難得一日去到銅鑼灣做嘢, 所以一早鎖定去伊呂波食午餐, 因為之前去過食晚餐, 已經俾佢嘅牛肉拼盤同海鮮拼盤深深吸引咗, 而且, 喺openrice又見好多人話食午餐好食；難得去開銅鑼灣做嘢, 所以一早已經不作他想, 好彩, 工作可以一早完成, 可以喺1200點左右去到, 如果唔係嘅話, 我諗我都好難有機會食到, 因為我無訂到位! (因為唔知幾時先可完成工作!)
幸好未到午飯繁忙時間, 所以無訂位都俾我哋食到; 睇完menu後, 我就選咗「日本和牛肩定食」, 一嚟到, 嘩!ok喎! 睇落同晚餐嘅賣相相差唔大, 一百多啲嘅價錢就可以有日本米飯、前菜、蒸蛋同主角:日本和牛肩食, 真係唔錯!
前菜就無咩特別。
而個蒸蛋就真係好好好滑!仲要一啲都無我最怕嘅嘔奶味, 因為我最怕呢種氣味, 所以我已經好耐無食蒸蛋啦, 亦正正因為呢度嘅蒸蛋無呢種氣味, 所以令我有機會可以再食蒸蛋, 太好啦!!!
白飯---一食就食得出係用日本米煮嘅, 因為每一粒都係咁圓潤, 而且口感煙靭, 令到我覺得呢個午餐更超值抵食!
好!輪到主角和牛肩出塲啦。望上去已經覺得同晚餐食到嘅分別不大, 食落就更覺得係無將價就貨, 既有牛肉味又有平均分佈嘅油脂, 有些少後悔無加多少少錢加大!! 就連伴碟嘅冬姑都係新鮮好味嘅!!!
有咁好嘅燒肉當前, 又點少得叫支日本啤酒嚟飲呀?
另外, 同行友人就叫咗個「伊呂波套餐」, 就咁睇都覺得好抵食, 因為又有天婦羅, 有剌身, 有前菜, 有蒸蛋, 有燒肉, 有湯同日本白飯, 由於友人唔食吞拿魚, 所以我就食咗, 老實講, 以100大洋唔駛就可以食到咁豐富嘅嘢仲要有剌身, 我就覺得質素好正路, 至少塊吞拿魚我食唔到雪味同有魚味囉!!!
午餐嘅質素, 以咁嘅價錢嚟講, 我覺得真係無可挑剔, 俾100大洋左右嘅價錢而可以食到上述嘅食物實在抵食(或者係合理)。相反, 若想食到晚餐質素嘅話, 就會好失望, 而呢個亦係無可能發生嘅事!!!雖知道一分錢真係一分貨, 做生意、尤其係食肆喺現今真係唔易做嘅, 如果因為食午餐而食唔到晚餐嘅質素就俾個「喊」某一間食肆嘅話, 除咗反映呢個人太天真之外, 亦對呢門食肆太唔公平啦!!!

好耐之前, 經過門口望過個餐牌就已經想試, 但係實在有太多樣串燒想食啦, 無可能會一個人食得晒嘅, 終於都等到星期日太座得閒同我食一次啦! 去到門口就見到一大群人等位, 所以就一早攞定飛先,之後就去附近行下街, 結果, 前後都係要等咗差唔多一個半鐘先有得食! 但係原來係無白等架!!!
由於星期日嘅關係, 所以全塲爆滿!我哋兩個只能夠屈就坐一張細枱, 亦因為咁, 我決定唔一次過叫晒我想食嘅嘢, 我每次都叫幾樣, 一來可以慢慢食, 等所有串燒都可以趁熱食, 二來又唔會叫到成枱都係咁失禮同無位放。燒鰻魚---正正正!!! 外邊嘅皮燒得非常香脆但係一啲都無燶, 而肉身就非常多汁都嫩!!!極好!!!
牛舌---雖然只得三大塊, 但係用香料吊味吊得啱啱好, 非常惹味!!而且好爽口!!!又一佐酒最佳選擇!!!
