東海堂(深水埗)

紅荳綠茶飽loaf$10(原價$12，優惠券減$2)

張優惠券就到期，搵啲嘢買吓先，啲錢就係咁樣冤冤枉枉洗咗去
打開個袋已經聞到綠茶香味，飽好鬆軟，裏面啲紅荳仲好濕潤，所以綠茶同紅荳真係無敵組合，食吓食吓唔識停，成條差唔多冇晒

利強記北角雞蛋仔(尖沙咀)

雞疍仔$12

食過呢度啲雞疍仔，你就會成日用佢嚟同其他舖頭比較
佢係脆底，厚身，裏面軟，有少少疍香，真係對版

貢茶(旺角)

桂圓紅棗奶茶$15

多人到爆，有排等，第一啖好鬼甜，桂圓紅棗同奶茶擺埋一齊，好怪
桂圓同紅棗，我兩樣都鍾意，但同奶茶飲就唔得

大班麵包西餅(太子)

榴槤$29
流沙疍黃$29
綠荳疍黃$29

一年容易又中秋，又到食月餅嘅時候，亦係要去（大班）走一轉嘅時候
榴槤味濃，最好多啲餡，記住要一次過食晒，千祈唔好話要節制吓，切開留番擺入雪櫃，咁會走味架
流沙疍黃，個疍黃整得夠軟身，有少少奶黃味
綠荳疍黃，最原始嗰種就食到綠荳蓉嘅味，疍黃切得碎碎，易入口啲，如果要大個裝嘅呢，個疍黃實雪到石頭咁硬，次次食都要吐番出嚟
不過佢啲餅皮係真係好啲，冇咁濕淋，仲有彈性

魚鱻魚湯專門店(荃灣)

原條桂花泡飯$45

成日見到啲相影到啲湯好吸引
湯都幾多，係……係就係甜，不過唔係好飲到啲鮮味，飯量都夠兩個唔大食嘅人，條桂花魚夠新鮮，魚冇灼過火

舞茶道(深水埗)

冲繩黑磚奶茶加珍珠$10 + $2

佢個廣告好似好有來頭，話好多度都有分店，但係佢又開喺唔係咁多人流嘅位
奶茶好甜，冇茶香，珍珠好甜，唔夠煙韌
佢勝在個黑磚有啲吸引力，有黑糖香，有咬口

酸梅冰茶加黑磚$10 (七折，原價$14)

淨係得個甜字，一啲酸梅味都冇，係啲黑磚有咬口，先吸引啲咁解
好彩佢有七折，如果唔係仲肉痛

水車屋日本料理(尖沙咀)

好耐以前嚟食鐵板燒，話俾人聽好巴閉，嗰時好多名星去，幾貴吓
依家要變做放題，真係今非昔比，入到去都覺得有啲過時嘅感覺
食完一大輪，樣樣都好一般，冇一樣令你有好深刻印象，而家都好多地方都有呢啲放題，加上唔鍾意坐祤祤米位，位窄又對住啲鞋，真係冇乜胃口

金豪肥牛豬骨煲(深水埗)

前菜$10
好味醬烤骨$78
蒜炒西蘭花$48
雞湯翅$48
豉汁蒸大鱔$68
合共$252.00

呢度都幾多人喺度打邉爐，天氣咁熱都係唔好攪，食吓小菜算
前菜青瓜爽口，汁惹味，但個青瓜好出水，令到個汁淡咗
個醬烤骨外觀真係麻麻，好似舊煲湯豬肉，成兜汁紅卜卜又水汪汪咁，食落都有肉味，個汁酸酸甜甜，幾好下飯
西蘭花炒得好爽脆，唔會好油
雞湯翅個湯甜，係甜得有啲古怪，似落咗奶，所以令到個湯咁白，翅有啲腥
蒸鱔幾大碟，冇過火，幾扺食

梨花園(觀塘)

泡菜湯飯$50

間唔中就會掛住呢個湯飯，成碗嘢紅卜卜，食完成身汗好過瘾，泡菜唔過淋，唔過辣，有啲豬肉喺入面，仲有塊雞扖叧上，個汁幾好，但塊扖好重雪味

佢碗飯份量幾大，再加埋啲湯，一個女仔係食唔晒

九里香(觀塘)

