好彩我早去，岩岩去到客人唔多 到我食完已經滿座 OMG個包真係好好食 我麻麻地牛肉漢堡 所以我叫雞肉漢堡（走洋蔥、酸瓜）加磨菇 個炸雞辣辣地，好似有啲咖哩味咁 件炸雞勁Juice 麵包皮亦煎到好香好脆口 曾經某人講過，手工漢堡個麵包煎得香唔香係成個包嘅靈魂 真心……完全係 我絕對推介呢間手工漢堡店 #食食食 #全日食食食 #相機食先 #wingの食堂 #無錢但又愛食愛周圍遊 #SickBurger #WingsKitchen #Photoblogger #Blogger #Fooddie

因為我重未有時間而且啲台北機票重未去到正常價錢下，唯有去食台式火鍋頂吓癮 當然……價錢會比台灣貴一倍，但係我覺得都值得試一次，多一次就不了，留去台灣先食 同朋友book 6:30，因為早嘅關係，火鍋店客人未多 湯底： 麵包豆腐鍋、無老辣香鍋 豆腐鍋其實真心比辣香鍋好食，辣香鍋無花椒，所以唔係麻辣鍋，無老辣鍋主要食香料為主，不過唔太夠辣 而豆腐鍋加湯係要叫店員幫忙，但香辣鍋係唔需要，枱上面會有4支高湯俾客人自己添加 火鍋配料： 手切吊龍 同我以前食過嘅真係好唔同，有咩唔同﹖好靭囉……但係香牛味嘅 望落好靚，但係食落真係唔ok 價錢同質數真係好大反差 招牌手工三色滑(台灣直送) 蝦滑 - 呢個係3款入面最好食，個蝦滑唔係齋滑，入面真係有蝦肉 蟹滑膏 - 其實食唔到有蟹膏味，但都彈牙嘅 瑤柱滑 - 入面真係有一條條瑤柱絲，值俾 綜合丸 手工蝦丸 手工花枝丸 - 好彈牙，入面真係有一粒粒花枝 濃汁牛丸 - 牛丸真係有汁，唔乾唔柴，連唔鍾意食丸類嘅朋友都話好食 濃汁貢丸 - 同牛丸一樣，好食，juice 綜合餃 香滑蛋餃、燕餃 - 好台式火鍋，為嘅就係呢啲港式火鍋無嘅配料，好唔好食……正常囉 魚皮餃 - 都係正常餃類，但係有打開邊爐嘅人都知魚皮餃會搞到個湯底杰咗，所以最好都係放辣嗰邊穩陣 老油條、濃香豆皮(台灣直送) 食台式火鍋老油條真係唔可以缺少，但個人覺得浸豆腐湯底真係好味好多，因為呢啲太吸湯汁，辣嘅真係會食好多油落肚 濃香豆皮，真心……可以慳返，唔值得叫，太大嚿吸湯率好高，響鈴會比較好食，我同朋友各自食一嚿就已經話唔好食 粉條 - 呢個用香辣湯底嚟淥都係一樣比豆腐湯失色 鮮甜蔬菜盤

最近經常同妹妹去食吓Tea打吓卡
呢間餐廳其實都係咁啱喺社交平台見到佢做緊優惠
就去KKday買
其實睇社交平台啲相已經覺得佢好打卡able
當然上到去無嘩一聲嘅，不過都唔差

下午茶：
頭盤： 法國Gillardeau生蠔(我無諗過Tea都可以食到我最愛嘅蠔）

鹹點：
啖啖龍蝦牛角包(可以媲美日本街頭龍蝦包)
法式鵝肝馬卡龍(其實佢係鵝肝醬，唔係一件件嘅鵝肝)
三文魚子煙三文魚多士(啲魚子未去到壽司店嘅咁新鮮，所以唔太食腥味嘅……要考慮食唔食)
和牛藍芝士漢堡包(食唔到幾勁嘅藍芝士味，但個漢堡扒係唔錯嘅)
巴馬火腿水牛芝士烤包(正正常常唔太特別)
西班牙火腿芝士三文治(呢個簡直係全個Tea嘅亮點，超級好食)

甜點：
迷你Tiramisu千層酥(個酥皮幾好食，但我地兩個都唔好Tiramisu)
迷你小卷蛋糕(個卷蛋好鬆軟，中間嘅忌廉唔太甜)
草莓朱古力忌廉泡芙
綠茶撻
紅桑子奶凍(妹妹話唔甜，好滑好香)

