點都不擠。這個五一長週末看不見煩人的拖gip黨，也沒有吵耳的大媽團，連隨處蹲、煙駁煙的阿叔們也不見，放眼只見自律地戴著口罩出來鬆一鬆的香港人，也有零星的日韓、南亞裔和外籍人士路過，當然少不了少量操普通話的人，總之來這店people watch一下確實很不錯。自從香港美術館完成重建工程後都沒有到訪過，下筆當天防疫限聚令仍在生效所以無緣入內參觀，只能幫襯cafe部分，但很慶幸知道這店的存在，日後多一個悠閒放空看海喝咖啡的好地方🙂

知佢地有幾種口味既梳乎厘，飯後與友人黎到叫左個比較有特色既芒果味，另加蘋果脆脆(apple crumble)。

先上檯既係芒果梳乎厘，外觀正常，算不錯。食第一口，感覺偏甜，但並唔係一般砂糖既甜，係人工味道既甜，感覺似食左粒好cheap既果汁糖，而且係有after taste果隻。跟住無端端食到有陣熱情果味，心諗，我唔係叫左芒果味咩？我的確係叫左芒果味，而且餐牌根本係無熱情果味選擇，但係我肯定當時我口中食到既並唔係芒果味。我本來以為自己只係無食真個味道，但連食兩啖，點解都仲係熱情果味(台式珍珠飲品果隻味)?食多幾羹後，見到裡面變水，食外圍仲係泡泡既部分就少D熱情果味（當然亦無芒果味）。呢個時候我反而開始食到淡淡蛋香，但係好可惜，配上果一陣無芒果味既"果味"，非常唔夾，而且越食越甜，梳乎厘又毫無質感，我確定左我對佢既評語係: ＊好＊難＊食＊。我一向對梳乎厘都係來者不拒，但係呢杯係我有生以來第一杯用難食黎形容既梳乎厘，亦係第一次有2個人share都無法完成1杯份量既梳乎厘（只有4吋直徑）。

未完，服務員遞來蘋果脆脆，我好快咁放入口，因為好想將之前那陣疑似熱情果糖漿味蓋住，嘩，點解...好似有騷味既? 脆脆曲奇粒比例上係有D厚，因為蘋果切得好細粒。而肉桂味道與甜味其實算ok，但上面既曲奇有好重既牛油味，不過一D都唔香，而係好勁騷! 我朋友唔喜歡肉桂，所以最後主要係我食晒d蘋果，剩低大部分曲奇粒。

簡單講，呢兩個原本無咩難度既甜品，size已經好的式，但佢地都有本事可以令兩個專登黎食既人無胃口食晒 (我地並非無野好做求其搵個地方坐下果隻，亦非之前食得好飽)，我只能講，真係好失敗，殿堂級失敗。

約左一位朋友聚舊，星期四晚，想搵個環境舒服d傾到計既地方，醒起有次經過此店飲過咖啡，印象不錯，位處尖嘴鬧市卻人不多，於是兩天前致電訂左7:30檯。 我響公司忙著，一時忘記約會，朋友準時到達，我遲左20分鐘，入到餐廳全部坐滿人，與友人寒暄一番，到差不多8點至正式點菜。 餐牌上菜式主要係"法式"菜，但大部分看上去都有d港式西餐廳風範，而價錢就比x寶石波x頓之類貴d。 叫左杯紅酒，一個烤沙甸魚share，朋友叫蜆肉意粉，我就要鋸扒medium rare，那個好有x寶石老伙記feel既中年男侍應用中文同我確認係咪3成熟，我話係。坐到8:40，除左兩個餐前麵包同杯酒，全部野都唔見影。我地好多野傾，原本唔多覺，只係開始有d餓，所以四圍望下d野出得未。發現旁邊一檯6人檯(全女班)，當中只有4人食緊，一個已差不多食完，其餘未有野食既二人很鼓噪。我朋友話佢7:30坐低時那6人已叫晒野食，即係話，人地叫左野食個幾鐘都仲未黎齊，我地開始心知不妙。 過左5分鐘燒魚終於出場，味道還過得去，只係唔明有咩需要烤45分鐘咁耐? 不過睇見隔離檯兩個女仔既慘況，我地總算有野落肚，唯有唔出聲慢慢細味，反正唔趕。期間第五個女仔既青口到達，我聽見同檯其中食完主菜既一位向侍應催促餘下最後一個主菜仲有甜品，侍應話佢叫左春雞，餐牌上寫明要等咁耐云云。果6個女仔聽見眼都突埋，但係又無佢辦法，只怪自己唔睇清楚餐牌(我無深究餐牌到底係咪真係寫住要等1粒鐘，但我覺得有無寫都一樣,都係咁荒謬)。最終，我朋友同我既菜分別響9:00同9:05到達，而隔離檯隻雞應該大概係響我地兩碟之間上菜，我偷望果六個女仔塊面都燶晒，原本咁既出菜速度會令我好不滿，但見到隔離d女仔，我覺得我已獲優待。 撇開上菜速度，我個"3成熟"牛扒最後出黎至少有7成熟，而朋友個意粉明明看上去白晒晒原來好鬼辣。我同朋友都好懷疑當日廚房係咪唔夠人或者個爐壞左，一男一女侍應全程都係無事忙(因為廚房根本無菜出)，地方已經不大，男既淨係識得響廚房門口騰出騰入(但10次有9次都無野拎出黎)，女既就一直對住櫃檯上印左出黎既單紙係咁對，既然無出過菜，都唔知有咩好對。到我地埋單離開時已經9:30，隔離班女仔仲等緊甜品，OMG!

