Chung King BBQ Restaurant    重慶燒燒烤專門店  

是日朋友生日，為佢慶祝，約咗係重慶燒大食一餐。
文英街幾十米內便開咗四間“重慶燒”，雖然都係小小間，但生意可以做到咁興隆，已經足夠叫人刮目相看。
七點幾去到，已滿座，在店門口等咗十幾分鍾，滿街的燒烤味，一股股熱浪直逼過來，熱得周身沸騰，在此等位絕對係苦差事，為咗一嘗蜜燒南瓜餅，再熱都等。
終於，我哋攞位坐低，攞點餐紙點嘢食，發現價錢全部作過調整，比之前都貴過一兩蚊，一餐食落分分鍾貴廿幾三十蚊。
嗌嘅啲嘢食逐一上檯，大動筷子。
涼拌黑木耳$20/碟，以黑醋、鼓油和辣椒醬涼拌，酸酸辣辣，幾醒胃，就算平時少吃醋嘅我都可以食入口，惟一要嫌嘅係黑木耳太過粗硬，唔似之前來食開嘅黑木耳細滑。
芝士牛油焗海中蝦$48/9只，採用海蝦，這會比塘養蝦來得更有蝦嘅鮮甜味，加埋香口芝士和牛油，用錫紙包住來焗，鎖住海蝦嘅鮮味，食起來更加香甜，根本唔需要用豉油蘸住來食。
蒜燒美國石蠔$84/6只，以新鮮石蠔鋪上蒜茸，調好味道，直接放在燒烤爐上燒，燒熟後點綴上蔥花紅椒絲，甚是漂亮。成只蠔連啲蒜蓉夾入口，或者蒜茸味辟走咗蠔嘅腥味，並唔覺得腥。
燒韭菜$11/串，將韭菜逐條逐條串成一串，好中意用來燒韭菜的調味粉，令得平平無奇嘅韭菜霎時化平凡為神奇，令人食落津津有味，只不過成條韭菜幾考牙力，要不然一半在口中一半在喉嚨處並不好受，哈！
燒雞腎串$11/串，調味料同韭菜嘅調味料一樣，咬一塊入口，煙煙靱靱，一樣考牙力。
燒原條茄子$22/條，將一條茄子對半切開，在切面鋪滿蒜蓉，調好味道成條攞去燒，燒到爛熟，食時用筷子挑起白色茄子肉，雖說茄子肉淡而無味，但中合咗調好味道嘅蒜茸，淡中有味，恰到好處。
燒多春魚$22/6條，逐條多春魚用竹簽從魚嘴處插入再燒，食時握住竹簽，乾淨又方便，幾好。多春魚，顧名思義，都係大肚魚，食住多春魚時，我都會小心食曬每一粒魚子，那每一粒魚子都係每條魚媽媽嘅寶貝兒，每一粒便係一條魚BB。有時，食住多春魚時，我嘅腦海中會忍不住會生出一種一知半解嘅疑惑：為何多春魚條條有魚子，唔通多春魚族全係雌性？而雌性又如何繁殖下一代，唔通好似《西遊記》中女人國嘅女人，飲一啖河水便會大肚？嘻嘻，明知女人國不過乃一種神話式嘅描寫，但動物界嘅神奇，確實令我匪夷所思！扯遠了，再說回燒烤。
日式燒飯團$20/兩個，用米飯握實成三角形狀嘅飯團，兩面翻轉燒，飯團嘅表面灑上調味粉，外鹹內淡，外焦內濕，這令我諗起家鄉嘅飯焦。小時候，家族十幾口人嘅飯菜一鍋煮，食嘅係大鍋飯，而我哋福建人最喜歡煮鹹飯食，簡單省時，即係用油、米、菜和鹽，加適量水一鍋煮成大鍋飯，通常鍋底一定有飯焦，而我最樂意攞果啲飯焦來食，焦黃焦黃的，又帶有油香味，香脆香脆的，食在嘴中很過癮，只是吃多了會熱氣。而今晚吃在口中嘅日式飯團燒功並不到位，內里的飯粒仲係凍嘅，表面也並不香脆，這有啲遺撼。
香辣田螺$30/碟，這不是現炒田螺，凍冰冰，好辣，並且大大粒，可以用竹簽挑出螺肉來食，我並唔知大粒螺貴啲定係細粒螺貴啲，就我個人而言，我反而喜歡細細粒嘅田螺，可以用大拇指和食指抓住送往嘴邊，以嘴唇輔助舌頭，一吸氣將螺肉吸入嘴中，有種啃瓜子般嘅好玩與過癮，嘻嘻！
蜜燒南瓜餅$18/3個，這是我的心頭好！可以講呢一餐全由我拿主意，而我就係沖住呢樣甜品而揀咗呢間餐廳嘅。之前嚟食過，一食難忘，而家專登為它而來。不過，今晚有啲小小失望。原因一，侍應忘記咗幫我哋落單，食完所有嘢，遲遲唔見心頭好出現，追問之下先知無落單，補單後制作需時，惟有耐心等候，等啊等，等到花也謝了；原因二，今晚嘅南瓜餅出品大不如前，表皮火候唔夠，軟淋淋，可謂“期望越大，失望越大。”
總體來講，朋友對嘅呢餐慶生餐都算滿意。所有嘢都係細細碟，可以食多幾碟，雖然三個人食咗三四百蚊，但有七八樣嘢食落肚，有蝦有蠔，算係咁喇！