Hin Ho Curry Restaurant    恆河咖喱屋  

同事推介呢度午餐好味又抵食, 今日就飛車嚟試吓! 行到門口, 見到有個印度人在爐邊下厨, 心想: 都幾正宗咁喎! 推門入內, 隨即聞到一陣好香的印度燒烤味, 感覺良好! 店內裝修得頗有印度色彩, (但燈光比較暗, 手機影嘅相有d黑) 一望餐牌, 午餐也有五六個選擇, 包括牛腩, 雞, 羊...等, 我就揀咗:
烤牛肋骨肉咖哩配Naan $38 - 午餐包餐湯及凍或熱飲, 粟米忌廉湯普通得很, 餐飲港式凍奶茶大大杯, 重唔駛加$ (如要印度茶就要加$), 主菜分三碟上, 燒板放了四舊牛肋骨肉, 份量不算小! 一般印度燒烤只有燒雞, 這裏比較特別, 竟然有烤牛肋骨肉, 亦是吸引我試的原因, order 時年青女侍應強調地說好好食! 唔講由自可, 講咗我反而期望更大! 牛肋骨肉烤得頗香, 但未夠腍, 味道則麻麻, 要點咖哩才覺得好食! 咖哩汁一碗上, 不太辣, 香口而帶點酸味, 可惜唔係好夠熱. Naan bread 就烤得剛好, 用嚟點咖哩認真一流!
整個餐係好味夾抵食, 下次會嚟試其他菜式!
順帶要讚吓呢度嘅服務, (除咗誇口話好味之外) 侍應生見我地食完, 竟然自動將牙簽奉上, 咁細心嘅服務重唔收加一, 難得難得!