本人母親曾推介此餐廳既咖啡和意粉俾我，但每次經過，見店面窄窄人多多，裡面又唔似可以坐得舒適，一直無入去試既機會和衝動。直至昨日回家路上，想起家裡無人，在不願自己煮飯既情況下，決定鼓起勇氣一試。一個人，伙記安排我坐廚房門口個雜物架旁既二人檯，後尾有個阿叔入黎又係一個人，故被安排同我搭檯，以此店格局，我都預左。 我叫左"蘑菇煙蠔意粉"，跟餐有薯仔忌廉湯仲有意式咖啡同甜品(我選吉士蛋)。最初伙記唔記得俾湯我，所以意粉先到(又係果句，茶餐廳格局，無所謂)。其實上菜速度都幾快，湯無咩特別，至少唔似罐頭，稍嫌佢用咖啡杯上，跟隻茶匙用黎飲湯感覺好怪。至於個意粉，雖然唔係我食過最好味既意粉，但以咁既價錢同格局，其實水準真係幾高! 個汁係有番茄味既忌廉汁，濃而不稠，spaghetti意粉熱辣辣唔淋身，好明顯係現煮即上，入口順滑有咬口，煙肉塊咸脆適中同個汁好夾，至於幾粒煙蠔，味道似蠔豉，幾特別，加埋兩塊番茄同蘑菇片，感覺好完整。我見對面位果位阿叔個忌廉煙肉意粉，看上去同我個粉差不多，只差個汁係白色同埋無左煙蠔同番茄，應該同樣入口順滑(略嫌唔似正宗卡邦尼亞汁咁稠身)，應該都唔錯。 整體份量尚算足夠，我全碟清晒。個咖啡同甜品屬中上，成個餐可以滿足晒我對晚餐既所有需要，非常平民抵食，未係回味無窮果隻，但比市面任何茶餐廳甚至連鎖餐廳或港式西餐廳果種流水作業既味道都要好，絕對值得我再黎幫襯，支持誠意小店!

冒著膽固醇卡路里同上升之險叫菠蘿油，無非都係想食到牛油在熱辣辣既包裡面半融吾融既狀態，同埋又鹹又甜又脆又軟既果份過癮，但係黎到壇島，對吾住，以上講既全部都俾吾到你。 可能週六下午茶時段吾算多人，無新鮮出爐麵包，不過仍然抱有一絲寄望個包可以係至少熱。波蘿包黎到，望到佢既乾且冷，面頭既酥皮仲係軟淋淋的!我於是問夥計可否稍微叮翻熱佢，烘熱一下都好(已經吾指望佢會脆)，等牛油至少可以融翻少少丫嘛。佢粗聲粗氣兼不耐煩地話"我地吾翻熱!"(無尾音)。遭一口拒絕，我惟有硬著頭皮咬落去。中間夾住那片牛油，係無鹹味果種，凍凍一片，咬落去包還包，牛油還牛油，簡直如同楊修之死中既雞肋--食之無味棄之可惜，最後都係頂吾順抽起舊牛油淨食菠蘿包，因為佢實在太違背菠蘿油既原則。 同檯友人叫左蛋撻，都係凍，但至少味道還可以，我對住個包，浪費左quota，覺得非常後悔。惟有在此高聲呼籲: 到壇島，勿叫菠蘿油! 事實上，咁簡單既菠蘿油都做得如此馬虎，我覺得佢地真係好無誠意。下次就算係第二個時段我都吾多想再幫襯。

環境﹕
一進去看見人很多，有中、大學生在開group meeting，也有大夥小夥的OL在沙發位置邊聊天邊喝咖啡，吃飯的主要是二人情侶。

由於餐廳是以快餐形式點餐，又沒有人帶位，以為要等位等很久，原本想走(實在很抗拒要站在人家的桌邊、用希企的眼神等待人家離開讓位)，此時卻有一位態度誠懇的侍應過來打招呼，建議暫時與另外一對剛坐下來的情侶“共用”一張4人桌，待附近那檯看似吃完的客人一走他便讓我們搬檯。在猶疑間，突然後面有2人離開，侍應便趕忙招呼我們坐到那邊，結果找位子的過程出乎意料地順利。

食物﹕
我們點了大蝦意粉與叉燒煎蛋飯，意粉的味道與外表一樣，不特別也不難吃，可取是意粉不會過熟，大蝦則略欠爽勁，算是不過不失。友人原本想叫漢堡包，但是剛剛售罄(鄰桌還在吃呢!真倒霉)，所以唯有叫叉燒蛋飯。唔...不是很差勁 (大XX快餐店水準以下、屋村茶餐廳水準以上)，只是如果有其他選擇的話我還是建議不要點。至於咖啡，原本這裡走的是cafe路線，作為咖啡精的我應該要試試latte之類 (看上去不錯)，不過叉燒配latte總覺得格格不入，最後只要了普通咖啡，沒什麼值得講。

結論﹕
總括而言，若下午來與友人閑聊喝咖啡或吃個下午茶應該不錯，佈置蠻有心思，地方尚算舒適，價錢亦十分相宜，而且附近除了Starbucks外便沒什麼好選擇，不過這裡最大問題是很嘈吵，很多很多學生、很多很多OL，想舒適安樂地吃頓晚飯，還是到走遠一點找好了。