佢啱啱開舖時唻食過午餐同晚餐, 試過佢o既雪菜湯年糕, 餃子拉麵, 回鍋肉抄年糕, 小籠包, 綿花糖白免仔... 都幾好味, 招呼幾好, 價錢合理, 食完都好滿足. 幾個月冇去, 上星期與同事再去食lunch, 發覺完全變晒質...
我叫咗餃子拉麵 ($28), 同事叫咗套餐B - 雲吞米線($25) --- 話就話叫做套餐, 但其實只得一碗麵, 如要熱奶茶, 熱咖啡(只有呢兩款飲品選擇)都要加錢... 而呢間上海舖竟然連豆漿都冇賣!!! 我哋仲叫咗一客小籠包.
我碗餃子拉麵足足等咗20分鐘先上枱, 而當時我同事碗雲吞米線已食完... 麵的份量多得驚人, 本來我等咗咁耐先有嘢食係好肚餓, 但我點都食唔晒, 食剩咗三份一; 餃子/ 雲吞材料同味道完全一樣, 分別只係雲吞皮薄d, 水餃皮厚d, 同包法唔同, 又細細粒, 仲每碗得嗰4粒, 到喉唔到肺咁. 湯好淡, 淡到食唔到係用咗咩唻煲; 我哋同店裡一個員工提意見麵太多, 食唔晒好浪費, 如果減d份量但俾多一粒水餃/雲吞, 會好好多, 個員工竟然話: "好多客都有咁o既提議, 但做廚o嗰d人全都係老闆, 佢哋都堅持不變."
食完兩碗麵, 小籠包仲未上枱, 一問之下原來係漏咗單!!!
最最最大問題係成間舖充斥住一陣"地拖味", 咸咸臭臭咁, 本來我一入間舖發覺有陣臭味都想走, 但同事話其他食肆好難搵位, 是但啦... 咁就留低咗, 真係好後悔.

其實今次食佢o既麵條都依然覺得不錯, 每條oo既粗幼都有唔同, 似係人手拉出唻, 好香麵粉味, 質感都好好, 哎,可惜只得麵條做得好係絶對唔夠... 真係好失望, 冇下次....

同男朋友想食餐平平地晚飯, 同事推介公司附近呢間美詩餐廳.

叫咗兩個套餐:
1. 咕嚕魚柳+老火湯+`凍青蘋果綠茶
2. 焗豬扒飯+熱金桔蜜

- 咕嚕魚柳 -- 即炸即炒, 好味
- 焗豬扒飯 -- 好味過大家樂同美心好多, 豬扒又香又爽, 個汁味道濃淡剛剛好, 炒飯係炒到粒粒粒"金包銀", 真係好正
- 老火湯 -- 有料到, 真材實料,似媽咪煲嗰d, 好味
- 飲品 -- OK喎, 熱金桔蜜杯邊同外圍好乾淨, 如果喺其他地方叫熱飲, 經常會"黏立立".

除咗食品好之外, 從店內環境, 枱面, 枱上o放糖同調味料的器皿同其他食具都睇得出間舖衛生做得好好.

而有個女店員(唔知係咪老闆娘)o既服務態度好好, 見佢同其他伙記同d食客有講有笑, 信相大多做熟客生意.

埋單$76. 感覺良好, 我會再去幫襯的.

星期五同男朋友去荃廣Oliva晚飯, 全場客滿, 因為冇book位, 8點去到等咗半個鐘先入座. 店內裝潢不錯, 全部係梳化位, 昏暗黃燈, 感覺溫暖

免費供應的意大利面包. 我記得喺delifrance有得買呢種包, 外型好似一個四方型o既枕頭,上面有一層白濛濛的麵粉, 點黑醋同橄欖油食, 不錯,

點咗:
是日餐湯 <忌廉西洋菜湯> --- 略咸
<什菜湯> --- 味道好濃, 男朋友好鍾意
<牛油焗田螺> ---略咸, 但個香草牛油汁幾好味, 於是我哋要多一籃免費面包點唻食
<意式濶麵> --- 太咸又大酦, 好"漏"...
<意大利海鮮飯> --- 味道同口感都做得好好, 但冇乜"海鮮", 如圖所見, 只得一隻墨魚同一隻青口
<蜜汁焗豬手> ---, 好正!! 皮脆肉嫩, 啖啖肉, 真係好好味道!! 連伴隨o既焗薯塊, d菜同個汁都超正, $98一客算抵.

