同朋友聚舊，因大家第二朝都番早，所以揀咗間近近哋嘅「本地」（即荃灣）西餐廳。

不過真係唔係好掂。

開支加洲赤霞珠，開嗰個女經理（？）連基本開酒俾客人試酒嘅步驟都唔曉，喳一聲斟半杯出唻，完全冇西菜嘅manner訓練。講番支酒，唔得，好dry，攤好耐都唔滑，有Ｄ難飲。

湯：唔熱兼冇驚喜，完全冇印象。

牛扒：冇肉味，唔juicy，快餐店鐵板餐都好過佢。

蜆肉寬條麵：冇汁、冇味，唔知食緊乜咁。

焗魚柳：唯一一道有Ｄ味道嘅菜色。

唔會再幫襯。

$188 二人餐有肉骨茶，招牌雞，油炸鬼，炒通菜及兩碗米線，兩杯飲品。

菜：香氣夠，但唔夠味，淡嘅。

肉骨茶：好多肉但唔肥，女待應話要用肉骨茶湯做米線湯底，但唔單止毫冇肉骨茶香，連味道都冇，完全淡茂茂！

雞：食唔出點解係招牌嘢，同燒味檔油雞有咩分別呢？完全分唔到，可能咁就係特色啩！

最正係油炸鬼及咸檸七。

我諗我唔會再去。

今日（星期日中午）本來建議去石硤尾食魚旦粉，但朋友反建議去呢間麵店試吓，又好，就佢一次。

點知領嘢。

十二點九去到已經有＋幾人係門外候位。攞住張飛，61號，都知道要等吓。本來已經望見家鄉嗌到58號，點知叫冧巴嗰位小姐突然話要翻轉頭由49號再叫過，結果......

由冇雨等到大雨，由大雨等到細雨，好狼狽。

乜唔係過籌要再排過嘅咩？如果係咁，嗰位小姐一聲令下翻轉頭由尋日38號開始叫過咪出年都排唔到！？

算！諗住Ｄ嘢好食就放過佢，點知......

九州拉麵Ｄ海帶好腥，搞到成碗麵都好腥。

香蔥拉麵醬油味湯底唔夠濃，麵身一般，唔係好似食評講咁彈牙。

連清酒都冇其他行家咁有酒味......

麵身及湯底都係中環札幌較好。

兩間都係舊區僅有嘅西菜，兩間都係以「廚」出名，等我試吓做個比較。

先講價錢：普羅旺斯（普）唔賣酒，三道菜，唔計自來酒，每人$375；新馬鞍（新）賣紅白酒，全部$190，開咗一支，連食物，三道菜，每人$335。單計食物，新平足30%。

頭盤：普哋沙律成舊水，但真係俾足料，有新鮮沙律菜，黑醋及莎樂美腸；新就比較普通咗Ｄ，問佢攞黑醋，係甜中帶微酸，可能我唔曉，似老抽多Ｄ。

湯：普嘅湯係熱嘅；新嘅湯好耐都唔上，要加錢嘅龍蝦湯唔係咁熱，味道似罐頭嘢。龍蝦湯似乎都係Jimmy’s Kitchen好Ｄ。

麵包：普嘅係法式蒜蓉飽；新嘅飽樣樣有Ｄ，有送鵝肝醬，朋友話以前尖沙咀諾曼第嘅鵝肝醬好好多。

主菜：普嘅魚及牛扒都係一絕，雖然兩個主菜相距差不多一個鐘而我只用咗三分鐘食個扒；新嘅黑豚肉係好腍，但係凍嘅！而且無味！！個海鮮天使麵都係好淡，真係無味，落埋鹽都唔掂。

仲有一個新自行介紹嘅花甲，嘩！好腥！食唔到！新好好人，主動換咗個炸煙肉條俾我送酒，但連天使麵裡面嘅花甲、青口都係好腥，講真，有Ｄ想嘔。

甜品：普嘅甜品要付款，法式燉蛋，幾好吖；新嘅係連餐嘅，西瓜加朱古力粉，結果去小店食多餐。

紅酒：普嘅係係新蒲崗買嘅，half bottle，所以因食物唻得遲而好快飲哂；新嘅係house wine，紅白都係$190，揀咗西班牙，唔錯，真係幾易入口。

如果你時間多，又願意俾多一二百，普羅旺斯真係好好多，不過記住帶兩支紅酒去或帶一支Magnum，否則真係等到吽。

想食意菜，見呢間食評唔錯，去試吓。

環境真係黑孖孖，相當逼，典型小餐廳(bistro)格局。

叫咗porcini risotto，蜆意粉及盲鰽，甜品係意式燉奶。

三個主菜中只有盲鰽okay，porcini risotto含太多芝士，超「漏」，兩啖後唔想食。個意粉好淡口，冇乜酒香，而且有ｄ蜆成口沙。個甜品則正常。

張檯極細，但餐廳會用好大好大嘅碟，一次過唻晒三碟，但餐廳似乎「無動於衷」，擺低就想走，冇乜「意欲」幫你諗點解決–一張細檯三個大碟，係咪鼓勵食客唔好叫咁多呢？