每逢初一十五， 都會同豬寶食素，一直都聽聞麗姐食物唔錯，好想去試下，今次一於訂位去一試
一上枱前菜已好有心機，有青瓜同毛豆，驚喜毛豆有調過味，好好食
台灣炒米(有蛋)

好多配料，有素叉燒火腿，冬菇絲，椰菜，芹菜；米粉沾滿蛋，調味確有台灣風味
黑醋咕嚕
有蓮藕，有茄子，紅蘿蔔；仲有主角鮮竹粒， 多層腐皮，食落有層次有厚度，有肉嘅煙韌感，黑醋酸度剛剛好，好開胃，唔會有油膩感

食物保持穩定，出品有水準，個人幾鐘意麗姐嘅落味同調味

香煎蘿蔔糕
煎得好香，但可惜煎嘅只係一舊粉，切條或切粒嘅蘿蔔肉唔太有存在感，蝦米臘腸亦欠奉，口感同味道都唔合格
XO鮮蝦菜苗餃
味道尚可，蝦甜，但唔知係未生粉落手太重，蝦同菜苗肉餡表面都有一層透明凝固物，口感怪怪
細龜招牌家鄉炒米
配料多但整合度麻麻，主要係食口感，米粉有點碎，叉燒好乾，蝦無味，味道最出嘅竟然係靠洋蔥
唔知係未師傅失準，跟所想落差實在有點大，但環境座卡位係坐得幾舒服，希望下次會有改善

"銀杏館"係一間社企，專為長者提供就業機會；e.g. 長者農夫種植有機食物，長者司機運送食材，長者員工店內提供服務...；免費派發愛心飯盒，幫助弱勢社群。
近期係觀塘駱駝漆開左間烘焙店，老友記自家制，有曲奇餅，蝴蝶酥，蝦米酥及蛋卷等... 員工有心機講解產品，另有即場試食。除此之外，不定期有工作坊，可以交流下心得！
原本想買芫荽曲奇，試食後覺得唔夠芫荽味，所以放棄左
流金芝士簿脆餅
一包有4片，黑殼粉整成餅，香脆但唔易碎，咸香芝士味超濃，配埋咖啡一流
迷你海苔肉鬆蛋卷
愛食肉鬆嘅一定好開心，蛋卷鬆脆，海苔味好香，每條蛋卷都好足料，滿口肉鬆，最正係獨立包裝
員工雖已經退休年紀，但親力親為，活到老，學到老 嘅態度，Respect！不過更令我佩服同感動嘅一定係銀杏館嘅經營理念

豬事孖寶對中式糖水情有獨鍾，覺得中式糖水鋪有出品令人再回味係幾成功；而綠林最令我地印象深刻嘅就有芝麻糊，佢地嘅自製湯圓，烏豆桑寄生茶同杏仁茶
烏豆桑寄生茶
桑寄生茶味濃郁，回甘而不會苦澀，豆大大粒有咬口，唔會硬實實；桑寄生對身體有益，可以去濕舒壓，尤其對女性養生更有益。不過桑寄生茶同崩大碗一樣，鍾意就好鍾意，唔鍾意就會怕個種味
薑汁湯圓
薑汁係配角，湯圓先係主角，喜歡人手包，皮薄軟糯，芝麻餡濃香流心。但今次有點失準，薑水不夠熱，湯圓皮太厚，有點失望！

Are You Ready？大家一齊接"蕉"啦。除左香蕉燒，仲有爆漿雞蛋仔，葡撻同梳乎厘班戟... 每款都有唔同口味選擇，即叫即整，新鮮出爐熱辣辣。TAMAGOGO 就住係北角一田超市啦！！！
香蕉燒（朱古力／吉士／芝士)
蛋糕配上蕉形膠托盤，造型非常可愛，香蕉同朱古力真係好鬼夾，蛋糕包住香蕉蓉同朱古力，質感鬆軟，蛋味香濃，底部有幾粒迷你棉花糖扮腳仔，添一份玩味同驚喜
爆漿雞蛋仔（朱古力／吉士／芝士）
成個設計有心思，可愛到暈！同雞蛋盒裝住６粒雞蛋仔，每粒都印有笑笑圖案；蛋糕口感同樣鬆軟，濃濃蛋香味，吉士醬配搭其實係正，但可惜略嫌吉士醬份量少了點，比例有點失平衡

