九記冰室  

老豆係响澳門出世的, 但又話竟未去過大三巴, 都幾騎呢.
今日和他行上去睇吓啦.
但未行, 他已叫我和妹食個下午茶先~

橫街有這間小小的冰室, 就一試啦.

真的好冰室feel, 有相大家睇.
吊住的風扇, 卡位, 玻璃櫃, 真的好憓舊.
不過, 成個澳門都好似20年前的香港咁啦, 講開又講.

都想叫d特別野食, 看看menu, 有 "黃牛, 白牛, 紅牛, 黑牛".
咁係咩黎架?!
問吓阿姐, 哈, 原來黃牛係忌廉梳打+雪糕;
白牛係雪壁+雪糕, 黑牛係可樂; 紅牛當然唔係俾對翼你果種, 而係...
而係...
唉, 我和妹兩個竟都唔記得了
真係唔好意思...
o係度同大家講聲sorry...

另有葡萄牙式臘腸包及鴨胸包, 幾特別, 叫了每樣一個黎試吓.
檸茶好快有得飲, 好多檸, 正~

葡萄牙式臘腸包有3片腸, 幾薄吓; 個包係剛烘起, 熱辣辣, 正.
臘腸好似中式臘腸咁, 幾咸.

鴨胸包則有3片鴨胸; 味一般, 和估計的一樣.
每個包都係12蚊, 收費都係20年前, 仲想點呀...