同朋友去旺角行街，咁啱佢要去金魚街買貓糧 好自然我會想去Moko食晚餐，多餐廳之餘又方便我地搭東鐵返屋企 今次想試吓未食過嘅日本料理店 味啉魚乾： 去任何日式料理店我都必點嘅食物，呢間燒落去味道唔錯 清酒煮花甲：牛油太多，清酒味俾啲牛油味蓋過晒，但係啲花甲好肥美飽滿，但係牛油味真係太重～～ 好似食緊牛油汁煮花甲咁 日本汁煮鮑魚：入味，但未夠淋，可以再淋多少少，除咗鮑魚，重有鮑魚嘅內臟汁煮附上，未食前以為會好怪，但係其實口感好棉，味道好似豬膶咁 日本黑豚吉列盛合定食：有黑豚肉、竹簽魚、帶子、蝦餅 炸皮做得好好，好脆口，但係吉列帶子個皮有啲厚 定食有魚生伴隨，有吞拿魚、帆立貝、魚子 海膽三文魚斧飯：斧飯上菜嘅時候，需要焗多1分鐘先開蓋，店員話開蓋嘅時候可以先倒一半醬汁，拌好後試味再決定倒埋之後嘅醬汁，食到最後，飯焦可以加茶落去做泡飯焦(但我唔太好飯焦，所以我一夠鐘就開蓋，唔俾佢燒到出飯焦) 海膽正常發揮，本身跟斧飯個汁唔夠味，最後我要落少少豉油

之前因為要去文化中心聽演奏會，所以就試吓喺樓下嘅Cafe 牧羊少年好似都好多分店，價錢中等，環境都舒服（如果無咁多強國人喺度大聲傾計會再舒服啲） 海膽黑魚子醬蟹肉貓耳朵粉 我未食過貓耳朵粉，所以就試吓，佢地個意粉煮到啱啱好，好有Al dente嘅感覺，我就好鍾意～～ 海膽味好重，見唔到蟹肉﹖錯喇……啲蟹肉全部撈晒落啲汁醬度，好香 其實黑魚子溝埋個汁，我講唔到佢係咩味道，搵次齋食啲黑魚子再報告俾大家知 但係個海膽未去到最鮮甜，我覺得可以再好啲 藏紅花蟹膏蟹肉意大利飯 OMG……呢個飯，蟹迷會超愛，佢啲蟹膏味濃到呢…… 我就覺得太over，但係我老公好鍾意 個味道濃到好似超市買韓國蟹肉蟹膏罐頭齋啪咁濃…… 特濃朱古力 O Shit……呢杯嘢……個質感……重杰過奶昔 完全好似飲緊朱古力漿嘅杰度，佢係杰到可以掛飲管 佢一啲都唔甜，好香cocoa 味 如果你好愛朱古力嘅會勁鍾意 但係……我就真係不了……over咗我對朱古力奶嘅認知

因為疫情關係，老公同啲老表都2年無見過 難得今年疫情放緩，最後我地兩個守咗3年都終於1月中埋，可以放心出嚟聚聚 因為表姐佢地住港島區，所以我地揀咗間喺銅鑼灣又舒服嘅Cafe食lunch Urban Cafe本身我地喺新世紀都食過幾次 港島呢間就第一次 Cafe格局都幾舒服，不過就暗咗少少 （當日重見到陳凱琳同朋友嚟食lunch，佢真人素顏都好靚，重要好瘦……真心羨慕） 卡邦尼煙豬腩意粉 炸軟殼蟹飯配溫泉蛋 忌廉汁椰菜花飯配帶子海膽 不過真心，我覺得普通Urban好食啲 呢間啲嘢唔太啱食 大家都好難先揀到想食嘅嘢 份量亦都唔太多 有啲唔太對得住個價錢

韓國嘢喺尖沙咀真係成行成市，不過我多數都食燒肉多 但係今次食呢間 呢間都有燒肉食，但係無見到有客人食燒肉 都係食韓式料理多 辣炒小章魚 (呢個好食，甜甜辣辣，又有麵線) 鐵板熱炒海陸空 海： 辣炒魷魚 （不過不失） 陸： 甜辣炒豬皮 （呢個超正，真心可以齋叫一碟） 空： 春川炒辣雞 （呢個我覺得有啲鞋，下次可以試雞腳） 湯品：魚糕湯 （我個人好鍾意，但係朋友話好咸） 芝士炸雞四重奏 sorry……呢個我真係唔太欣賞……KFC真心好食過佢啲炸雞 雞太大嚿都算，但係肉有啲鞋～ 濟州海鮮炒粉絲 韓式炒粉絲我好少話好食，但係呢間真係炒得好好，好濃味，平時出面食嘅炒粉絲好多都好清淡 總括嚟講，呢間係值得一試，但係炸雞真係不了 而佢個秘製滷豬腳真係好吸引，但係我地唔想眼闊肚窄，所以就無叫，見隔離枱食，真係好似唔錯～～

最近社交平台好多餐廳廣告彈出嚟
而突然俾呢間餐廳吸引我嘅地方，就係order酒類就可以加錢order生蠔

Cavatina Premium Moscato
平時Moscato係偏甜，而呢支Moscato好balance，一啲都唔甜，重好香，非常易入口，餐廳經理推介
真心唔錯 ($298)

而生蠔我地order 咗幾款
1款係餐廳推介法國蠔 (1打)
日本生蠔 (2隻)
法國Gillardeau (2隻)
美國中碼蠔 (2隻)

