食完飯唔食甜品點夠滿足呀？！

朋友仔要了朱古力雲呢拿雪花冰。保持到水準，好香好滑。我梗係要分享下啦！

我要了熱白果腐竹糖水加三粒芝麻湯丸。糖水好滑湯丸好香，我當然都會同朋友仔分享啦！我好鍾意食芝麻湯丸，更加鍾意片糖湯丸。希望泛后甜品嘅老細睇到可以考慮下加推啦！！！

點解我地去到邊到食野都嘈過晒隔離檯嘅？！　〔朋友仔：我好文靜架，得一個人嘈之嘛．．．〕

Baby同縮水胸靚仔球賽激戰過後，係天意安排下就黎到旺記嘆海鮮餐啦。朋友仔面對我呢個強勁對手，幾乎散晒咁呀。
當晚差唔多９點去到，全場爆滿。好彩等左５分鐘就有位。

今餐好豐富好滿足：
1) 白灼蝦 -　蝦好鮮甜呀！輕輕點下豉油已經好好味啦！朋友仔見我每食完一隻就放一隻係我個碗到，驚餓親Baby呀。好細心！
2) 炸bb乳鴿 - 乳鴿好入味呀！朋友仔係咁點淮鹽，我無加任何調味料都覺得好好味呀！
3) 薑蔥炒蟹 -　雖然食到隻蟹時已經灘涼左，但都食到隻蟹好鮮甜。謝謝朋友仔幫我拆蟹蚶！朋友仔，蟹蚶肉真係好甜好滑架！
4) 辣酒東風螺 -　我唔係好食得辣，呢個東風螺辣得黎都易入口。又係個句，好味道！
5) 椒鹽鮮魷 -　嘩！鮮魷好新鮮好爽口！正！　〔朋友仔：有人仲好失禮因為頂唔住熱將已經放入口嘅鮮魷放返落碟到呀！天呀！究竟我同緊咩人食飯呀？我真係命苦．．．〕
6) 兩支藍妹 - 上次食飯時你多次提出因為要揸車所以無得飲酒未能盡興，所以今餐一於要補返數。

今餐有美食有美酒，簡直盡興到爆呀！
認真的無聊的理性的感性的都可交流一番，相信我倆前世必定經常行善積福了！　〔朋友仔：下！！！會唔會係調轉左呀？我覺得我好命苦喎．．．有個傻嘅．．．死低能怪．．．〕

Baby與39寸白朱古力胸．．．咪住先，就現場所見無39寸喎！既然如此我就改口叫朋友仔做靚仔啦！（雖然都好似．．．）
我倆已經接近五個月沒有見面了，卻也未受時間所考驗，親切依然。是因為一直保持聯絡嗎？

朋友仔被門口嘅達利雞照片所吸引，造就了一頓美味可口滿足的晚餐。

我們坐在露天靠門口的位置，當晚天氣微涼，十分舒適。
朋友仔對露天位置的壁畫十分讚賞，以外觀而論不是我杯茶，但我也十分欣賞其背後的意義。大同世界。
點菜後我們到一樓賞賞畫輕鬆一下。看到某幾幅畫和相關的文字，猜測畫家是否經歷了點傷心事呢。

主角出場了：　
1) 巴哈馬火腿雞肉露荀 - 原名好長，但我唔記得左。火腿略咸，但配襯清淡的雞肉和露荀，有其略咸的道理。伴碟的沙律菜很新鮮。朋友仔好可惡，同我搶菜食呀！　〔朋友仔：手快有手慢無呀！〕
2) 達利雞半隻 - 雞肉十分鮮嫩，果然係招牌菜！配以清淡嘅醬汁，完全食出雞有雞味。即使係雞胸部份都十分嫩滑！誠意推介，必叫之選。我豪不客氣大叫：我要食雞脾！朋友仔望著我眼泛微笑，然後細心地把少許雞脾肉奉上。先照顧我的肚皮，才平息自己肚子的投訴。還要我想食那部分也依我的！朋友仔，我是由衷享受你的細心照顧。
3) 意大利風情薄餅 - 有辣肉腸和洋蔥，還有我忘記了材料。如果餅底薄三分一，便簡直完美了。雖然有辣肉腸，但入口不覺有辣味。所有材料醬汁配搭起來十分香口。　　
4) 檸檬薑密花茶 - 是夜朋友仔揸車，所以未能暢飲一番。聞起來的味道很特別，配以蜂蜜另上。我的論盡於自己動手加蜂蜜時便現形了，還給朋友仔嘲笑一番。最後當然還是朋友仔細心照顧我才可以繼續好好享受花茶啦。　〔朋友仔：粗重野都係交比我做啦，我都好享受照顧Baby嘅！〕
5) 木槺蛋糕 - 嘩！好味呀！入口極像雪糕，之後有種很香滑的芝士味留在口中。
6) 朱古力心太軟 - 嘩！好味到震呀！朱古力唔太甜，外層蛋糕又香又軟綿綿。入面嘅朱古力醬係溫暖嘅，亦唔覺漏。好味到我食完第一口，本能反應將個碟拉向自己！於是俾讀B神探靚仔識穿我想將個心太軟據為己有，但朋友仔又點會比我得逞呢！一口朱古力蛋糕一口雲呢拿雪糕，好有冰火感覺呀！

我很享受跟你食飯時隨意的閒聊，完全的放鬆自己。不用扮斯文不用苦思話題不用掩蓋沈默可以放聲大笑可以盡情享受美食，也真的很享受你細心體貼的照顧。 　

食飽飽當然又是指定動作啦!

朋友仔要了
芒果雲呢拿雪花冰 - 保持一貫水準，好味道！入口軟綿綿好似食緊雪糕咁！如果我狀態良好一定會同朋友仔爭食。

我要了
黑白有滑 - 豆腐好滑，但無豆腐嘅香味。配黑芝麻汁同腰果碎甜味剛好。
熱西米露 - 好香好滑，還是傳統的中式糖水合我心意。

朦朦朧朧的寫完食評了，傷風感冒藥的威力真的不可看小。

親愛的，拍拍、拍拍、拍拍......

剛剛讀過之前的食評，原來，上次跟你見面是6月16日。見面時的親切感覺令我忘記了，已經，一個月了。
跟你打波是很愉快的事情，只因有你的投入。可以盡情發洩，直至汗流乾為止。

打完波又是晚飯時候了。
1) 菜莆花生 - 菜莆咸酸菜花生全部都是我喜歡的飯前小吃，於是，會爭食囉！味道不過不失，不妨一叫的小吃。
2) 杬豉炒田雞 - 田雞炒得過份熟，肉質不夠嫩滑，但d醬汁幾好味。
3) 蒜蓉蒸海蝦 - 海蝦無乜肉唔新鮮，只係得蒜蓉味，最好味係粉絲。
4) 鹵水鵝片 - 正！好有鹵水鵝味。(即係點呢?唔好意思我唔識形容鹵水鵝嘅味道)
5) Asahi啤酒一支 - 是夜我有點咳喉嚨有點痛，抱歉未能跟你暢飲。
相信正記最拿手的小菜是鹵味，今晚鹵味以外的菜式只是一般，但以此價錢味道是合格的。

親愛的，無論順境逆境，我都支持你。