之前因為工作關系，久不久都會來吃腸粉，因為腸粉皮薄款式特別粥又靚，蘿蔔糕的質地又很合我胃口。
但自從沒有米豬蓮師傅後，這幾個月來吃的次數真的一隻手都可數得出了。腸粉沒有以前的滑，皮沒有以前的薄，那還能做招牌嗎？不知這米豬蓮的名可以維持多久呢？！
我在想，可取的，是不用等位吧......

來到圓方，唔知食乜好，見到有夏麵館就無諗過一支箭同老公入左去，因為我地多年前開始凡去上海都會食，係香港經過就二話不說去幫趁，因此今次都不例外。

2:30，不用等位，我們點了嫩雞煨麵和黃魚煨麵，還有燻魚。

先來我的嫩雞煨麵。一望已經大打折扣了~~
麵質太淋，湯色不濃，餸太少。
食落口，麵淋到"無朋友"，一定是煮過時，未食過夏麵館有咁淋嘅煨麵
這間的湯不像平時其他店的濃湯底，其他店一飲便知是落足料 & 夠時間來煲的....

跟住來老公的黃魚煨麵，亦是大失所望~~~
那麵質還比我那碗淋得多，是淋到一夾起便會碎那種真的未食過咁差的麵。
此時老公跟一位阿姐說為什麼這麼淋？！阿姐只拋下一句：煨麵係咁架喎！便走去了.... 這是什麼態度？！
以為我們是第一次來吃的遊客不知道嗎？！ 真是人都癲！
我試了一口他的黃魚湯，嘩！得腥啊！平時食的是很濃很香的鮮魚味，宜不得快快飲了全碗湯，但是這碗？！唉~~~~~~

那個燻魚最後來，仍是不滿，那個汁太淡太稀了，魚是脆脆的，叫做可以搭夠囉....

我不知是將貨就價，還是那裡太多內地人所以要求低呢？！
總之大失所望！
以後不會來這間夏麵館了~~

星期日一早8:00起左身，諗起電視介紹過西貢有靚粥，心血來潮叫老公入去試，因為老公係粥癡，屋企一帶d粥鋪又執晒笠，老公發夢都想食粥咁我就諗住滿足下佢啦....

泊低車行過去剛好9:00，橫街窄巷左穿右插，好難搵，問路人，只係知正街大約位置...結果我們都行錯路，好在村口俾我見到有個地圖，行多一次，好不容易先搵到....
門口好多人排隊，店裡面又坐滿人，我地裝左一陣，見原來門口d人係排外賣的，我地就zip入鋪搵位了，因為無人得閒招呼你，問你幾多位....。見到有對公公婆婆剛食完起身，即刻坐低，結果唔洗點等位

鋪面好細，但人好多，好逼，一百尺多的鋪面，d人可以逼埋坐大概30人
鋪面只見有一個阿姐煮粥，一個阿姐拉腸粉，一個阿姐執檯轉菜落單....
大家一d都唔好期望有什麼招呼，連問你食乜都唔會，你落單的話請大叫你要乜野吧，仲要講好多次，都唔知有無人聽到，無人會應你的....
但好奇怪，d阿姐原來係聽到的，而且好好記性你叫左d乜...

我地叫左兩碗艇仔粥，因坐在煮粥阿姐前，所以直接同佢落單，碗粥好快送到，其他叫傳菜阿姐落的，個個都係度催
拉腸粉阿姐做唔切，我地追左好多次炸兩同蝦米腸都無來，粥都差不多食完了，所以索性叫條炸麵就算了，就係食緊炸麵的時候，見到腸粉阿姐再開漿整腸粉，我估因為之前賣晒啦，所以腸粉同炸兩都無來，我同老公心諗，千祈唔好來呀，好飽呀，因為炸麵好大條，又勁多油，真係飽到呢~~~
呢個時候，腸粉真的來了，我地本來想扮唔係，但個阿姐鬼咁好記性，話：你地叫左一碟，你地先...又對搭檯果pair話：你地果兩碟黎緊，好快
咁我地唯有照要啦...唔好睇阿姐落單時唔應你，原來佢心水好清架，記性又好....
我地再諗，炸兩千祈唔好黎，千祈唔好黎....我地拿拿聲食埋d野，計埋數俾錢(費事阿姐忙得滯要計數找錢)，呢個時候，阿姐話炸兩到，因為我地剛起身了，另一檯見到，話：呢度呢度...好在多人叫大家爭住要咋，否則真係飽死

