Noble House (Changed Hand)

最鍾意食香口嘢，食西式早餐只愛魚柳。所有連鎖店食過，星期六日响就近區內試勻哂，最好仍然係Noble House。有一排我差唔多個個星期日都去叫同一個餐，冇去好一陣子，今早冇嘢食又好自然咁去咗呢度。老闆娘見到我已經問係咪要早餐C配即磨咖啡，我當然冇異議。呢度嘅魚柳，據講係老闆自己去街市揀，番嚟自己醃。外皮麵包糠炸到脆卜卜唔油，而且用咗香草醃製，咬落啲魚唔係雪藏到冇哂味，而且唔會炸到乾爭爭仲好滑溜。店方好細心咁將拌碟嘅茄汁豆暖過先上。連薯蓉都落咗心思，雖然唔係用好多牛油同cream食落有啲嚡，但除咗全蓉仲有粒粒薯增加咬口，拌以香草食落有香味又冇咁漏。抄蛋唔係用好多cream所以唔滑但食落都幾有蛋香。多士是烘底微焦，上面再捈牛油，又脆又軟又香非常討好。蕃茄肉碎通又係我嘅至愛，通粉唔會過冧，蕃茄湯用咗新鮮茄加膏又夠味。稍為失色係杯咖啡，唔夠甘香。