早排剛剛開業時，呢間分店同其他分店一樣，門口總係一大堆人排隊等位，但都唔知幾時開始，已經冇咁嘅現象，晚飯時間7:30pm左右去食板長唔使等位...............真係冇乜邊間可以 !!!!! 我企向門口都考慮咗一陣，間野究竟有冇問題呢?

最後決定博一博啦，難得唔使等~

食落又正常喎，除咗碟吞拿魚之外，冇特別差喎，冇特別唔新鮮呀! 而且order完後又好快到，依家仲推出咗好多$9件壽司，都真係幾抵食~不過同以前比，板長嘅質素的確係低咗，以前覺得佢係好過晒其他同類型壽司店，依家只不過係佢其他同級~ 可惜!

話說我最愛嘅偶像牛脷文同佢男友豬脾安去太平館拍拖撐枱腳嘆豬髀餐之後，我就想嚟試下呢間太平館餐廳，我打去訂位時，仲樣衰衰咁問人可唔可以坐佢哋坐過嗰張枱，真係講出嚟都好難為情呀

不過佢地唔so我...........

我哋好變態呀，為咗盡量試佢出名嘅野，叫咗差不多4人份量，最後緊係要打包拎走啦 太平館係出名囉，不過我哋又覺得佢啲食物冇特別，而且又喎，冇咩興趣再幫襯了~

見到出優惠，話生日當天食自助餐有半價，而另一位只要用任何一張信用卡，並號碼最後有1 / 8 / 6 / 5 其中一個字，就可以享有75折呀~

生蠔：有2款，好新鮮~焗蠔：有4款，焗到半生熟，剛剛好~蝦、蟹拑、龍蝦仔(有膏架)就最好食，其他海鮮一般啦~鴨肝勁正呀，正到食完又食~我有最愛嘅凱撒沙律，係職員攪拌嘅，我覺得太多醬了~羊架ok，牛就太熟太乾~比目魚，好滑好好食~燕窩燉蛋白.....又係勁正，可惜只可點一次~至於熱盤都好多選擇，試唔晒全部，其中炸天婦羅唔好食，唔怪得冇咩人拎啦~

生果款式唔算多，但甜品就多到試唔晒，而且有多款Haagen-Dazs雪糕呀~~~最後，餐飲塊茶餅勁好食，係肉桂味，不過每人得一塊咋~

用訂酒席時送嘅$500 cash coupon，補多少少錢就可以食到今餐喇！
可惜味道真係麻麻，如果要俾錢，真係唔嚟食

唯一覺得ok嘅係甜品Buffet，以幾十蚊一位嘅價錢，都算幾好，而且有Mövenpick 雪糕，值回票價~

訂位時職員已問定慶祝什麼節日，為的是有特別安排，就係師傅表演用雞蛋寫字喇，雖然失手咗好幾隻雞蛋，但最後亦順利完成五隻大字"結婚一週年"，好驚喜呢 ^.^

鵝肝蒸蛋 ~ 第一次食，好滑，好好嘅配搭~
龍蝦 ~ 用埋龍蝦頭入面嘅膏嚟整汁，超讚!!!!! 不過一隻龍蝦仔要2個人分，份量少，唔夠喉呀!!!!
龍蝦湯 ~ 普通
銀雪魚 ~ 超讚!!!!! 估唔到銀雪魚都可以咁好食，煎到外皮脆卜卜，但入面又唔乾仲好滑~
鵝肝多士 ~ 超讚!!!!! 大大件每人一件，好滿足!!
和牛 ~ 落單時職員推介upgrade另一款和牛，我地揀咗中價加多$208，味道ok，質素就因為冇得比較，但感覺普通，而且份量好少~
蒜香脆肉瓜 ~ 好香，好味
秋田炒飯 ~ 訂位前睇過食評，個個師傅都會用材料堆砌一些圖案，然後才炒飯，但唔知點解我當晚嘅師傅冇整，令我有啲失望。
紅豆燒餅 ~ 紅豆料如果可以甜多少少更好
芝麻+綠茶味雪糕 ~ 正常貨色