由門外到店內，木色系，餐具，擺設都充滿厚厚日本家庭式小店味道。
一汁多菜
一汁即係熱湯，多菜即熱菜＆冷菜，定食已包日本米白飯，可以有多種配搭，我地就揀左２熱菜＆１冷菜。冷菜要金平牛蒡，而熱菜分別係 秘製masala雞，香料味足，辣味唔太夠，雞肉大件厚滑；另即製惹味大阪燒係全素，有豆腐甘荀同杏鮑菇，豆腐味濃，杏鮑菇甘荀添口感，清新健康
中華孜然炸雞及滑蛋三文治
原來銷售之鬼有個花朵叫 倦鳥孜返，哈哈！有創意我鍾意。跟餐一杯黑豆麥茶；孜然炸雞外脆內嫰配埋滑蛋同烘得剛好麵包，口感滿滿！
最後點埋星期六日假期先有嘅限定甜品 - 千層調色板。豬事孖寶係選擇味道有分歧，決勝負後，最後點左朱古力醬香蕉，酥皮做得出色，唔會一夾就散，乾身唔會油，脆卜卜！
喜歡香蕉一片片，唔係香港蓉或太熟，再配果仁嘅嘅脆同吉士醬，成個甜品有多重口感同食到不同食材味道而唔係只有甜
員工好細心又有禮貌，menu上選材配搭同製作都有心思有想法，用餐整體感覺舒服

睇名以為係住宅？其實係大角咀一間極不起眼嘅小小小麵包店；加一盆蛋撻，左一櫃麵包，入面餅房，專賣港式包，店鋪有點歷史痕跡，呢度就係龍騰閣！
蛋撻好食，個人鍾意餅皮，餅皮陪紮實夠牛油香，蛋漿有厚度，濃濃蛋香味；
雞尾包係有ｄ料，仲要係爆料，好多芝麻，好多椰絲同時糖嘅甜度又唔會甜到牙痺；
三角咖啡蛋糕鬆軟，忌廉分開了雞蛋糕同咖啡蛋糕，蛋味咖啡味都好到位；
吞拿魚包就麻麻地，吞拿魚餡太濕太糊狀，只有咸味，口感就有點核突

西灣河街坊麵包店庭昌，除左多款港式麵包糕餅，最開心係有麻糬波波。
麻糬波波口味有五款：原味，斑蘭椰絲，伯爵茶，朱古力同鹹芝士，隻隻都大大粒，外層菠蘿皮酥脆酥脆，口感尚算煙韌但可惜空心感；每款味道都特出，尤其朱古力同伯爵茶味
真係估佢唔到，竟然會有格仔餅，$15/ 2大件，咬落鬆軟，有蛋香味，中間有煉奶同花生醬，味道唔差！如果叮熱會更加正

當年牛下有間粥鋪，阿叔伯即場做布拉腸粉同炸油條，小時侯好鐘意棟係隔離睇，感覺好治癒
米漿一勺，客人要咩腸就落咩料；蓋上，蒸熟透，熱氣騰騰，徒手起白布，扯下粉皮，捲起，切切切，上碟，落豉油。整個過程都好正！
金山係我其中一間西貢心水食店，每次經過都會點炸兩或蝦米腸；皮滑，油香，醬甜，油條鬆化。除左好食外，仲私心滿足我眼球，這份治癒感，身心滿足
但得知許姑娘唔做，阿姐又話雞粉黎緊都會唔做，真係有點唏噓

傑星四四正正光光猛猛，卡位闊落
自選粉麵：沙嗲牛肉 + 出前一丁 + 原味 + 熱0T
$36一黎就係丁麵，唔駛加錢轉，軟硬度淥得剛好，唔錯！牛肉多又大件，有牛味，但連筋位嘅會好靭同難咬；沙嗲汁味偏向咸，食完後會口乾
漢堡包餐：馳名豬扒包（蜂蜜芥末）+ 熱0水
個包烘得外皮脆裡面軟熟，生菜青瓜蕃茄真係普通過普通，唔會有清甜感；但豬扒真係好攞分，大塊又有厚度，腌味好煎得出色，鬆化夠肉汁但唔會過多油份，配埋個蜂蜜芥末醬，夾晒！