開心餐廳小廚 (Closed)

冰鎮咕嚕肉： 外脆內軟，值得食。 $98 大概20 粒， 同茶餐廳比較有啲貴，同大排檔比較就差不多其他食品： 睇完食評之後，我沒有試，可能好吃，暫不作評論老闆： 街坊的感覺，態度ok, 不會特別熱情，但每逢叫佢必有反應。這款好。

味道差，送到黎嘅發泡膠飯盒全部融晒都算，漏送食物過嚟，同佢講返，仲聲大夾惡，態度惡劣，最終沒有補發食物給我，亦都沒有退返錢俾我，明明錯的不是我，唔知點解要咁樣受佢哋氣！

叫咗三盤餸 噴火辣辣炒牛肉78蚊 完全唔辣 牛肉夠嫩口 不過勁咸 蝦乾大豆芽78蚊 大碟有蝦乾同腌蘿卜 不過都係勁咸 最後係重頭戲招牌奇趣雞煲168蚊 味好濃好咸 不過無乜肉 聲稱有半隻多d嘅雞 不過食落得骨頭 仲有冰鮮雞雪藏味環境尚算幾好 唔會好逼 可能因為無乜客 不過乜都要另外計錢 水都唔比一杯 要問佢拎 仲要好不滿咁比 白飯又要另外收錢 飲品更加唔駛講啦 同附近同類餐廳比真係差得遠 呢間真係太孤寒啦 如果唔係附近執咗間 其他又多人等位先唔會食到d咁伏嘅餐廳一句到尾 真係唔扺食 唔會再食下一次

食幾次 幾次態度都差到核爆問佢拎餐牌又丟比你問咩冇咩 禁開咩餐廳眼啤啤 唔想做生意唔好做啦講真小炒ok既 因為附近冇咩好食佢環境尚可就入過去食下午茶 第一次ok既跟住後面就慘了有次想食早餐以為開左啦 見佢開晒門個個企係到咪推門入去（又冇掛休息之類）鬼知你未開門咩 又比人炮轟出返黎時隔禁耐以為態度好轉點知頭先入去都係禁 真係未試過寫食評幾好食都背隻骨落啦 態度係差到你想夾硬搵野叫黎食都谷鬼氣未見過依家做生意禁既態度 禁唔憂做祝你生意興隆啦 反正對面禁附酒店 都係做同胞生意架啦👍🏻

之前有次放工太夜唔知食乜好，又唔想太食飽，經過呢度隨便係餐牌揀左個芥末牛柳粒外賣，一拎到時覺得好細盒，七十幾蚊無湯無飯無野飲，都幾失望，但反到去開黎食，牛味好香濃，又夠林，炒得好有火喉，調味亦做得好好，即刻覺得七十幾蚊原來係抵食！今次就試下佢既紅酒牛尾，lunch套餐所以平好多，五十幾蚊大大盒有飯有野飲。一打開都幾香，牛尾份量唔多，炆得好林夠入味，一邊食個咀一邊黏住，勁多骨膠原，仲有一定要啜骨中間既骨髓，超級香！ 下次會再試其他!

我第一次 幫襯、 老闆介紹非常之好人之外、仲介紹左我食冰鎮咕嚕肉、 食到我停唔到口、老闆 真係冇介紹錯、 仲有其它小菜味道都幾好好食、 下次必定帶其他朋友嚟品嚐這店既小菜👍

話說我地2個人想打邊爐，甘岩經過見到佢有得打，之後入到去叫左個2人邊爐套餐$288，要求佢d雞子換左午餐肉。D食物一來到，每樣得2件，牛肉得4片，D野大部分仲未解凍，芋頭有怪味，好難食，午餐肉好似過期甘，有臭味，d食物求其掉埋一碗就比你，賣相甚差，最好食都只係d菜！見好多人都食緊羊腩煲，唔知會唔會好食d，其他野食我都唔可以話難食，因為我無試過，但打邊爐我真係唔會再來，都唔建議任何人來打邊爐！！！！