雞腎—燒咗出嚟太細粒, 味道尚可。雞皮燒蝦---好抵食!!!5隻只係三十大洋唔駛!!!蝦就唔係大隻, 但係並唔重要, 重要嘅係用雞皮包住啲蝦嚟燒, 除咗有創意外, 兩者配搭得宜, 因為雞皮無味但係就燒到脆身, 再配以蝦肉嘅鮮味, 就令到一齊食時, 感覺到又脆又有咬口, 而且, 因為燒完立即上枱, 啲蝦殼都脆卜卜可以食埋, 正!!!!送啤酒一流!!!所以忍唔住叫多一串!!!海膽燒蟹蓋---我就係為咗呢一味而來!!! 可能真係希望太大, 所以有少少失望。未至於唔好食, 但係就海膽味唔夠濃, 同埋個蟹蓋無咩嘢食, 最唔喜歡係太多油!燒茄子---與其他地方食到嘅大同少異, 但係我就最唔喜歡有花生鋪上去, 因為好梗牙!芝士磨姑---又係crossover之作, 令到淡味嘅磨姑好惹味!!!連唔喜歡食磨姑嘅我都覺得好食!!!好!!!芝士翠肉瓜---又係一個有創意同非常好嘅配搭, 既食到有芝士味, 但係翠肉瓜又令到塊芝士無咁溜, 而且又食到兩者各自嘅味道, 好!燒蟹---價錢唔平, 要差唔多200大洋, 估到到會係咁細隻, 亦因為細隻嘅緣故, 所以無咩肉食, 亦令我發現咁細隻嘅蟹唔適合用嚟燒嘅, 因為內裡嘅水份容易燒到乾晒, 咁即係唔好味啦?!

上星期經過見到呢度咁多人食, 所以就想入去食下, 點知門口嘅哥哥話全日全塲爆满, 咁我就唯有另覓地方搵食; 今日心血來潮, 就試打電話去問下有無位, 點知竟然有, 不過, 可能係因為我話夜晚9點去嘅關係啦, 唔理啦, 最緊要係有機會去食一次啫!
由於訂位時哥哥仔話只留枱5分鐘, 所以我唔敢遲到, 但係都要等咗大約3分鐘至有位, 無問題, 始終人流方面嘅嘢唔係咁易控制。
睇完餐牌叫嘢食, 因為第一次嚟, 諗住叫住啲正路嘢食住先, 睇下好唔好食先再決定叫啲貴少少嘅嘢啦, 點知竟然話「本陣美國上級滋味牛肋肉」、「牛肩脊肉」同「巨大牛排肉」都無, 我其實只係想叫前兩者, 既然係咁, 我就唯有先叫「極上厚切牛舌」、「極上和牛骰子牛排燒」、「豬腩肉」、「三品盛合」(牛胃、牛柏葉同牛肝)、「牛胸肉」同一個「野菜盛合」食住先, 當然, 嘢食嚟到時, 又點少得食燒肉嘅最佳拍檔----啤酒呀!!!
等咗一陣間, 全部嘢差唔多同時間上枱。一睇就更明白點解咁平, 因為除咗「極上和牛骰子牛排燒」有8小粒外, 每一碟肉都係得6小塊, 雖然我入塲前預咗會將價就貨, 但係就估唔到會就得咁誇張, 一睇就知道我哋兩個人無可能會食得飽!(因為我唔喜歡同唔食飯嘅!)餐牌嘅食物相片同價錢幾吸引!!!!俾我見到我最喜歡食嘅內臟添!入到去一睇,我就更加知道同明白點解呢度嘅食物會咁"平", 一來裝修簡約, 二來一睇個燒爐原來唔係平時入枱嘅爐, 而係一大舊嘅放喺枱上邊, 而且有一條抽油烟嘅喉由天花落到嚟, 我就預計到今餐到會幾溫暖同要吸幾多油烟!「極上厚切牛舌」---厚切只係一個名稱嚟嘅啫, 與其他食日本燒肉嘅地方嚟比較, 根本就唔係厚切, 但係亦未至於取巧咁嚴重, 味道一般, 叫做食到啲牛舌味。「野菜盛合」---係有幾多款嘅蔬菜, 但係全部都太乾身, 一來因為唔新鮮、水份流失咗, 二來無水份嘅蔬菜用嚟燒嘅話, 不單止難燒, 而且只會燒到好似食肉乾咁會好難食, 我哋唯有用奉上嘅茶水點少少上各種菜度, 令到燒起上嚟易啲同無咁乾身嚟食。「極上和牛骰子牛排燒」---呢個係是日最好嘅一味, 因為用猛火燒晒咁多面將啲肉汁鎖住後, 就可以食到好juicy嘅牛肉粒啦, 而且肉味與脂肪嘅比例方面都較為平均! 食落感覺良好!!!「三品盛合」---牛胃我就已經試過燒得好熟、普通熟同啱啱熟三個方法嚟燒, 結論都係非常靭、咬唔爛同咬唔到呢三個, 唯一共通點係無味!!! 牛柏葉燒嚟食原來幾爽口, 但係味道都係麻麻, 最後嘅牛肝就已經係最好食嘅, 至少真係食到有肝味, 但係用嚟燒就唔及平時打邊爐咁好食, 因為乾身。「豬腩肉」---賣相好吸引, 肉與脂肪一層一層分得明顯, 但係食落同賣相就有些少落差, 我所指嘅當然係味道麻麻地啦!