出到門口，見到老公大汗dup細汗，我個頭皮也是霧汗了，涼風一吹，爽呀~~
粥鋪度只開風扇，無開冷氣，大家如果食粥係會滿頭大汗的，記得要揀天氣涼又無咁多人嘅日子先好去呵，否則真係好辛苦！

總括來說，
艇仔粥，足料，粥底真係有米的，不似外邊用粉開的，質地都算OK啦，不過，返到家都覺口渴，應該是有味精的....但老公呢位粥癡，話寧願去海x粥店好過...
炸麵，新鮮脆口，不停賣完係後鋪又拎新鮮的出來，我估裡面不斷有人炸緊，但超勁油，又大條，兩人叫一條都好飽....
蝦米腸(細)，算叫夠料，但一d都唔滑，同個朋友檔腸粉鋪仲有一大段距離...

我本想食牛脷酥，但因為大飽無試，佢去得好快，賣完就無，唔會好似炸麵咁賣完再炸。

應該下次唔會專登駕車入去食了... 我覺得唔直得囉....

這不是葡國菜餐廳，而是傳統中式酒家，菜還有家鄉風味。
也有來澳門不可不吃的魚翅

我們只是認得個門口，好像是電視介紹過，在著名豬扒包及天后廟旁。(但他無貼那食家的相片出來宣傳....)
一入門口裡面坐滿人，只剩下近門口的幾張檯，我們打算挑不對著門口的位置，怎知，那伙記死都唔俾我地坐，話我地得兩個人，要坐近門口檯 (其實那張檯是跟裡面的一樣大小！！)我們爭持了得久，終於都是坐近門口，老公還大聲鬧他，你再嘈我地唔食架，走喇！！佢仲 "啤住"我地....

我們看了一會餐牌，點菜，又是那個伙記，
二人先叫了一煲海虎翅(半份)，$2180，問那伙記二人會不會太多，他說大約每人三碗，不是太多，若嫌多咪不要喝完湯，吃晒那些翅咪算囉
然後我們又叫了家鄉浸魚咀，問他有什麼菜，就指了掛牆上那幅相的"豬籠入水"----螺肉肉碎浸芥菜膽
翅先來，嘩！很大煲，點止每人三碗！？我們結果喝了每人起碼四碗，很好味，那湯底很夠味。但是，老公說那些翅不是大靚，有些粗有些幼，懷疑是混在一起問那伙記，只答是不同位置當然有粗有幼，
那魚咀，做得鮮味，很有農村風味，香港很少能吃到
菜膽我嫌不夠芥菜的苦味，我喜歡有那菜的原味

小插曲：原來那伙記凡是人進來都叫人坐門口的位置，我們看菜牌時，有兩個大陸人進來，但他 "死都唔肯"俾人坐裡面的檯，說是因為只得兩人.... 結果那兩個大陸人夠惡，唔理那伙記，自己坐低.... 呵呵，然後一會有一個女士，又是不想坐門口位置，但也是被那伙記"點"了坐門口位置，呵呵！他們兩檯都是叫翅，但只叫了小煲 $680普通鮑翅，他極力游說那兩檯叫我們這種 (我們不是被他游說的，是老公說難得過來慶祝結婚週年，要吃得豪一點)
當然，他們無咁易給那伙記游說啦，哈哈

食物是有水準，但真的要改下服務態度啊！

早上十一點左右去到，仲未焗起，於是要等....
買了一個，好好味呀！
好脆好脆，可能因為夠晒新鮮吧
好多肉汁係咁漏，個肉餡的味道無台灣那邊咁辣，可以食到真味！
好！下次要再食

老遠行來買了蹦砂龍耳，都算叫鬆脆，但很油很油啊！
如果佢少d油就好好多喇，因為油，不可能食得多，一件夠晒數
還買了一樽水牛奶皮，想試下係唔係在鳳城食粥果種風味，下次食完再上黎報告，呵呵

星期六下午都不多人，心已沉一沉，是不是無想像中咁好食？？
兩個人叫了一個雙皮奶一個薑汁撞奶 share 食
雙皮奶唔見面頭層皮ge！？滑就夠滑，奶味都濃，不過，我食雙皮奶係想食佢面頭片皺皮囉
薑汁奶，撞得唔夠凝固，得散很稀，我估係溫度控掣得唔好吧

遲左起身錯過去三元試粥，唯有食老公另一樣至愛----咖啡~~
帶佢去街市，上左好多層電梯，終於找到了~~
叫左一人一杯咖啡，兩份一個豬扒包，廿幾蚊，超抵
咖啡真係好滑，老公不嬲好嫌尖，只嫌不夠濃咖啡味，
之後我先知原來有瓦煲奶茶，要留返下次再試 lu~~
豬扒包，無乜特別，豬扒比較薄，都算脆身