一早起身已經到食晏時間去左呢間餐廳食午餐先黎一個跟餐粟米湯粟米湯眼見就係一碗芡一入口 嘩 漂白水味呀兩碗都係咁唔知係佢洗碗落左漂白水洗定點無再飲第二啖了叫左一個銀魚肉餅飯同三絲炒意粉肉餅正常 三十蚊唔奢望好多 夠食就可以了意粉一上枱就有燶味啲面油林林 成個意粉就係燶同埋油最後到奶茶 叫左一凍一熱熱既一上枱就見到幾滴油係面已經唔想飲茶底好澀 飲左兩啖就放棄了凍個杯都係有怪味 飲左四份一就頂唔順了免得過都唔會再去食 無下次

同屋企人食過兩次飯，兩次都好好食。第一次食左炸蠔、口水雞、黑松露牛同埋個通菜（好似係叫啫啫煲），四個餸都唔錯。個人對於黑松露牛有少少失望，因為落左黃芥辣，同黑松露加埋有少少怪...坐底仲一人一碗免費粟米湯，印象唔錯。第二次去食叫左個咸魚肉餅、金磚豆腐、炸蠔、口水雞同埋腐竹菜（唔記得左菜名）兩次都叫左口水雞同炸蠔，因為真係幾好食。本人唔係好食得辣，佢個口水雞我都接受到，好好味。炸蠔同炸豆腐真係好好食，炸漿唔會太厚，食到蠔個鮮味

這家位於葵涌石蔭路的小店，老闆超nice，有人情味，例湯好正，清湯崩沙腩好味，冰鎮咕嚕肉，特色咸魚煎肉餅，煲仔菜，打邊爐，小炒及煮海鮮都好美味！家人喜歡在這裡歡聚晚餐，飲吓啤酒或紅酒，一樂也！

同上述食評遭遇非常相似，今天晚上同家人去食晚餐，雞煲小菜出品唔差，但果位四眼男店長真係非常無禮，態度非常差，我同佢講個冷氣吹住個頭，想將個冷氣風頁停止，或開第二部，佢一句話無嫁喎，我唔知你咩叫冷氣吹住個頭喎，其後我家人同另一位女職員交涉才安排關掉該部頭頂上嘅冷氣而開另外一部，如大家希望一嘗小菜滋味我建議可叫外賣，如打算堂食則要有受氣嘅準備，但我個人而言幾好食都好，要受住氣食晚餐我一定唔去下次。

一行五人嚟到，梗要試下佢地招牌菜啦冰鎮咕嚕肉…………外冷內熱而且脆口……掂雞煲……個人口味偏辣，所以叫咗中辣，一上枱，嘩……原來咁大煲，到品嚐時，唔……啲雞滑嘅亦都好入味，呢區黎講算唔錯啫啫通菜煲…………侍應一拎埋嚟嗰陣香味真係不得了，而食落真係堅惹味，值得一試召盬鮮尤…………炸到脹卜卜可惜味道偏咸，如果佐酒就ok其實呢餐都幾滿足，如果唔係服務咁差，我諗呢度係我食堂Ps如果大家去食，千萬唔好叫四眼嗰位唔知係咪老闆嘅人落單吖，十問九唔應，態度差到離譜，而其他都ok,或者真係唔憂做啦

第一次光顧, 一家三口去食晚餐, 原來這間食店也有不少捧場客。 點了西檸雞塊, 蒜蓉蝦乾粉絲蒸勝瓜, 鯪魚球, 7味豆腐粒。 上菜速度快, 煎炸小菜有鑊氣。西檸雞內脆外軟, 7味豆腐粒夠惹物, 作小食最適合不過。 最有驚喜的是紫心香芋丸, 原本以為是類似湯丸的甜品, 一上枱看到的是10粒炸得金黃的丸, 外脆內軟, 甜度適中。見不小食客點了生醃螄蚶及次鎮咕嚕肉, 礙於小朋友太食唔食得, 只好下次再找機會點。