銀座藏人裝修後價錢比以前貴左($268加一)，食物款式同以前差唔多，以刺身為主。刺身：試左三文魚、鱆紅魚、甜蝦、帶子、赤貝、螺肉。
除左赤貝係好孤寒咁切絲之外，其他種類既刺身都算大舊。最中意食甜蝦，隻隻都連頭上好新鮮，亦好大隻，好鮮甜。鱆紅魚幾爽口，帶子好鮮味，赤貝就可能因為切得太細條令到D味好淡, 無咩味道。

壽司：款式大部份都同刺身相同，試左刺身以外o既燒牛肉、火炙三文魚同軟殼蟹卷。
燒牛肉味道一般，無咩驚喜，牛肉太薄同埋有少少過熟，舊飯亦比較大舊，不宜多吃。
火炙三文魚比較淡味，如果加上沙律醬燒或者鹽燒會比較好。

串燒食物：試左鴨舌、牛舌、雞翼同雞軟骨。
串燒應該係即叫即燒，熱辣辣上檯，燒得好香口，肉質亦好嫩滑。
最中意係雞軟骨同鴨舌，配埋醬汁燒唔會燒到好乾，仲保留到肉汁，食落亦卜卜脆。

炸物：試左炸蠔、忌廉薯餅、蝦天婦羅。
炸粉唔會太厚，樣樣都炸到好鬆脆。

舊舖結業之後，隔左好多個月後麻酸樂終於回歸淘大。新舖比以前大，不過座位擺得有D擠迫。

叫左個金銀蛋芫茜湯底米線，配料揀左雞軟骨丸同豚肉。

(呢篇唔係食評，純粹分享排隊經驗，最後都買唔到曲奇，好可惜)

朝早七點幾到達，店內已有職員準備，而店外有幾十人排隊。聽到排頭位o既人話凌晨四點幾已經黎到商場門口排，等到商場開門時就入店舖門口排隊。 排既人有好多都係內地遊客，有D仲帶埋大o急黎掃貨。

店員後來開放店舖隔離o既後樓梯俾人排隊，呢個時候先發現原來有唔止幾十人，係有接近一百人（我一路行一路數住）！由二樓排到一樓，由一樓排到地面，地面環境非常惡劣，後樓梯o既出口係一條充滿垃圾o既後巷，加上當日落雨，垃圾味經過發酵，味道真係好臭，最後排左陣隊都係忍唔住要走，放棄左。

排隊排到落後巷，要聞住垃圾咁排係意料之外o既事，不過相信Jenny Bakery開放後樓梯俾人排隊已經係比較好o既安排吧... 因為如果俾人排o係商場一定會阻住其他店舖做生意。

下次要買都係再早D起身，或者避開新年時間買吧。

見店舖既裝潢都不錯，餐單選擇唔少，野食又o岩食，於是就入左去試下。
叫左個海南雞飯，有雞、菜、油飯，仲有一個湯。
叫得海南少爺，海南雞飯應該係佢既招牌菜，但係一食舊雞，真係好令人失望！
冇咩雞味，完全係雪藏雞，上碟既雞凍之餘，雞皮同雞肉之間仲要有D已雪成o者喱狀既雞汁。
雞既味道亦過咸（無點醬油就咁食已經覺咸），完全唔及格！

另外，呢度收每位茶芥$8，都唔係問題。最大問題係佢D茶一D都唔好飲，好似涼茶咁苦苦地，寧願飲水，感覺好似被屈錢。

第一次o黎隠家拉麵工場，其實呢度食既唔係拉麵，係沾麵。
menu有三個湯底：白、黑、紅。同拉麵唔同, 呢度湯同麵係分開上, 湯底會比較濃, 食法係夾少量麵條點落D湯度, 一啖一啖咁食。店內都會有圖片說明教你點食。

試左白湯, 應該係無咁濃味的一個。(黑湯係黑蒜油, 紅湯係蕃茄辣醬。)
碗湯雖然細細碗，但係好多料：有豚肉、糖心蛋, 筍, 紫菜。
麵條可以用煙煙靭靭黎形容, 軟硬適中, 而且唔會黏埋一起。
湯底好濃好鮮甜, 食完麵之後可以要求加清湯落碗濃湯再直接飲, 不過由於好飽所以無飲到, 同埋飲完應該會幾口渴!

估唔到西九龍中心都有咁高質素, 價錢又相宜既食店, 值得推介!