去左幾次馬交，終於今次見唔洗點等位就入去試下，
兩個人叫左超牌蝦子麵2碟，爽滑魚皮1碟，金沙炸鯪魚球一碟 + 蜆介，大可樂一支。
蝦子麵 - 嘩！好迷你呀，鹹左D，可能賣點係多蝦子啦多油....
魚皮 - 好淡，超迷你，爽都叫做爽ge....
鯪魚球 - 幾樣之中呢個最好味，但 +蜆介要收多 $1，果碟仔得三隻蜆咋，d汁仲好似水咁，搵笨！
大可樂 - 玻璃樽，有風味，好耐未飲過咁好飲ge可樂
是次好味排行 ：鯪魚球 ---> 可樂 --->蝦子麵 --->魚皮

如果下次無乜人唔洗點等位，先會試其他野食 lu，如果要食返蝦子麵，noway

阿媽俾左張$1 COUPON 我，一人去加多$1可變兩人，於是book 左尋晚同老公撐檯腳

先講打電話去BOOK 位，餐廳直線電話無一次有人聽，一係就唔通，但打去酒店總機再轉上去就好快接到，唔知係咪咁忙或者有記認直線就唔聽電話！？

我BOOK 左六點半，但六點一就去到了，坐左一陣去轉洗手間，已經多左好多人，未夠六點半D counter 就比人排隊拎野喇....
首先最多人，就係魚生檯，條龍長到呢~~~~~~~ 但我地無試因為唔係咁好，所以留肚食第二樣。。。

冷盤：蝦，幾大隻，又新鮮；瀨尿蝦，比較細，無乜肉食，但都算鮮甜；扇貝，比較淡；長腳蟹，數量唔多，好辛苦先搶到返黎，好鮮甜；青口，好新鮮，好味；龍蝦仔就無食喇..

沙律：我地無試自助沙律吧，只食左預先拌好果d，我同老公都鍾意有個海鮮意粉沙律，同有個都幾辣ge沙律(佢無名牌，我估係泰式啦...)老公仲encore添

沙鍋翅，好長龍，師傅煮唔切，排隊比較亂。。。有四種味，我地試左馬來亞鯊魚骨湯底、木瓜椰子蟹湯底、鮑魚雞湯底，無試上海酸辣湯底。
最好食係鯊魚骨湯呀，椰子湯就好有椰子味，鮑魚湯底唔見有鮑魚。每碗都有一小舊翅係底，同埋勁多銀芽啊。。。

熱葷，羊架超好味呀，牛扒就普通d，天婦羅又正，仲好搶手添，魚扒又係好味。
其他仲食左幾款蔬菜類，無乜食肉類喇。
咖哩雞+印度餅都好味呀，但如果塊薄餅係脆口果隻仲更加好....
仲有就係即炒皇，師傅一人做兩個吧架，粉麵吧同即炒吧，好忙呢~~
我去拎左個炒通菜，味道OK，但D菜比較老 (菜好幼，但唔知點解咁老)，仲有辣酒煮花螺，我嫌唔夠辣，本來想試埋蒜香牛肉粒、牛仔骨、雞翼同炒蟹，但已經飽喇，仲要留肚食甜品呀

d甜品都算唔錯架喇，比想象中好好多，我食左三杯法式焦糖燉蛋，有幾種1"x1" ge蛋糕，d燉蛋有時比人拎晒，要問師傅，佢就係檯底個雪櫃即刻拎出黎，因為佢好忙，卦住整梳乎厘，所以有時無為意。Tiramisu，就麻麻地喇，我自己整果d最好食
梳乎厘成日要排隊，大約10-15分鐘出一爐，我去左兩次都派完，我去第三次，師傅都認得我喇，我第三轉去佢剛入爐，我唔理喇，排第一係度等但，一人只可拎一個，所以我同老公只好 share 喇。我就覺得好好味，點知老公話無乜特別，激死，早知我唔俾佢食，自己食晒一個

食下輪下，已經過左兩個幾鐘，我地飽到唔識郁喇。
埋單，$1 coupon 再加一，食左$390。
因為未夠$500，無泊車優惠，所以要俾多$25 x 3hrs =$75。
好在我地早黎，d車泊到滿晒。

總觀是次 buffet，係富豪集團黎講，絕對可以洗底。唯獨是好多人用 coupon，滿晒座。
不過如果唔係有$1 coupon 同駕車，我都未必會黎，因為唔係好就腳....