由於唔夠飽, 同埋我都心知唔會再嚟呢度食, 所以就即管叫埋「海鮮盛合」、「牛腸」同一個「薄切牛舌」食, 一來真係想填飽個肚, 二來想食多幾款嘢，以便對呢間食店作一個比較全面嘅評價。「薄切牛舌」---一上枱就令我覺得一早就應該叫呢個而唔應該叫厚切牛舌, 點解? 因為你會發現厚切同薄切都係一樣咁厚同咁多塊, 咁又何必叫個貴十蚊嘅厚切呢?味道就同上述嘅厚切一樣, 即係普普通通囉!!!「海鮮盛合」---包括有兩隻蝦、兩隻帶子同5個魷魚圈；兩隻蝦嘅大細同餐牌上嘅相分別好大, 只係得平時食嘅基圍蝦咁上下大細, 但係一定唔係基圍蝦, 不過我睇唔出係咩蝦, 而食落就知一定係雪過嘅! 因為肉身過實, 但係都叫有啲蝦味, 而個帶子就幾新鮮, 帶子肉有咬口, 而個卵身都係幾鮮味同滑!不過都係雪過嘅! 最驚喜嘅竟然係個魷魚圈!!! 因為我無預計到燒嚟食嘅魷魚圈竟然會係咁鮮味同爽口, 完全唔會咬唔到!!!「牛腸」---同之前嘅牛胃一樣, 都係試過燒得好熟、普通熟同啱啱熟三個方法嚟燒, 都係得非常靭、咬唔爛同咬唔到呢三個結果, 共通點都係無味道嘅!!!!!!令我覺得浪費金錢!!!
另外, 我叫咗兩杯ASAHI啤酒飲, 因為本人試過食日本燒肉飲啤酒同燒酒, 始終都係覺得飲啤酒食燒肉比較夾! 我無叫到支裝嘅、反而我叫杯裝嘅, 貪佢平啲多啲抵飲啲! 估唔到呢度杯裝嘅ASAHI咁好飲, 同平時飲到嘅多咗一份新鮮、爽口嘅味道係平時飲唔到嘅!!!!而且, 由泡沫嚟睇(唔係由於唔識斟), 應該真係新鮮貨!
總括嚟講, 此店嘅食爐我就唔係太喜歡, 因凸出枱面嘅設計會令到客人易於感受到熱力, 而且又多油烟, 不過, 冬天嚟食嘅話應該真係唔錯, 尤其係坐係比較搶火嗰一邊, 因為一定會好暖!
另外,食物質素與價錢方面真係一啲都唔抵食!!!!!!點解???因為絶大部份嘅肉食都係得6塊 , 而每一塊嘅價錢平均就大約10蚊多啲；與同類嘅和幸或者伊呂波比較, 一個和牛拼盤有5種牛肉、而每一種有5粒或5塊, 價錢就大約由$390至450左右, 即係每一粒或每一塊係十幾唔到二十蚊嘅價錢, 但係後兩者嘅來源係日本和牛,而質素、味道就一定好食過呢度, 仲要後兩者嘅爐頭、裝修、氣氛及服務都比呢度好, 所以我就唔會再去呢度食, 亦因為呢個原因, 我先叫多三碟食物嚟食, 以免寫出嚟嘅食評有所偏差。
仲有一樣係要講嘅係, 一般食日本燒肉時, 都會有醬油奉上, 但係呢度就要自己係枱上嘅調味架斟, 我一拎起手就已經成手醬油, 即係無人清潔啦!二來, 啲醬油嘅味道..點講呢?.... 實在係普通貨色, 太重味精味, 所以令到燒肉嘅味道失真!!! 若此店各方面都不作出適當改善嘅話, 相信都係會俾食客所摒棄!!! 因為以價錢平作招徠此技倆可一不可再, 何況要食飽就一啲都唔平!