節瓜瘦肉湯
香酥肉甜酸汁(千島汁)
竹筒飯$40

喺呢個FOODCOURT呢間就比較平，又大碟啲
個肉炸得好酥，但就冇肉味，有好多件
湯勁肥，成層油喺面，睇色水就知淡
飯食唔到竹筒味，不過份量就幾多，實食得飽

發記海鮮酒家(西貢)

椒鹽頼尿蝦$2xx
沙薑雞腳$40
發記抄飯
薑蔥抄蟹$2xx
辣酒煮花螺$9x
鹽水花甲
合共$791.00

完全係即興入去食，因為我唔熟路，就靠一個話十幾年前曾經去過嘅朋友帶路，喺（彩虹）搭小巴入去西貢碼頭，再轉的士，點知係錯晒，原來布袋澳係喺西貢另一邊，一個南一個北，即係你會見到架的士反方向行番頭先小巴嗰條路，真係激到啤啤聲，咁就搭咗二佰幾元的士入去，啲車錢直頭可以嗌多個餸啦，其實應該喺（坑口）轉的士就啱數

頼尿蝦唔炸得過乾，仲有水份，椒鹽香口
個雞腳入味，彈牙滑溜，沙薑唔過咸，好正
可能期望過高，個飯唔係阿蘇所講咁好食，啲煆脢，叉燒又乾
薑蔥抄蟹好有鑊氣，隻蟹新鮮
辣酒煮花螺，個汁麻麻，朋友話以前（大佛口）整得好好食，而家冇晒
花甲大隻大沙，個湯好甜

不過呢度真係好唔就腳

新聯豐粉麵家(深水埗)

艇仔粥$18
雲吞麵$18
菜芯$10
合共$46.00

呢餐半宵夜半晚飯，十點幾先食
個粥底都幾甜同綿，係魚片做底，冇咁腻，好過用炸米粉肉
雲吞餡幾香，皮薄接口位唔厚，不過冇肉味，麵冇梘水味，幾煙韌
都幾好唔差，食得過

大力水手炸雞(赤臘角)

Butter Biscuit $ 7 x 2
炸雞$16

因為過去（博覽館）睇《SUMMER POP》馬拉松音樂會，三點唱到十一點
一知道話會去機場，就諗到要嚟食，以前出差、旅行前都要嚟食，有咩咁好食呢? 就係嗰個Butter Biscuit，佢淨係得蜜糖供應俾你搽，好多時我會自備果醬，咁食會清新啲，冇咁腻，當SCONE咁食，佢個味道就係似以前（肯得基）嘅牛油鬆餅，而家冇出啦，所以冇得食就要入嚟食，次次都要打孖上，嚟慰解吓，佢牛油味都幾香，食落都鬆軟

佢個炸雞唔油，脆漿唔厚，塊皮好脆，因為係雞胸，所以肉質有啲鞋

君滬鍋貼大王(長沙灣)

粢飯$8
生煎牛肉飽$4
生煎豬肉飽$4
鍋貼$2

粢飯唔係即制，係喺個櫃度拎出嚟，心已經冷咗一節，條油炸鬼濕淋淋，炸菜唔惹味，肉鬆唔夠香，以前（觀塘廣場）喺樓梯口有檔係即整，好食，啲炸菜夠香辣，肉鬆係深啡色伴有芝蔴，有隻淺啡色嗰啲肉鬆唔好食嘅，佢啲油炸鬼都脆身，究竟而家邊度有脆油炸鬼嘅粢飯食呢？

個飽嘅皮唔算薄，食落幾軟熟，得一面煎得焦黃，兩面都係就最好，牛肉有冬菜，幾惹味，豬肉同牛肉，似係有梳打粉醃過，個餡有汁，唔差
鍋貼個底煎得唔夠焦黃，皮算薄都整得熟，餡有汁，如果可以煎燶啲仲好

源興隆麵家(西環)

墨魚頭米
魚疍粉
西洋菜
菜芯
汽水
合共$59.00

佢主打係墨魚頭，食過覺得係新鮮，但唔夠墨魚味，好普通
魚疍都有彈性唔腥，魚味唔係好濃
西洋菜好清甜，依家好多粉麵店都係生菜、菜芯、通菜，食到厭，所以好鍾意有得食灼西洋菜嘅舖頭