Ginger Bakery  

上星期六，落毛毛雨，搭電車去灣仔 Classic Orchard ，經過莊士敦道見到有間門面幾 sharp 嘅小店，彩藍色 X 白色，幫襯完 Classic Orchard 走過嚟睇吓，如果啱嘅話先入去。原來係 Ginger Bakery ，聽個名以為係麵包舖，望入去，有蛋糕賣，咖啡... 係間 cafe ；就算堂食亦唔使加一服務費！

自動門要先按掣，走入去見到有4 張枱，裝修柔和配合淺色枱櫈，感覺舒適！ 較入位置嘅兩張枱，靠牆有梳化坐較為舒服！舉頭一望，見到兩個茶壺燈，十分特別！ 跟柔和色調配合不已！ 要提一提大家，枱角雖然以綱條包邊，但係會刮手！我手面即時出現一條白色刮痕。老闆娘係一位孕婦，另有兩、三位男店員。店員問我要唔要飲品，我唔需要，佢便遞上一杯暖水，服務貼心！

其實，呢度上星期五開，平日以外賣客居多，放工時段亦不失一批堂食食客；反而週末比較多堂食食客。

蛋糕：大致上由 $26 ~ $30 ，另有雲呢拿 cup cake 賣相精美，但要 $22 唔係咁平！上星期及昨日，我食咗兩款蛋糕，各有特色！

金筍合桃蛋糕 $28
以金筍、合桃、果仁、提子乾為材。頗有新鮮感！而且食得健康！ 加入合桃粒 & 果仁粒，增添口感！蛋糕食落軟硬適中，表面用上淡忌廉，減少餾膩感！成件蛋糕唔係好甜，甜味點到即止。香蕉忌廉撻 $26
其他撻款：檸檬撻及蘋果金寶撻；我覺得賣相最吸引我，非香蕉忌廉撻莫屬！ 並非混入香蕉味粉，而係用新鮮香蕉切片，一層香蕉片，一層香蕉忌廉；如是者，共三層香蕉忌廉中夾住兩層香蕉片。最後，師傅小心翼翼唧上忌廉，灑上朱古力片。用咗不少香蕉，真材實料！份量十足！ 香蕉味不用多說必定濃郁！香蕉在空氣中，會變黑！難免影響一點賣相。忌廉甜得嚟有點餾！可惜，撻底硬咗些少，而且淡味如麥餅！ 店員話我知，如想食濃味蛋糕，可選擇芝士蛋糕及朱古力蛋糕！除蛋糕之外，還有麵包：$14 ~ $15
價錢幾貴！款式不多！有牛角酥、肉桂卷....

曲奇餅：$25 ~ $30 ( 一小包 ) 飲品：

有機茶： $28 ( 100% 有機 )
Organic earl grey, Organic breakfast, Organic Spring Jasmine......

Coffee / Esspresso $18 ~ $32
Esspresso, capucinno, Mocha, Latte, ....

Milk $25
Chocolate $30