順便一提, 我倆口子竟然可以食到上述9碟菜, 真係少見!!!!而埋單就$580, 仲要係因為新張期內七五折喎!!!即係正價就$730左右啦, 作為一個消費者, 用正價嚟計, 同我提及過嘅兩間競爭對手相差唔多嘅價錢,但食物質素等各方面相差一段距離嘅話, 你係我又會去邊食呢?

已經第二次嚟呢度打邊邊, 但係就第一次寫呢間火煱店嘅食評。其實我應該一早就寫, 但係因為實在生活逼人, 呢度打邊邊有一個我非常欣賞嘅地方, 就係火煱料可以雙拼! 唔好睇小呢點, 如果兩個人去打邊邊嘅話, 呢一大賣點可以令到食物方面多咗好多選擇, 唔駛兩個人只係食得三、四樣嘢咁少!!!
上次就試咗呢度出名嘅老鴨湯底, 實在非常正, 真頭可以當湯飲, 但係由於今次想食多啲海鮮, 所以就叫咗個什箘湯底, 貪佢夠清唔會搶咗啲海鮮嘅鮮味。
1)本地手切肥牛---打邊邊又點少得牛肉呢?! 我個人認為牛肉係呢度比較弱嘅一環, 因為無其他地方咁有少少肥膏, 所以偏靭, 而且亦唔太夠牛肉味!
2)鷄子拼鵝腸---呢個就只係得我一個人食, 好在呢度有雙拼, 有得止下痕而又價錢實惠!!!
3)烏魚扣拼魚唇---前者爽口, 後者食落似花膠, 幾得意!
4)大蜆----價錢唔貴而又幾新鮮好味!有啲似貴妃蚌咁好味!
5)海中蝦---用竹籤篤咗後成30分鐘都仲係喺度彈彈下, 可見非常新鮮生猛!!!食落就一定彈牙啦!!!
6)醉鷄丸---呢度嘅招牌菜之一, 一定要涼咗先食, 如果唔係嘅話一定會熱親條脷!!! 真係好正同好特別又好食!!!
7)桶蠔---同喺街市買到嘅一樣, 但係就唔會收得太貴, 而且真係新鮮得嚟又好有蠔味!!!
8)蕃薯葉----呢個簡直一流!!!唔駛下下都係食皇帝菜或者唐蒿咁悶, 事關呢個真係好滑同好嫩!!!正!!!
我都知道打邊邊一定係人越多就越好, 因為可以高興啲同多款式食啲, 但係如果只係得兩口子而又想打邊邊嘅話, 呢度真係不二之選!!!

思前想後, 最後都係抵唔住黃油蟹嘅誘惑要係最後時機食一次! 好!就去呢間! 因為未去過! 去咗之後發現無揀錯, 因為同一般喺酒店入邊嘅食店一樣, 招呼非常好! 入到去諗到唔駛諗就叫兩個黃油蟹套餐先!
1)首先嚟嘅係前菜---一個係荷蘭豆炒帶子, 另一個係什箘炒蝦球, 兩者一食就知係雪過嘅食物, 但係又出奇嘅好食喎! 至少啲帶子有帶子味, 而啲蝦肉就沾上少少WASABI吊味, 令到人開胃啲一, 而且我係好喜歡WASABI味嘅!
2)菜胆翅---普通貨, 但係套餐叫有個翅食叫做點綴下, 味道同質素勉強合格
3)主角黃油蟹登場!!!!!---估唔到同廣告嘅一樣咁多油, 真係令我喜出望外, 叫人無可能忍口! 你會見到同食到每一個部份都係充滿蟹油嘅!!!正!!!!!
4)柚皮伴鵝掌---柚皮麻麻, 無咩味,而個鵝掌就只係一般飲茶時嘅貨色, 唔夠諗身!
5)干瑤柱伴菜胆---麻麻地, 個菜胆好普通啫!
6)小籠包---係, 無錯, 係一個普通嘅小籠包啫, 並唔係蟹粉小籠包, 可能食材來貨價貴咗!? 不過一都叫皮簿得嚟夠肉汁!
7)山水豆腐花---OK! 因為另以黃糖上枱, 由你加多減少, 唔會甜到漏!
另外, 呢個餐每兩粒就奉送一支花雕, 而且唔係太平價嘅貨色, 事關另一半唔飲開酒嘅都同我爭住飲囉! 所以一定唔會係辛口貨!
總結嚟講, 好彩自己選擇呢間海都食飯, 事關套餐相信都係間間一樣, 但係呢間就應該係身處酒店入邊,所以氣氛同招呼相信都比其他嘅更好, 物超所值!