仲order咗一杯涷檸茶, 紅茶味幾香. Menu上話有得免費refill, 但好奇怪only refill 紅茶, 唔會加檸檬同冰俾客人的.

埋單$381 (連加一)

昨日4人去咗荃灣廣場間POKKA CAFE晚飯, 今次TARGET係食夠二百蚊, 就儲夠8個印仔可以做會員, 咁跟住一年去食都有85折.

本身我儲印仔嗰張優惠卡已經享用三個月臨時85折, 並送一杯"士多啤梨新地併迷你芝士蛋糕" - 幾好味, 我好鐘意食新地裡面脆卜卜, 大大粒o既甜合桃, 杯內有一件好細o既cheese cake, 芝士味濃郁, 可惜size好細, 每人食得一啖.

"蟹肉蕃茄海鮮意粉"令我一試難忘... 配料有蟹肉, 青口, 魚肉, 大大隻蝦 , 墨魚, 帶子, 鮮蕃茄肉, 紅黃燈籠椒, 伴意粉o既汁做得好出色, 香濃惹味.

"滑蛋吉列豬扒飯定食", 一湯碗飯同一小個魚生沙律同一小碗豉湯, 只屬一般, 收$83太貴.

"小食併盤" - 有炸薯角, 炸洋蔥圏(點TAR TAR汁), 煎迷你漢堡扒, 檸檬雞膇, 烤豬肋骨. 漢堡扒好正, 好JUICY, 其他小食都ok, 唔錯.

"醬爆大蒜雞球" - 好奇怪, 上桌時發現賣相同MENU上的根本係兩個樣, 我又食浯到大蒜香, 只係有d燒汁浸住(如圖). 我記得之前喺旺角雅籣間POKKA食過, 個樣係同MENU裡一樣的, D雞球同D大蒜係炒到係乾身, 只有少少紅色o既汁黏著表面... 有個叫Mandy o既個經理話叫廚房做過俾我哋, 不過我話唔需要啦, 其實碟雞唔難食, 只係我覺得貨不對辦啫...

"沖繩黑之糖咖啡新地" - 佢有咖啡同黑糖兩種啫喱, 加一球雲厘拿雪糕同有D果仁碎, 好好味呀!! 下次我會再叫呢個甜品!

荃灣區三間POKKA我都試過, 昨日係我第3去荃灣廣場新開呢一間食, 覺得佢D嘢整得最好味, 環境都係最好的. 但POKKA o既烏東同拉麵好貴, 但味道唔郤及不上味千拉麵, 意粉, 焗飯同甜品係最值得推介的.

上個月尾第一次去呢間”大嫂甜品", 係住喺西營盤o既朋友帶我去, 佢話呢度o既朱古力燉蛋(凍)好好味, 就去試吓. 去到大約下午3點鐘, 朱古力燉蛋已經賣晒, 要等到夜晚先有, 我哋就叫咗合桃露配燉蛋(@$22).

佢係半碗凍o既燉蛋上面加上半碗熱o既合桃露, 好香濃, 好滑, 而且少甜, 面頭仲有d脆卜卜, 烘烤過o既合桃碎, 好耐都冇食過令我咁滿意o既糖水啦! 比起”大良八記”同”滿記”, 呢度o既合桃露實在係太出眾啦!

我哋仲叫咗煎蘿蔔糕($8)同卥水豬頸肉($15), 但前者造得太粉, 後者好多肥膏, 質地好軟似肥叉燒, 唔係咁好味...

到咗3月11號, 我帶咗另一個朋友去, 都係食咗合桃露, 再加多碗杏仁露. 合桃露依然係咁正, 我朋友都欣賞; 而杏仁露o既味道就同其他舖頭差唔多不過比較杰身, 唔會水汪汪, 都算好味.

到而家兩個禮拜冇去, 我好想快D又去食令人回味o既合桃露, 同埋要試吓朱古力燉蛋. 可惜o既係地點唔就腳, 如果搭電車去可以喺”創業廣場”落咗車行一陣, 如果搭巴士, 5號同10號就差唔多可以去到甜品店o既門口落車.