Jumbo Kingdom    珍寶王國  

對這裡, 係有一個揮之不去的感情, 或許是與家人的早期回憶. 那張珍貴的四大天王合照, 正是係珍寶的大門口拍下. 當然, 張照片拍下的時間係樂壇那四大天王仲未出現的遠古年代. 小弟所講的四大天王並只係我跟三位堂姊/兄/表兄.

記憶已經好模糊, 這次再來係因為工事, 同外賓來這裡. 唔係的話, 基本上係無乜機會來的. 象徵式地搭完船, 來到這艘海鮮舫, 係完全無郁的感覺. 本來想坐出面, 但係實在太熱, 換了係入面坐, 感覺上其實係無乜特別, 又無乜景, 同一般餐廳好像無分別.

環境係幾好的, 都算見得人, 係那種好老土的中式格局, 仲有人幫你影龍袍照, 遊客相信係好高興的, 當然, 唔係本地人的玩意. 看看全場, 都係鬼比人多好多.

正常.

坐低飲了幾支啤酒, 跟著就落了去揀海鮮, 環境係相當一般, 沿路係經過廚房, 望落去都係不太整潔. 似乎不太適合帶外賓落去揀海鮮. 加上服務係好差, 行了一大輪都無人招呼我們, 一眾侍應只顧自己打牙跤.

宴客關係, 當然要了不少食物. 海鮮為主, 再加碟菜同雞.

椒鹽大瀨尿蝦17両 $476: 6分, 要了兩隻大的瀨尿蝦, 差不多$240一隻, 認真貴. 瀨尿蝦都幾新鮮, 不過好像椒鹽不太入味, 淡了點.

豉油王大花蝦14両 $490: 5分, 要了三大隻花蝦, 一隻要成$160, 真係好大隻,但係廚房好像失了手, 隻蝦係整得過老了, 蝦肉比較實. 唔知是否隻蝦太大隻, 豉油王味好像入不到蝦肉, 只係停留係蝦殼那層次.

芝士焗本地龍蝦伊麵底26両 $882: 4分, 這個真的好貴, 差不多$900, 但係龍蝦肉其實不太多, 龍蝦殼就好鬼多. 芝士係非常濃, 又非常杰, 過了頭, 係食唔到龍蝦肉的味道, 只係吃到那陣濃濃的芝士味. 平日的伊麵底應該好受歡迎, 但是晚的簡直唔惦, 跟芝士係連埋一齊, 太杰了.

突然想起從前海運的龍蝦, 好像水準更高. 至少係吃得好滋味, 係小時候一個幾深的回憶.

豉椒炒蜆16両 $80: 4分, 有沙, 都幾多沙, 當然又係無乜蜆肉, 蜆殼為主, 去入油就最好.

清炒露荀$110: 5分, 好貴, 份量好小, 露荀本身都幾鮮甜, 但係炒得有點老.

當紅炸子雞$125: 4分, 雞肉老了, 炸得太過乾身. 雞皮仲算脆的, 不過麻麻香口. 當然, 這裡係賣海鮮為主, 對這個雞係沒有期望的.

價錢實在係好貴, 埋單係$2637.80, 差不多$900一位. 海鮮的選擇其實不太多, 總算係新鮮的, 但係廚房係整得相當一般, 又好像有點抽水, 大大隻龍蝦出來的肉實在比較小. 抵食應該係0分. 海鮮檔的服務好差, 不過酒樓入面就幾好, 打個和. 總結: 完全沒有任何理由來吃, 以這價錢, 真係有大把選擇.

係時代巨輪底下, 這個曾幾何時好巴閉的景點又會否繼續流傳下去?