陳根記 (Moved) New Location

去陳根記如果唔早到，就要靠彩數先搵到位，因為一定爆，食飯鐘數係超多人，要有位就要四周巡邏，睇下有冇d就食完嘅枱，然後就好無癮咁企喺人哋後面趕客，無計搵食艱難！ 所以我d街坊客會選擇早d食，六點前去到，搵個位近廚房，因為坐角落，好難有人招呼你。六點零五分佢哋先肯落單，所以早去都唔洗急，洗下杯洗下碗，諗定食咩就差唔多。 頭盤係腐竹卷$60，其實成日坐廚房隔離，見佢整腐竹卷，好似特大春卷，好香囗。今日終於試咗，外脆內軟，內裡紅籮白、肉絲、雜菜等等，配魚露好野味！ 叫咗Washabi手撕鷄，叫咗半隻$100，例牌$68，但上次例牌唔夠食物，所以今次叫多d。 咕嚕班塊，班塊香脆，魚肉亦有味，上菜係熱辣辣，好有鑊氣，咕嚕汁酸甜適中，送飯一流。 加多個蒜蓉油麥菜，好大碟，有鑊氣，唔算太油，不過都油油地。 整體陳根記係好正嘅大排檔，健康唔健康就見人見智，不過食完唔會囗渴，感覺唔太味精唔太喊。 服務唔算差，中規中矩，都會理下你，唔會黑你面，有問有答咁，一定唔會有大酒店笑容，幾廿蚊食一餐，張就下啦！ 溫馨提示：如果去大排檔想飲支裝汽水，就要出去後面間士多買入去飲，陳根記係只有鑵裝。