The Chairman    大班樓  

星期三的平日，我打去「大班樓」時，位侍應話要過了農曆新年先有位，我就唯有通知友人，是日試食要取消，但是，友人已經被「龍井菊花燻乳鴿」深深吸引，佢再打一次，加上佢三寸不爛之舌，竟然俾佢訂到2個位~ 不過要20:30還檯...

18:30到達，侍應話有客人取消booking，唔洗20:30前還檯，好o野!!

2個人叫o左3餸1湯2甜品

滷水豬下巴配蜂巢豆腐
本人唔愛食豬，但係都對e碟餸讚不絕口，豬下巴口感似豬耳，但似一隻冇豬軟骨o既豬耳，唔膩，滷水入味而純。蜂巢豆腐，似伴住潮州滷水鵝o既豆腐，不過個皮係趣，豆腐有豆香又滑，兩者一齊放落口，味道一流~

龍井菊花燻乳鴿
侍應話乳鴿太細，所以半隻價錢都俾足一隻，一上檯就聞到燻香，有好厚o既龍井味，但就食唔到菊花味，肉好滑，但就真係未免太細隻，冇咩肉食，好似食唔到o野咁。

雞油花雕蒸花蟹 (陳村粉另上)
花雕同花蟹已經係一絕，花雕引到花蟹o既鮮味，諗起都流口水，再加埋陳村粉索晒雞油花雕，食落去真係醉醉o地~

冬蟲夏草湯
2人share一碗，飲完成個醒晒，真係有冬蟲草味，真係好好飲~

百果腐竹粥
侍應請我o地1人1碗，唔食粥o既我，竟然愛上e碗粥，終於明白當暖肚同好舒服時，幸福o既感覺就湧上o黎，e碗粥唔係坊間事前磨碎d米，而係好結實o既功力，我真係有少少鐘意o左佢...

桂花杞子雪糕
好奶，冇咩柱花味，不過杞子大粒到好似提子乾，好明顯係自家製，愛奶的我就好愛吃~

杏仁茶
唔係我食，因為我唔愛吃杏仁茶，愛吃杏仁茶o既友話好有杏仁味，好好食。

服務態度
openrice大部份o既食客都覺得服務差，但係，我係持相反意見，侍應眼明手快，成日幫我o地沖茶，主動幫我o地換過茶杯凍o左o既水，令我覺得被尊重感覺。

用餐貼士︰因為佢有個398位 (4位起) o既套餐，可以食晒差唔多佢menu o既所有o野，所以4個朋友一齊去就最好!!

http://hk.myblog.yahoo.com/ultrabearhk/article?new=1&mid=1