我都係鍾意法國生蠔，海水味濃
但係法國蠔我都真係偏愛Gillardeau，海水味平均，鮮甜，中間口感
日本蠔偏大隻，爽口，但係蠔味唔出，海水味都平均，唔會太咸
而美國蠔金屬味偏重，口感亦都平均，不過我同朋友都唔太鍾意金屬味太重嘅生蠔

炸美國薯條
新鮮薯條炸出嚟真係特別好食，但係我同朋友對鴨松露芝士醬唔太欣賞，我地都係鍾意蕃茄汁多啲～～

雪茄蝦卷
呢款小食可以話係好打卡able，啡色春卷皮包住原隻鮮蝦
再用個木盒裝住上枱，而啲春卷下面放住啲木魚絲嚟扮煙草絲，真係好特別

牛油蒜香蜆肉意粉
OMG，呢個真係勁香，雖然意粉唔係Al Dente，但係絕對好高分數，蒜味香，檄欖油雖然多咗少少，但係真心，呢啲炒意粉係要有好多橄欖油先好食
一食真係會唔停口

黑松露雜菌意大利飯(生酮版)
因為叫咗生蠔嘅關係，所以唔想食太膩嘅main course，而呢個意大利飯係用椰菜花做嘅，再加埋雜菌，全碟都係菜，好健康
味道真係絕對唔差，食完一啖會不停咁食，食唔停～

題外話，我從來都無預計過佢份量會有咁多……個意粉同意大利飯嚟到，我同朋友都講咗聲……大鑊了～～

門口一啲都唔顯眼，好易就會行過咗，唔企定定望清楚就會錯過咗佢門口
望到門口以為佢好細間，點知……原來內有乾坤，間鋪好長好深
去食嘅原因主要係喺社交平台啲推送度俾佢個龍蝦湯沾麵吸引，平時食開都係豚骨或者魚介多
坐低就俾佢個Menu搞到選擇困難症發作，因為太多款揀
最後決定簡單才是最好，唔好太多花巧嘢

元祖龍蝦沾麵 $109
沾麵湯夠熱，因為用熱石碗出菜，所以每條麵沾完湯都好熱
湯夠杰，但係……無味……龍蝦味唔突出，好淡，我明，咁嘅價錢點會真用龍蝦煮湯嚟俾你食，但係……你都落返少少調味呀大佬……搞到個湯好似只係食緊黏口嘅忌廉湯沾麵咁
食開沾麵嘅都會知道，其實沾麵湯汁係會比教濃味，唔會好似普通拉麵湯咁稀
令我食完都唔知自己食緊咩
我食沾麵好少會食剩，因為我真係好鍾意食沾麵，啲湯我一定會飲晒，重要唔駛店家加魚介湯我都會飲晒
但係呢個沾麵……OMG……我竟然食剩一半，個湯我飲唔落……佢係杰得嚟……唔重口味

黑蒜豚骨叉燒拉麵 $99
老公好愛蒜頭，直頭係蒜頭怪，唔需要考慮就叫呢個拉麵，因為佢唔鍾意食Al Dente質感嘅麵類，所以佢唔會食沾麵
點知……佢話個湯零黑蒜味，啲蒜油無味，好似個湯底無落鹽咁
麵就硬，唔軟身，但係佢食晒嘅，因為佢唔鍾意浪費食物

兩個麵，最好食嘅就只係得佢個叉燒同糖心蛋，個叉燒肥瘦適中，出菜前重用火槍燒過，呢個係加分位
個糖心蛋味道啱啱好，啱會太咸或者太淡，蛋黃亦都好糖心，呢個直頭滿分
可惜……作為沾麵店……個沾湯同拉麵湯都淡而無味真係唔掂哩……

呢間日西式餐廳Lunch Menu都多選擇 主要有一個湯或沙律前菜、主菜、飲品 咁我就揀咗要湯，當日嘅湯係南瓜忌廉湯，主菜我就揀龍蝦意大利飯，而飲品，我加錢要巨峰提子芒果梳打 個湯食得出唔係用粉煮出嚟，而係真係用南瓜打成蓉煮，好香南瓜味，飲落重有少少南瓜蓉 主菜龍蝦汁意大利飯，勁多汁，但佢唔太似用正宗意大利米煮，味道就唔錯，雖然無龍蝦喺入面，但係都有幾隻中蝦 幾爽口，不過……入完醫院1晚嘅我……出院後胃口真係變咗雀仔胃，食咗一半就已經好飽 而個巨峰提子芒果梳打，不過不失，因為都係糖漿加糖漿溝出嚟，不過佢好有誠意咁加咗片薄荷葉，同埋檸檬乾落去，呢個係加分嘅，因為杯飲品望落去靚咗好多 整體嚟講，可以一試，正常日西式餐廳水準 排多過10-15張飛，我會建議轉場，如果5張內……絕對推介